“Aruma naAmureki Mutirongo,” Nyaya dzemuBhuku raMormoni (2023)
Aruma naAmureki Mutirongo
Rutendo muna Ishe panguva dzakaoma
Aruma naAmureki vakadzidzisa vhangeri muguta reAmoniha. Vamwe vanhu vakatenda muna Ishe uye vakatendeuka. Asi vamwe vanhu vakawanda vakashatirirwa Aruma naAmureki uye vaida kuvaparadza. Vanhu vakashatirwa vakasunga Aruma naAmureki uye vakaenda nevarume vaviri ava kumutongi mukuru wemuguta.
Mutongi mukuru aiva asingatendi kuti vanhu vake vaifanira kutendeuka. Vanhu vakatsamwira Aruma naAmureki. Vakaita kuti varume vakatenda izvo Aruma naAmureki zvavaidzidzisa vabude muguta. Zvino vakakanda madzimai nevana vaitenda muna Ishe mumoto.
Amureki akasuwa zvikuru apo paakaona vanhu vachirwadziwa. Akakumbira Aruma kuti ashandise simba raMwari kuti avaponese. Asi aruma akati Mweya waMwari waisazomutendera. Akaudza Amureki kuti madzimai nevana ava vaizova naIshe. Ishe vaizotonga vanhu vakavauraya.
Mutongi mukuru akanyomba Aruma naAmureki nokuda kwokuti Ishe havana kudzivirira madzimai nevana. Akatumira Aruma naAmureki kutirongo.
Mushure memazuva matatu, mutongi mukuru akaenda kutirongo nevapirisita vake enhema. Vakabvunza mibvunzo yakawanda. Asi Aruma naAmureki vakaramba kuvapindura.
Mutongi mukuru nevapirisita vake vakaita zvinhu zvakashata kuna Aruma naAmureki. Uyewo havana kupa Aruma naAmureki zvokudya kana mvura. Uye vakanyomba izvo Aruma naAmureki zvavaidzidzisa.
Aruma naAmureki vakatambudzika kwemazuva mazhinji. Mutongi mukuru akauya zvakare nevapirisita vake. Akaudza Aruma naAmureki kuti kana vaiva nesimba raMwari, vaifanira kudambura tambo dzakavasunga. Zvino iye aizotenda zvavaitaura.
Aruma naAmureki vakanzwa simba raMwari. Vakasimuka. Aruma akanga aine rutendo muna Ishe uye akakumbira simba rekudambura tambo.
Aruma naAmureki vakadambura tambo. Mutongi mukuru nevapirisita vake vakatya. Vakaedza kutiza, asi zvino pasi rakatanga kudengendeka.
Madziro etirongo akawira pamusoro pemutongi mukuru nevapirisita vake, uye vakafa. Asi Ishe vakadzivirira Aruma naAmureki. Vanhu pavakanzwa ruzha, vakamhanya kuzoona zvakanga zvichiitika. Aruma naAmureki chete ndivo vakafamba kubuda mutirongo. Vanhu vakatyiswa naAruma naAmureki zvokuti vakatiza.