Elder Jay E. Jensen

I muri a’e i to’na raveraa e rave rahi mau mahana no te faaafaroraa i te hoê fifi a tavini ai oia ei peresideni no te Misioni no Colombia Cali, ua haamana‘o o Elder Jay Edwin Jensen, tei pii-hia-iho nei i roto i te Peresideniraa no te Hitu Ahuru, i te tatararaa i ta’na mau papa‘iraa mo‘a i to’na tere ho’iraa i te fare misioni.

Ua haru to’na mata i te hoê irava no roto mai i te Parau Haapiiraa e te Parau Fafau 3:5 : « E a haamana‘o atoa i te mau parau fafau i parauhia ia oe na ».

Ua parau o Elder Jensen e « I roto i te taatoaraa o te oraraa e faaruru tatou i te mau fifi, e au râ ra te faahaamana‘o mai nei te Fatu ia’u e e mea rahi a’e te mau fafauraa i te mau taime atoa ».

Ua haamata o Elder Jensen i te haapii no ni‘a i te mau fafauraa a te Fatu na roto i to’na na metua, o Ruel Whiting e Ethel Otte Jensen. Fanauhia i Mapleton, Utaha, Fenua Marite, i te 5 no Febuare 1942, o oia te 6raa o na 10 tamarii i roto i te hoê utuafare « i reira te evanelia i orahia ai e i haapiihia ai » ta’na ia parauraa.

I muri a‘e i to’na taviniraa i roto i te Misioni Paniora Marite mai te matahiti 1961 e tae atu i te matahiti 1963, ua faaipoipo oia ia Lona Lee Child i te 1 no Novema 1963 i te Hiero no Manti Utaha. E metua raua no na tamarii e ono. Ua noaa ia’na te mau parau tuite bachelor, master e doctora i te Fare Haapiiraa Teitei no Brigham Young.

I muri a’e i to’na haapiiraa i te haapiiraa evanelia, ua rave oia i te ohipa ei faatere no te mau haapiiraa na te mau haapiiraa evanelia e te mau haapiiraa evanelia na te feia paari api, ei faatere no te ohipa haapiipiiraa no te Piha Toro‘a a te mau Misionare, e ei faatere no te faatuatiraa i te mau papa‘iraa mo‘a i roto i te Piha Faanahoraa Haapiiraa a te Ekalesia.

Ua tavini o Elder Jensen ei episekopo, tauturu i roto i te Peresideniraa no te Pû Haapiipiiraa Misionare no Provo, melo no te apooraa teitei, faatere no te pŭpŭ tahu’a rahi, peresideni no te Feia Api Tane, orometua haapii no te Haapiiraa Sabati, e peresideni misioni. Ua piihia oia i roto i te Piti o te Pŭpŭ no te Hitu Ahuru i te 6 no Tiunu 1992 e i roto i te Pŭpŭ Matamua no te Hitu Ahuru i te 1 no Eperera 1995.

Te mea ta’na i haapii mai na roto i te hoê taime taviniraa i roto i to’na oraraa ua faahoho‘ahia ïa na taua ohipa tei tupu ia’na e te mau papa‘iraa mo‘a i to’na riroraa ei peresideni misioni. Ua parau oia e, « Te vai nei te mana i roto i te parau a te Atua ». Te ti‘aturi nei oia, mai Gidiona i roto i te Buka a Moromona, e ua riro ta’na mau parau « ei taviniraa » i te Arii e te mau melo no To’na ra Basileia (Mosia 22:4).