Talateu

ʻI he taimi ʻoku fakafeʻiloaki atu ai ha taha ʻo e Kaingalotú kiate koe mo ha ngaahi fehuʻi pe hohaʻa fekauʻaki mo ʻene tuí, lau ia ko ha faingamālie toputapu. ʻOkú ke maʻu ha faingamālie ke toe fakaloloto ange ai ho vā fetuʻutaki mo kinautolú pea ngāue fakaetauhi ki heʻenau ngaahi fiemaʻú. ʻOku ʻikai fiemaʻu ia ke ke maʻu ha tali ki heʻenau ngaahi fehuʻí kotoa. ʻOku fiemaʻú pē ke ke maʻu ha loto-vekeveke ke ʻofa, fakafanongo, mo tokoni.

ʻOku ʻi ai ha niʻihi ʻoku ʻi ai haʻanau ngaahi fehuʻi pe meʻa ʻoku nau hohaʻa ki ai ka ʻoku nau kei mālohi pē ʻi he Siasí pea fiefia ʻi he ongoongoleleí. ʻOku fakamamaʻo ha niʻihi mei he Siasí ʻi ha ngaahi ʻuhinga kehekehe. ʻOku ʻi ai ha niʻihi kuo nau foki mai ʻo mālohi kakato. ʻOku tokolahi ha niʻihi ʻoku nau ngāue ke toe langa hake ʻenau tuí, koeʻuhí ʻoku ʻi ai ha ʻuhinga kehe ʻa e tuí mo e ʻekitivitií kiate kinautolu. ʻOku ʻi ai ha niʻihi ʻoku nau mavahe ʻaupito mei he Siasí, neongo te nau lava ʻo fili ke kei fetuʻutaki vāofi mo honau fāmilí mo e ngaahi kaungāmeʻa ʻoku kei kau maí.

Neongo pe ko e hā ʻenau ngaahi filí, ʻe lava ke hoko hoʻo vā fetuʻutakí ko ha ivi tākiekina ki he leleí ʻi heʻenau moʻuí. ʻE lava ke hoko ha kaungāmeʻa pe mēmipa faivelenga ʻo e fāmilí ko ha maama kapau te nau feinga ke foki ki ha moʻui ʻo e tuí mo e mālohi ʻi he Siasí. ʻOku aleaʻi ʻe he ngaahi fakamatala ʻi he konga ko ʻení ʻa e ngaahi tefitoʻi moʻoni fakahinohino maʻau ʻi hoʻo ngāue fakaetauhi ʻi he ʻofa kiate kinautolu ʻoku ʻi ai haʻanau ngaahi fehuʻi fekauʻaki mo e Siasí.