1-р бүлэг
Иосеф Смит ба түүний гэр бүл
1805–1820 он
Иосеф хоёр ах, гурван эрэгтэй дүү, гурван эмэгтэй дүүтэй байжээ.
Иосефын эцэг эх сайн хүмүүс байв. Тэд хүүхдүүдээ хайрлаж, тэднийг асарч тэжээхийн тулд шаргуу хөдөлмөрлөдөг байсан.
Иосефыг жаахан байхад хөл нь маш ноцтой өвджээ. Эмч нар түүний хөлийг эмчлэх гэж оролдсон боловч чадсангүй.
Хайрум Смит Иосефын нэг ах нь байсан бөгөөд түүнд хайртай байв. Тэр Иосефын хөл маш ихээр өвдөж байгаад санаа нь зовниж гуниглаж байлаа. Тэр Иосефын орны хажууд суугаад, түүнд туслахыг хичээдэг байв.
Эмч нар Иосефын хөлийг тайрна гэхэд ээж нь зөвшөөрөөгүй юм. Иймд эмч нар хөлний яснаас нь тайрахаар шийджээ. Иосеф эмч нар ясыг нь тайрах үед маш ихээр өвдөнө гэдгийг мэдэж байсан ч Тэнгэрлэг Эцэг өөрт нь тусална гэдэгт итгэлтэй байлаа.
Эмч нар Иосефоос дарс уух хэрэгтэй тэгвэл тийм ч их өвдөхгүй гэжээ. Харин Иосеф дарс уугаагүй юм. Иосеф ясаа тайруулж байгаагаа ээждээ харуулахыг хүсээгүй тул түүнээс гадаа хүлээхийг хүсжээ.
Иосеф ясаа тайруулж байхдаа аавыгаа хажууд нь байж, гараас нь атгаж байхыг хүсжээ. Эмч нар ясны өвчилсөн хэсгийг тайрсан бөгөөд маш аймшигтай өвдөж байсан ч Иосеф зоригтой байсан. Олон өдрийн дараа түүний хөл дээрджээ.
Иосефыг арай том болох үед гэр бүл нь Нью-Йорк муж руу нүүжээ. Тэд Палмирад ойрхон фермийн дүнзэн байшинд амьдардаг байв.
Иосефын гэр бүл ядуу байсан. Тэд фермийнхээ мөнгийг төлөхийн тулд маш шаргуу ажилладаг байв. Хөвгүүд нь аавдаа ургац тариалж, мал амьтан өсгөж үржүүлэхэд тусалдаг байсан бол охид ээждээ тусалдаг байжээ.
Иосеф сайн хүү байсан бөгөөд аз жаргалтай, инээлдэн хөгжилдөх дуртай байв.