“నీవు నాయందును నేను నీయందును నిలిచియుందుము; కాబట్టి నాతో నడువుము”

ఆయన యందు నిలిచియుండమని మనలో ప్రతీఒక్కరికి ప్రభువైన యేసు క్రీస్తు ఆహ్వానమిచ్చారు.⁵ కానీ నిజంగా మనం ఆయన యందు నిలిచియుండడాన్ని ఎలా నేర్చుకుంటాము?

నిలిచియుండుము అనే పదము, దృఢంగా లేదా స్థిరంగా నిలిచియుండడాన్ని మరియు లొంగకుండా సహించడాన్ని సూచిస్తుంది. ఎల్డర్ జెఫ్రీ ఆర్. హాలండ్ ఇలా వివరించారు, “నిలిచియుండుము” అనేది ఒక చర్య, దాని అర్థము, “‘నిలిచియుండడం—కానీ శాశ్వతంగా నిలిచియుండడం.’ ప్రపంచంలో … ప్రతీఒక్కరి … కోసం సువార్త సందేశం యొక్క పిలుపు అదే. రండి, కానీ నిలిచియుండడానికి రండి. నమ్మకం మరియు ఓర్పుతో రండి. మీకోసం మరియు తప్పకుండా మిమ్మల్ని అనుసరించవలసిన తరాలన్నిటి కోసం శాశ్వతంగా రండి.”⁶ ఆవిధంగా, మంచి మరియు చెడు సమయాల్లో విమోచకునిపట్ల, ఆయన పరిశుద్ధ ఉద్దేశ్యాల పట్ల మన భక్తియందు మనం స్థిరంగా, నిలకడగా ఉన్నప్పుడు, మనం క్రీస్తుయందు నిలిచియుంటాము.⁷

పునరుద్ధరించబడిన సువార్త యొక్క నిబంధనలు, విధుల ద్వారా ఆయన కాడిని⁸ మనపై తీసుకోవడానకి మన నైతిక కర్తృత్వాన్ని అభ్యసించడం చేత మనం ప్రభువు యందు నిలిచియుండడాన్ని ప్రారంభిస్తాము. మన పరలోక తండ్రితో, పునరుత్థానం చెందిన, సజీవుడైన ఆయన కుమారునితో మనం కలిగియున్న నిబంధన సంబంధం దృక్పథం, నిరీక్షణ, శక్తి, శాంతి మరియు శాశ్వతమైన ఆనందం యొక్క దివ్యమైన మూలం; అది మన జీవితాలను మనం నిర్మించవలసిన దృఢమైన పునాది⁹ కూడా.

తండ్రి మరియు కుమారునితో మన వ్యక్తిగత నిబంధన సంబంధాన్ని బలపరచుకోవడానికి నిరంతరం ప్రయత్నించడం ద్వారా మనం ఆయన యందు నిలిచియుంటాము. ఉదాహరణకు, ఆయన ప్రియ కుమారుని నామములో నిత్య తండ్రికి మనఃపూర్వకంగా ప్రార్థన చేయడం వారితో మన నిబంధన సంబంధాన్ని వృద్ధిచేసి, బలపరుస్తుంది.

నిజంగా క్రీస్తు యొక్క మాటలను విందారగించడం ద్వారా మనం ఆయన యందు నిలిచియుంటాము. రక్షకుని సిద్ధాంతము నిబంధన సంతానముగా మనల్ని ఆయనకు దగ్గర చేస్తుంది¹⁰ మరియు మనం చేయవలసిన కార్యములన్నిటినీ మనకు తెలుపుతుంది.¹¹

మన నిబంధన వాగ్దానాలపై సమీక్షిస్తూ, ప్రతిబింబిస్తూ సంస్కారపు విధిలో పాల్గొనడానికి మనస్ఫూర్తిగా సిద్ధపడడం మరియు నిజంగా పశ్చాత్తాపపడడం ద్వారా మనం ఆయన యందు నిలిచియుంటాము. యోగ్యులుగా సంస్కారములో పాలుపొందడమనగా, ఆ పవిత్ర విధిలో పాల్గొనడానికి కావలసిన స్వల్ప కాలం తర్వాత, యేసు క్రీస్తు నామమును మనపై తీసుకోవడానికి మనం సమ్మతిస్తున్నామని మరియు “ఎల్లప్పుడు ఆయనను జ్ఞాపకము చేసుకోవడానికి”¹² ప్రయత్నిస్తామని దేవునికి సాక్ష్యమివ్వడం.

మనం ఆయన పిల్లలకు సేవచేసి, మన సహోదర సహోదరీలకు పరిచర్య చేసినప్పుడు దేవునికి సేవచేయడం ద్వారా మనం ఆయన యందు నిలిచియుంటాము.¹³

“నేను నా తండ్రి ఆజ్ఞలు గైకొని ఆయన ప్రేమయందు నిలిచియున్న ప్రకారము మీరును నా ఆజ్ఞలు గైకొనిన యెడల నా ప్రేమయందు నిలిచియుందురు,”¹⁴ అని రక్షకుడు చెప్పారు.

మనం రక్షకునియందు నిలిచియుండగల అనేక విధానాలలో చాలామట్టుకు నేను క్లుప్తంగా వివరించాను. ఇప్పుడు ఆయన శిష్యుల వలె అడిగి, వెదకి, తట్టాలని మరియు మనం చేసేవాటన్నిటిలో క్రీస్తును మన జీవితాలకు కేంద్రంగా చేసుకోగల ఇతర అర్థవంతమైన విధానాలను పరిశుద్ధాత్మ శక్తి ద్వారా మనకై మనం నేర్చుకోవాలని మనలో ప్రతీఒక్కరిని నేను ఆహ్వానిస్తున్నాను.

ఆయన అనుచరులకు రక్షకుని వాగ్దానం రెండురెట్లు ఉంది: మనం ఆయనయందు నిలిచియున్నట్లయితే, ఆయన మనయందు నిలిచియుంటారు. కానీ, మీయందు, నాయందు—వేరువేరుగా, వ్యక్తిగతంగా నిలిచియుండడం నిజంగా క్రీస్తుకు సాధ్యమేనా? ఈ ప్రశ్నకు జవాబు, అవును! అని ప్రతిధ్వనిస్తోంది.

వారి శ్రమల వలన తమనుతాము తగ్గించుకొనుటకు బలవంతము చేయబడిన పేదవారికి ఆల్మా బోధించి, సాక్ష్యమివ్వడం గురించి మనం మోర్మన్ గ్రంథములో నేర్చుకుంటాము. అతని ఉపదేశములో, అతడు వాక్యమును ఒక విత్తనంతో పోల్చాడు, అది తప్పకుండా నాటబడి, పోషించబడాలి మరియు అతడు “వాక్యమును” యేసు క్రీస్తు యొక్క జీవితము, నియమితకార్యము మరియు ప్రాయశ్చిత్త త్యాగముగా వర్ణించాడు.

“దేవుని కుమారుడు తన జనులను విమోచించుటకు వచ్చునని, ఆయన వారి పాపముల కొరకు ప్రాయశ్చిత్తము చేయుటకు శ్రమపడి మరణించునని, ఆయన మృతులలో నుండి లేచునని, వారి క్రియలను బట్టి అంత్య మరియు తీర్పు దినమున తీర్పు తీర్చబడుటకు మనుష్యులందరు ఆయన యెదుట నిలబడునట్లు అది పునరుత్థానమును తెచ్చునని ఆయన యందు నమ్ముట మొదలుపెట్టుడి,”¹⁵ అని ఆల్మా చెప్పాడు.

ఆల్మా చేత “వాక్యము” గురించి ఈ వర్ణన ఇవ్వబడినందున, తరువాత అతడు గుర్తించే ప్రేరణాత్మక సంబంధాన్ని దయచేసి పరిగణించండి.

“ఇప్పుడు … మీరు ఈ వాక్యమును మీ హృదయములలో నాటవలెనని మరియు అది వ్యాకోచించుట మొదలుపెట్టగానే మీ విశ్వాసము ద్వారా దానిని పోషించవలెనని నేను కోరుచున్నాను. అది మీలో నిత్యజీవమునకు మొలకెత్తుచూ ఒక వృక్షమగును. అప్పుడు ఆయన కుమారుని యందలి సంతోషము ద్వారా మీ భారములు తేలికగునట్లు దేవుడు మీకు అనుగ్రహించునుగాక. మరియు మీరు కోరిన యెడల ఇదంతయు మీరు కూడా చేయవచ్చు.”¹⁶

మన హృదయాలలో మనం నాటడానికి ప్రయత్నించవలసిన విత్తనమే వాక్యము—యేసు క్రీస్తు యొక్క జీవితము, నియమితకార్యము మరియు సిద్ధాంతము. వాక్యము విశ్వాసము చేత పోషించబడినప్పుడు, అది మీలో నిత్యజీవమునకు మొలకెత్తుచూ ఒక వృక్షము కాగలదు¹⁷

లీహై దర్శనంలో చెట్టు దేనికి చిహ్నమైయున్నది? చెట్టును యేసు క్రీస్తుకు ప్రతిరూపంగా పరిగణించవచ్చు.¹⁸

నా ప్రియమైన సహోదర సహోదరీలారా, మనలో వాక్యము ఉందా? రక్షకుని సువార్త యొక్క సత్యాలు మన హృదయమనే పలకలపై వ్రాయబడియున్నాయా?¹⁹ మనం ఆయన వద్దకు వచ్చి, క్రమంగా మరింతగా ఆయన వలె అవుతున్నామా? క్రీస్తు అనే వృక్షము మనలో పెరుగుతున్నదా? మనం ఆయన యందు²¹ “నూతన [సృష్టి]”²⁰ కావడానికి ప్రయత్నిస్తున్నామా?

బహుశా ఈ అద్భుతమైన సామర్థ్యము ఇలా అడిగేలా ఆల్మాను ప్రేరేపించింది, “మీరు దేవునివలన ఆత్మీయముగా జన్మించియున్నారా? మీ రూపముల యందు ఆయన స్వరూపమును పొందియున్నారా? మీ హృదయముల యందు ఈ బలమైన మార్పును అనుభవించియున్నారా?”²²

నీవు నాయందును నేను నీయందును నిలిచియుందుము,”²³ అని ప్రభువు హనోకుకిచ్చిన ఉపదేశాన్ని మనం ఎల్లప్పుడు గుర్తుంచుకోవాలి. మన యందు నిలిచియుంటానని రక్షకుడు చేసిన వాగ్దానం నిజమని మరియు పునఃస్థాపించబడిన ఆయన సంఘములో నిబంధనలను పాటించే ప్రతీ సభ్యునికి అది లభ్యమవుతుందని నేను సాక్ష్యమిస్తున్నాను.

“కావున ఆయనయందుండి నడుచుకొనుడి”²⁴ అని ప్రభువును స్వీకరించిన విశ్వాసులను అపొస్తలుడైన పౌలు హెచ్చరించాడు.

రక్షకుని యందు మరియు ఆయనతో నడవడం శిష్యత్వము యొక్క రెండు ముఖ్యాంశాలను ఎత్తిచూపుతుంది: (1) దేవుని ఆజ్ఞలకు లోబడియుండడం మరియు (2) తండ్రితో, కుమారునితో మనల్ని బంధించే పవిత్ర నిబంధనలను గుర్తుంచుకొని, గౌరవించడం.

యోహాను ఇలా ప్రకటించాడు:

“మనమాయన ఆజ్ఞలను గైకొనినయెడల, దీనివలననే ఆయనను ఎరిగియున్నామని తెలిసికొందుము.

“ఆయనను ఎరిగియున్నానని చెప్పుకొనుచు, ఆయన ఆజ్ఞలను గైకొననివాడు అబద్ధికుడు; వానిలో సత్యములేదు.

“ఆయన వాక్యము ఎవడు గైకొనునో వానిలో దేవుని ప్రేమ నిజముగా పరిపూర్ణమాయెను; ఆయనయందు నిలిచియున్నవాడనని చెప్పుకొనువాడు ఆయన ఏలాగు నడుచుకొనెనో ఆలాగే తానును నడుచుకొన బద్ధుడైయున్నాడు.

“మనమాయనయందున్నామని దీనివలన తెలిసికొనుచున్నాము.”²⁵

యేసు మనలో ప్రతీఒక్కరికి ఇలా పిలుపునిచ్చారు, “రండి, నన్ను అనుసరించండి”²⁶ మరియు “నాతో నడువుడి.”²⁷

మనం విశ్వాసములో ముందుకుసాగి, ప్రభువు ఆత్మ యొక్క సాత్వీకములో నడిచినప్పుడు,²⁸ మనం శక్తి, నడిపింపు, రక్షణ మరియు శాంతితో దీవించబడతామని నేను సాక్ష్యమిస్తున్నాను.

జీవాత్మలన్నిటికి ప్రభువు నుండి ఒక ప్రియమైన మనవిని ఆల్మా వివరిస్తున్నాడు.

“ఇదిగో మనుష్యులందరిని ఆయన ఆహ్వానించుచున్నాడు, ఏలయనగా కరుణా బాహువులు వారి వైపు చాపబడియున్నవి మరియు పశ్చాత్తాపపడుడి, నేను మిమ్ములను చేర్చుకొందునని ఆయన చెప్పుచున్నాడు.

“… నా యొద్దకు రండి, మీరు జీవవృక్షము యొక్క ఫలములో పాలుపొందెదరు; మీరు జీవాహారమును, జీవజలములను ఉచితముగా తిని త్రాగెదరు.”²⁹

రక్షకుని మనవి యొక్క సంపూర్ణ సమగ్రతను నేను నొక్కి చెప్తున్నాను. ఇప్పుడు జీవిస్తున్న, ఎప్పుడో జీవించిన మరియు ఇకముందు భూమిపై జీవించే ప్రతీ ఒక్క వ్యక్తిని ఆయన కృప మరియు కనికరముతో దీవించాలని ఆయన ఆరాటపడుతున్నారు.

సమావేశ కేంద్రంలోని ఈ వేదిక నుండి మరియు ప్రపంచవ్యాప్తంగా ఉన్న స్థానిక సమావేశాలలో పదేపదే ప్రకటించబడిన సిద్ధాంతము, నియమాలు, సాక్ష్యాలు నిజమని కొంతమంది సంఘ సభ్యులు అంగీకరిస్తారు—అయినప్పటికీ, ఈ నిత్య సత్యాలు ప్రత్యేకంగా వారి జీవితాల్లో, వారి పరిస్థితులకు అన్వయిస్తాయని నమ్మడానికి కష్టపడుతుంటారు. వారు మనఃపూర్వకంగా నమ్ముతారు మరియు బాధ్యతాయుతంగా సేవచేస్తారు, కానీ తండ్రితో మరియు విమోచించు ఆయన కుమారునితో వారి నిబంధన సంబంధము ఇంకా వారి జీవితాల్లో సజీవమైన, రూపాంతరం చెందుతున్న వాస్తవికతగా మారలేదు.

నేను వివరించడానికి ప్రయత్నించిన సువార్త సత్యాలు మీ కొరకు—వేరువేరుగా మరియు వ్యక్తిగతంగా మీ కొరకైనవని పరిశుద్ధాత్మ శక్తి ద్వారా మీరు తెలుసుకొని, అనుభవించగలరని నేను వాగ్దానమిస్తున్నాను.

యేసు క్రీస్తు మన ప్రియమైన, సజీవుడైన రక్షకుడని మరియు విమోచకుడని నేను ఆనందంగా సాక్ష్యమిస్తున్నాను. మనము ఆయనయందు నిలిచియున్నట్లయితే, ఆయన మనయందు నిలిచియుంటారు.³⁰ మనము ఆయనలో, ఆయనతో నడిచినప్పుడు, మనం విస్తారముగా ఫలమిచ్చుటకు దీవించబడతాము. ఆవిధంగా నేను ప్రభువైన యేసు క్రీస్తు యొక్క పవిత్ర నామములో సాక్ష్యమిస్తున్నాను, ఆమేన్.