Maama Fakalaumālié

ʻOku ʻuhinga ʻa e maama fakalaumālié ki heʻetau moʻui kimuʻa pea fāʻeleʻi kitautolu ki he māmani ko ʻení. ʻI heʻetau moʻui kimuʻa ʻi he māmaní, ne tau nofo ʻi he ʻao ʻo e Tamai Hēvaní ko ʻEne fānau fakalaumālié. Naʻe ʻikai ke tau maʻu ha sino fakamatelie.

ʻI he moʻui ko ia kimuʻa ʻi he māmaní, ne tau kau ai ki ha fakataha alēlea mo e fānau fakalaumālie kehe ʻa e Tamai Hēvaní. ʻI he fakataha ko iá, ne fokotuʻu ai ʻe he Tamai Hēvaní ʻa ʻEne palani lahi ʻo e fiefiá (vakai, ʻĒpalahame 3:22–26).

Fakatatau mo e palani ʻo e fiefiá, naʻe fuakava ʻa Sīsū Kalaisi ʻi he teʻeki ke ne maʻu ʻa e sinó, ʻa ia ko e ʻUluaki ʻAlo ʻo e Tamaí ʻi he laumālié, ke Ne hoko ko e Fakamoʻuí (vakai, Mōsese 4:2; ʻĒpalahame 3:27). Naʻe fakangofua ʻa kinautolu ne muimui ki he Tamai Hēvaní mo Sīsū Kalaisí ke nau omi ki māmani ke aʻusia ʻa e tuʻunga fakamatelié mo fakalakalaka ai ki he moʻui taʻengatá. Naʻe angatuʻu leva ʻa Lusefā, ko ha foha fakalaumālie ia ʻe taha ʻo e ʻOtuá, ki he palaní mo ne “feinga ke fakaʻauha ʻa e tauʻatāina ke fili ʻa e tangatá” (Mōsese 4:3). Naʻe hoko ia ko Sētane, pea kapusi ai ia mo hono kau muimuí mei he langí pea taʻofi ke ʻoua te nau maʻu ha faingamālie ke maʻu ha sino fakamatelie mo aʻusia ʻa e moʻui fakamatelié (vakai, Mōsese 4:4; ʻĒpalahame 3:27–28).

ʻI heʻetau moʻui kotoa ʻi he maama fakalaumālié, naʻa tau fakatupulaki ai hotau tuʻunga tangata pe fefiné mo fakalahi ʻa e ngaahi meʻa te tau malava fakalaumālié. Naʻe tāpuakiʻi kitautolu ʻaki ʻa e meʻa-foaki ʻo e tauʻatāina ke filí, ʻo tau fakahoko ai ha ngaahi fili mahuʻinga, hangē ko e fili ko ia ke muimui ʻi he palani ʻa e Tamai Hēvaní. Naʻe tokoniʻi ʻe he ngaahi fili ko ʻení ʻetau moʻuí ʻi he taimi ko iá pea mo e lolotongá ni. Ne tau tupulaki ʻi he potó mo ako ke manako ki he moʻoní, pea naʻa tau teuteu ke haʻu ki māmani, ke tau lava ʻo hokohoko atu ai ʻetau fakalakalaká.

Lekooti e Ngaahi Ongo ʻOkú ke Maʻú

Ngaahi Pōpoaki Lahi Ange