Sākalamēnití

ʻI he pō kimuʻa ʻi he Tutuki ʻo Sīsū Kalaisí, naʻá Ne fakataha ai mo ʻEne kau ʻAposetoló ʻo fuofua fakahoko ai ʻa e sākalamēnití (vakai, Luke 22:19–20). Hili ʻEne Toetuʻú, naʻá Ne fuofua fakahoko ʻa e sākalamēnití ʻi he kakai Nīfaí (vakai, 3 Nīfai 18:1–11). ʻI he ʻahó ni ko e sākalamēnití ko ha ouau ia ʻoku maʻu ai ʻe he kāingalotu ʻo e Siasí ʻa e maá mo e vaí ko hono fakamanatu ʻo e feilaulau fakalelei ʻa Sīsū Kalaisí. Ko e ouau ko ʻení ko ha konga mahuʻinga ia ʻo e lotú mo e tupulaki fakalaumālié. ʻOku fakafoʻou ʻe he kāingalotu ʻo e Siasí ʻi he ouau ko ʻení ʻa e ngaahi fuakava naʻa nau fakahoko mo e ʻOtuá ʻi he taimi naá nau papitaiso aí.

‘I he fuofua fakahoko ʻe Sīsū Kalaisi ʻa e sākalamēnití, naʻá Ne folofola ʻo pehē, “Ko hoku sinó ʻeni, ʻa ia kuo foaki koeʻuhí ko kimoutolu: fai ʻeni ʻi he fakamanatu kiate au. … Ko e ipú ni ko e fuakava foʻou ʻi hoku totó, ʻa ia ʻoku lilingi koeʻuhí ko kimoutolu” (Luke 22:19–20). ʻOku ʻomi ʻe he sākalamēnití ha faingamālie ki he kāingalotu ʻo e Siasí ke fakalaulauloto mo manatu ai ʻi he loto houngaʻia ki he moʻui, ngāue, pea mo e Fakalelei ʻa e ʻAlo ʻo e ʻOtuá. Ko e mā kuo pakí ko ha fakamanatu ia ʻo Hono sinó mo ʻEne mamahi fakatuʻasinó—tautautefito ki Heʻene mamahi ʻi he kolosí. Ko ha fakamanatu foki ia ʻoku makatuʻunga ʻi Heʻene ʻaloʻofá mo e manavaʻofá, ʻe toetuʻu ʻa e kakai kotoa pē pea foaki ange ʻa e faingamālie ke moʻui ʻo taʻengata mo e ʻOtuá.

Ko e vaí ko ha fakamanatu ia naʻe lilingi ʻe he Fakamoʻuí Hono taʻataʻá ʻi he mamahi mo e faingataʻaʻia fakalaumālie lahi, ʻo kamata ʻi he Ngoue ko Ketisemaní pea fakaʻosi ki he kolosí. Naʻá Ne folofola ʻi he ngoué ʻo pehē, “ʻOku mamahi lahi ʻaupito, ʻo hangē ka maté, hoku laumālié” (Mātiu 26:38). ʻI heʻene fakamoʻulaloaʻi ia ki he finangalo ʻo e Tamaí, naʻá Ne fuesia ʻo lahi ange ʻi he meʻa te tau lava ʻo ʻiló: “[Naʻe] tafe hifo ʻa e taʻataʻá mei he ava kotoa pē ʻo hono kilí, pea [naʻe] lahi pehē ʻa ʻene mamahí koeʻuhi ko e ngaahi fai angahala mo e ngaahi anga-fakalielia ʻa hono kakaí” (Mōsaia 3:7). Naʻá Ne fuesia ʻa e ngaahi angahala, ngaahi mamahi, mo e ngaahi faingataʻaʻia ʻa e kakai kotoa pē, ʻi hono foaki ʻo e fakamolemoleʻi ʻo e ngaahi angahalá kiate kinautolu ʻoku fakatomala pea moʻui ʻaki ʻa e ongoongoleleí (vakai, 2 Nīfai 9:21–23). ʻI hono lilingi ʻo e taʻataʻa ʻo Sīsū Kalaisí, naʻá Ne fakamoʻui ai ʻa e kakai kotoa pē mei he meʻa ʻoku ui ʻe he folofolá ko e “ʻuluaki angahala” ʻo e maumaufono ʻa ʻĀtamá (Mōsese 6:54).

Ko hono maʻu e sākalamēnití ko ha fakamoʻoni ia ki he ʻOtuá ʻe hoko atu hono manatua Hono ʻAló ʻo laka atu ʻi he kiʻi vahaʻataimi nounou ʻo e ouau toputapu ko iá. Ko e konga ko ʻeni ʻo e ouaú ko ha palōmesi ia ke manatu maʻu ai pē kiate Ia pea mo ha fakamoʻoni ki he loto fiemālie fakafoʻituitui ke toʻo kiate kita ʻa e huafa ʻo Sīsū Kalaisí pea mo tauhi ʻEne ngaahi fekaú. ʻI hono maʻu ʻa e sākalamēnití mo fakahoko ʻo e ngaahi tukupā ko ʻení, ʻoku fakafoʻou ai ʻe he kāingalotu ʻo e Siasí ʻa e fuakava naʻa nau fakahoko ʻi he papitaisó (vakai, Mōsaia 18:8–10; Tokāteline mo e Ngaahi Fuakava 20:37).

ʻOku fakafoʻou leva ʻe he ʻEikí ʻa e talaʻofa ʻo hono fakamolemoleʻi ʻo e angahalá pea fakaʻatā ʻa e kāingalotu ʻo e Siasí ke “ʻiate kinautolu maʻu ai pē ʻa hono Laumālié” (Tokāteline mo e Ngaahi Fuakava 20:77). Ko e takaua maʻu pē ʻa e Laumālié ko e taha ia ʻo e ngaahi meʻaʻofa maʻongoʻonga taha ʻo e moʻui fakamatelié.

ʻI he teuteu ʻi he uike takitaha ki he sākalamēnití, ʻoku fakaʻaongaʻi ʻe he kāingalotu ʻo e Siasí ha taimi ke vakavakaiʻi ai ʻenau moʻuí mo fakatomala mei he ngaahi angahalá. ‘Oku ‘ikai fie maʻu ia ke nau haohaoa pea nau toki maʻu ‘a e sākalamēnití, ka ‘oku totonu ke nau maʻu ‘i honau lotó ‘a e laumālie ‘o e loto-fakatōkilaló mo e fakatomalá. ʻOku nau fāifeinga he uike kotoa ke teuteu ki he ouau toputapu ko iá mo ha loto mafesifesi mo e laumālie fakatomala (vakai, 3 Nīfai 9:20).

Lekooti e Ngaahi Ongo ʻOkú ke Maʻú

Ngaahi Pōpoaki Lahi Ange