Fakatupulaki Hoʻo Tuí

ʻI hoʻo tokoni ke fakamaʻamaʻa e mafasia ʻo ha taha kehe, ʻoku fiemaʻu ki ai ha ngāue pea te ne tokonia kitautolu ʻi ha ngaahi founga taʻeʻamanekina. Fakapapauʻi ʻokú ke tokangaʻi fakalaumālie koe pea tuʻu maʻu ʻi he ongoongolelei ʻo Sīsū Kalaisi kuo fakafoki maí. ʻI ha hoko ha meʻa fakatuʻupakē, ʻoku fakahinohinoʻi ʻa e kau pāsese ʻi ha vakapuna ke nau tomuʻa fakamaʻu ʻenau meʻa mānava ʻokisikená pea toki tokoniʻi leva e niʻihi kehé. Ko e meʻa tatau pē, te tau toki lava pē ʻo hiki hake ʻa e niʻihi kehé kapau te tau tokanga ki he ngāue mahuʻinga ʻo hono tanumaki ʻetau tuí mo e fakamoʻoní.

ʻE lava ke tokoniʻi koe ʻe he ngaahi tefitoʻi moʻoni ko ʻení ke fakamālohia hoʻo tuí lolotonga hoʻo ngāue fakaetauhi ki he niʻihi kehé:

Manatuʻi ʻa e meʻa ʻokú ke tui ki ai mo aʻusiá. Fakakaukau ki he ngaahi mōmeniti naʻá ke ongoʻi ai ʻa e tākiekina ʻa e Laumālie Māʻoniʻoní. Manatuʻi e ngaahi taimi kuó ke aʻusia ai e melinó, fiefiá, ʻofá, mo e mahinó. Fakakaukau ki ha taimi naʻá ke ongoʻi ai e folofola atu ʻa e ʻOtuá kiate koe ʻi ha ngaahi founga fakafoʻituitui ke fakapapauʻi ʻaki hoʻo tuí. ʻE lava ke hoko hoʻo ngaahi aʻusia fakalaumālie he kuohilí ko ha maʻuʻanga ivi mo ha maluʻi mei he veiveiuá mo e manavaheé.
Hokohoko atu hono tanumaki hoʻo fakamoʻoní. ʻOku mahuʻinga ke hokohoko atu hono fai e ngaahi meʻa naʻá ne tokoniʻi koe ke langaki hoʻo fakamoʻoni ki he ongoongoleleí. ʻE lava ke kau heni ʻa hono lau ʻo e folofolá, lotú, maʻu ʻo e sākalamēnití, moihū ʻi he temipalé, mo e tokoni ki he niʻihi kehé. ʻE lava ke tokoni atu ʻa e ngaahi founga faingofua ko ʻení ke ke ongoʻi ʻa e ivi tākiekina ʻo e Laumālié pea kei faivelenga ai pē.
Alanima atu ke tokoniʻi e niʻihi kehé. Kapau ʻoku ongo mamafa ʻa e mafasia ʻo e ngāue fakaetauhí ki ha kaungāmeʻa pe mēmipa ʻo e fāmilí, manatuʻi ʻoku ʻikai ke ke tuenoa. Te ke lava ʻo alanima atu ki he kau mēmipa falalaʻanga ʻo e fāmilí, kaungāmeʻá, kau taki ʻo e Siasí, pe kau mataotao fakapalōfesinalé. ʻE lava ke tokoniʻi koe ʻe heʻenau loto-ʻofá, ngaahi lotú, mo e taukeí ke ke manatuʻi ʻa e lahi ʻo e ʻofa ʻa e ʻOtuá ʻiate koé. Te nau lava foki ʻo poupouʻi koe ʻi hoʻo fekumi ki he ngaahi tali ki hoʻo ngaahi fehuʻí.
Fokotuʻu ha ngaahi fakangatangata ʻoku moʻui leleí. Neongo ʻoku totonu ke tau feinga ke fakafanongo mo poupouʻi e niʻihi kehé ʻaki ʻenau ngaahi fehuʻí pe meʻa ʻoku tau hohaʻa ki aí, ka ʻoku totonu foki ke tau ʻiloʻi ʻetau ngaahi fiemaʻú mo e ngaahi fakangatangatá. ʻOku mahuʻinga foki hoʻo ngaahi ongo fakaekaukaú mo e ongo fakaelotó. Mahalo te ke aʻusia ʻa e manavasiʻí, taʻefiemālié, mo ha loto-mamahi lolotonga e founga ko ʻení. Kapau ʻoku fuʻu taulōfuʻu ha fepōtalanoaʻaki, fakahaaʻi hoʻo ngaahi ongo fakaelotó pea aleaʻi ha taimi kehe ke ke talanoa ai. Mahalo naʻa fiemaʻu ʻe ha taha ʻokú ke ʻofa ai ke fai ʻene ngaahi fehuʻí ʻi he kaveinga ʻo e fepōtalanoaʻaki pe talanoa fekauʻaki mo ha kaveinga ʻi ha founga te ne fakamaaʻi koe pe ko hoʻo tuí. ʻOku fiemaʻu ke nau fakaʻapaʻapaʻi hoʻo fonongá, ʻo hangē pē ko e fiemaʻu ke ke fakaʻapaʻapaʻi e fononga ʻa e niʻihi kehé. ʻOku ʻikai fiemaʻu ia ke ke ongoʻi ʻoku fakasiʻia pe ʻikai ʻikai poto kapau ʻe kehe hoʻo aofangatukú kehe mei ha taha kehe.
Hoko ke ke lelei ange ʻi hoʻo maʻu e ʻiló. ʻOku ʻikai fiemaʻu ia ke ke taukei ʻi ha palopalema ka ke hoko ko ha tokotaha poupou lelei. Ka ʻe lava ke lelei ʻaupito ke ako fekauʻaki mo ha tefito ʻoku ʻikai ke ke maʻu ha puipuituʻa ki ai. Fakahoko ha ako ʻi he fakakaukau loloto ki he tokāteline mo e hisitōlia ʻo e Siasí. ʻAi ke ke maheni ange mo e ngaahi fehuʻi angamahení. Ako e meʻa kuo lea ʻaki ʻe he kau taki ʻo e Siasí mo e kau mataotao faivelengá ʻi he ngaahi tefito ko ʻení. ʻI he foungá ni, te ke lava ʻo ako, fakahalaki e ʻilo naʻe akó, mo toe ako foʻou ha meʻa lahi.
ʻAi ke ke maheni mo e ngaahi tefitoʻi moʻoni ki hono kumi ʻo e ngaahi talí. Ako mo ngāueʻi ʻa e ngaahi tefitoʻi moʻoni naʻe aleaʻi ʻi he konga “Ko Hono Kumi ha Ngaahi Tali ki Hoʻo Ngaahi Fehuʻí” ʻi he maʻuʻanga tokoni ko ʻení.

Ngaahi potufolofola mahuʻingá: Luke 22:31–32; 1 Nīfai 15:8–11; Sēkope 4:6; ʻAlamā 32:41–43; Tokāteline mo e Ngaahi Fuakava 6:14