ʻOtua ko e Tamaí

Ko e taha ʻo e ngaahi fehuʻi maʻongoʻonga taha ʻo e moʻuí ko e “Ko hai au?” ʻOku ʻi ai ha hiva manakoa ʻa e Palaimelí ʻokú ne tokoniʻi e fānau īkí ke nau tali ʻa e fehuʻi ko ʻení. ʻOku tau hiva, “Fānau au ʻa e ʻOtuá, kuó Ne fekau mai.” ʻOku hanga ʻe heʻetau ʻilo ko e fānau kitautolu ʻa e ʻOtuá ʻo ʻomi ha ivi, fakanonga, mo ha ʻamanaki lelei.

Kuo fuoloa hono ʻiloʻi ʻe ha kau mataotao ko e vakai ha niʻihi ʻo e kau fuofua Kalisitiané kau ki he ʻOtuá, naʻe liliu lahi ia ʻi he hili ha ngaahi senituli. Naʻe fakataautaha ange ki he kau fuofua Kalisitiané ʻa e fakakaukau ki he ʻOtuá, fakaetangata ange, pea siʻi ange ʻene mahinó ʻi he niʻihi ne toki ʻasi kimui ange lolotonga e kehekehe ʻo e ngaahi fakamatala ki he tui faka-Kalisitiané. Ko e liliu fakakaukau mahuʻinga naʻe kamata ʻi he senituli hono uá, hili ʻa e mole ʻo e mafai fakaeʻaposetoló, naʻe tupu ia mei hano fakatahaʻi fakaefakakaukau ʻo e tokāteline faka-Kalisitiané mo e fakakaukau fakapoto faka-Kalisí.

ʻOku tui ʻa e Kau Māʻoniʻoni ʻi he Ngaahi ʻAho Kimui Ní, ko ha fehalaaki lahi ʻaupito ia ʻa hono fakatahaʻi ʻo e fuofua tui fakalotu faka-Kalisitiané mo e fakakaukau fakapoto faka-Kalisí. ʻOku taaimuʻa ʻi he ngaahi tokāteline ne mole ʻi he founga ngāue ko ʻení, ʻa e natula ʻo e Toluʻi ʻOtuá. ʻOku tui mālohi ʻa e Kau Māʻoniʻoni ʻi he Ngaahi ʻAho Kimui Ní ko e ʻOtua ko e Tamaí ko ha tokotaha Ia ʻokú Ne maʻu ʻa e ngaahi ʻulungaanga ne tupu mei ha fakakaukau ʻa e kau fuofua Kalisitiané. ʻOku fenāpasi ʻa e tui ko iá mo e tui ʻa e kau fuofua Kalisitiané kau ki he ʻOtuá, ka ʻoku kehe ia mei he ngaahi tui kimuí.

Ko ha fānau moʻoni kotoa kitautolu ʻa e ʻOtuá, naʻe fakatupu fakalaumālie ʻi he moʻui ʻi he maama fakalaumālié. ʻI heʻetau hoko ko ʻEne fānaú, ʻe lava ke tau fakapapauʻi ʻoku ʻi ai hotau ivi malava fakalangi mo taʻengata pea te Ne tokoniʻi kitautolu ʻi heʻetau feinga fakamātoato ke aʻusia hotau ivi malava ko iá.

Ko e Tamai Hēvaní ko e Tupuʻanga Māfimafí Ia. Naʻá Ne fakatupu ʻa e langí mo māmani pea mo e meʻa kotoa pē ʻi aí, ʻo fakafou ʻia Sīsū Kalaisi (vakai, Mōsese 2:1). Naʻe pehē ʻe ʻAlamā, “ʻOku fakahā ʻe he meʻa kotoa pē ʻoku ʻi ai ha ʻOtua, ʻio, naʻa mo e māmaní, pea mo e ngaahi meʻa kotoa pē ʻoku ʻi hono funga ʻo iá, ʻio, mo ʻene ʻalú, ʻio, kae ʻumaʻā mo e ngaahi palanite kotoa pē ʻa ia ʻoku nau ʻalu ʻi honau anga totonu ʻonautolú, ʻoku nau fakamoʻoni ʻoku ʻi ai ha Tupuʻanga Fungani Māʻolunga” (ʻAlamā 30:44).

ʻOku fie maʻu ʻe heʻetau Tamai ʻi he Langí ke tau nofo mo Ia ʻo taʻengata. Ko ʻEne ngāué mo Hono nāunaú ke “fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39). Ka koeʻuhi ke lava ʻo fakahoko ʻení, naʻá Ne teuteu ai ʻa e palani ʻo e fakamoʻuí. Naʻá Ne fekau mai Hono ʻAlo ʻOfaʻanga ko Sīsū Kalaisí, ke Ne vete ʻa e ngaahi haʻi ʻo e maté mo fakahoko ʻa e fakalelei maʻá e ngaahi angahala ʻa māmaní: “He naʻe ʻofa pehē ʻa e ʻOtuá ki māmani, naʻá ne foaki hono ʻAlo pē taha naʻe fakatupú, koeʻuhí ko ia kotoa pē ʻe tui kiate iá ke ʻoua naʻa ʻauha kae maʻu ʻa e moʻui taʻengatá” (Sione 3:16). Ko e feilaulaú ni ko hono fakafōtunga lelei taha ia ʻo e ʻofa ʻa ʻetau Tamaí ʻiate kitautolú.

ʻI heʻetau hoko ko e fānau ʻa e ʻOtuá, ʻoku ʻi ai hotau vā fetuʻutaki makehe mo Ia, ʻo tau makehe ai mei he kotoa ʻo ʻEne ngaahi fakatupu kehé. ʻOku totonu ke tau feinga ke ʻiloʻi ʻa ʻetau Tamai ʻi he Langí. ʻOkú Ne ʻofa ʻiate kitautolu, pea kuó Ne ʻomi ha faingamālie mahuʻinga ke tau ʻunu ʻo ofi kiate Ia ʻi he taimi ʻoku tau lotu aí. ʻOku ʻafioʻi mo tali ʻetau ngaahi lotu ʻoku fakahoko ʻi he loto-fakatōkilalo mo fakamātoató.

ʻE lava foki ke tau ʻiloʻi ʻetau Tamaí ʻi heʻetau ako kau ki Hono ʻAlo ʻOfaʻangá mo fakaʻaongaʻi ʻa e ongoongoleleí ʻi heʻetau moʻuí. Naʻe akoʻi ʻe he Fakamoʻuí ʻa ʻEne kau ākongá: “Ka ne mou ʻilo au, pehē, kuo mou ʻilo mo ʻeku Tamaí foki. … Ko ia kuó ne mamata kiate aú, kuo mamata ia ki he Tamaí” (Sione 14:7, 9).

ʻOku tau ʻunuʻunu ʻo ofi ki he ʻOtua ko e Tamaí ʻi he taimi ʻoku tau ako ai ʻa e folofolá mo e ngaahi lea ʻo e kau palōfita ʻi he ngaahi ʻaho kimui ní, pea mo e taimi ʻoku tau ngāue tokoni aí. ʻI he taimi ʻoku tau muimui ai ki he finangalo ʻo e ʻOtuá mo moʻui fakatatau mo e founga ʻokú Ne finangalo ke tau moʻui aí, ʻoku fakautuutu ʻetau hoko ʻo hangē ko Ia mo Hono ʻAló. ʻOku tau teuteuʻi kitautolu ke tau foki ʻo nofo ʻi Hona ʻaó.

• Fakatupú

• Toluʻi ‘Otuá

• Malakai 2:10

• Mātiu 3:13–17

• Mātiu 6:6

• Ngāue 7:55–56

• ʻEfesō 4:6

• Mōsaia 4:9

• Tokāteline mo e Ngaahi Fuakava 130:22

• Ngaahi Tefito ʻo e Tui 1:1

•  

•  

• Fakahinohino ki he Ngaahi Folofolá, “Tamai ʻi Hēvaní,” “ʻOtuá, Toluʻi ʻOtuá”

How Great Thou Art (ʻE ʻOtua ko e Tapuhā)

“O My Father (ʻE Tamai ʻi Hēvani ē)”

“Rejoice in Our Knowledge of the Godhead,” Liahona, Fepueli 2005