Te mana faito ore o te tia‘iraa

Te tia‘iraa o te hoê ïa avae o te hoê parahiraa toru avae ia amuihia oia i te faaroo e te aroha. Teie na e toru haapapûraa no to tatou oraraa noa’tu te paari e te faito ore o te mau tahua e farereihia e tatou i teie nei. E mea maramarama maitai e te papû hoi te mau papa‘iraa mo‘a no ni‘a i te faufaa o te parau o te tia‘iraa. Ua haapii mai te Aposetolo Paulo e, ua papa’ihia te mau papa’iraa mo‘a « ia noaa to tatou tia‘iraa ».¹

E mana to te tia‘iraa no te faaî i to tatou oraraa i te oaoa.² Aita ana‘e te reira—ia faataerehia te reira hinaaro o to tatou aau—« e faatimauu te aau ».³

Te tia‘iraa, e ô ïa na te Varua⁴—o te hoê ïa tia‘iraa e, na roto i te Taraehara a te Iesu Mesia e te mana o To’na Ti‘a-faahou-raa, e faati‘a ia tatou i te ora mure ore, e teie tumu o to tatou ïa faaroo i te Faaora.⁵ Tei huru tia‘iraa e horo‘a mai i te hoê parau haapiiraa no te fafauraa e te hoê faaueraa⁶ mai te mau faaueraa atoa—e hopoi‘a na tatou i te raveraa i te hoê tuhaa itoito no to tatou oraraa e ia tinai i te mau faahemaraa no te faaru‘e i te tia‘iraa. E arata‘i te tia‘iraa i roto i te faanahoraa no te oaoa a to tatou Metua aroha i te A’o ra i te hau⁷, te aroha⁸, te oaoa⁹, e te ruperupe¹⁰. Te tia‘iraa no te faaoraraa mai te hoê taupoo¹¹ paruru, e niu no to tatou faaroo,¹² e e tutauraa no to tatou varua.¹³

I roto i te mo‘emo‘e rahi o Moroni—noa’tu i muri a‘e i to’na iteraa i te mouraa o to’na nunaa—ua ti‘aturi o Moroni i te tia‘iraa. I te hopea o te nunaa o te Ati Nephi, ua papa‘i o Moroni e, ia ore te tia‘iraa, e ore e roaa ia tatou te ai‘araa i roto i te basileia o te Atua.¹⁴

Te faaite ra te mau papa‘iraa mo‘a e, ia vai « na pae e piti i te mau mea atoa ra »¹⁵ Mai te reira atoa ïa no te faaroo, te tia‘iraa, e te aroha. Te tapitapi, te ahoaho, e te manuïa ore ia aupuru i to tatou taata tupu, na te reira e arata‘i ia tatou i roto i te faahemaraa o te nehenehe hoi e faaere ia tatou i te mau haamaitairaa maitai e te faufaa rahi.

Te faaohipa nei te enemi i te ahoaho no te ruuruu i te aau e te varua i roto i te poiri ta‘ota‘o. E iriti te ahoaho i rapae ia tatou i te mau mea ora atoa e te poupou, ma te vaiiho mai i te mau mea au-ore o te oraraa. E taparahi pohe te ahoaho i te aau titau, e faaoioi i te ma‘i, e haaviivii i te varua, e e faata‘oto ho‘i i te aau. E au te ahoaho mai te hoê e‘a, hoê noa iho vahi ta’na e arata’i maori râ, i raro e a muri noa’tu.

Area te tia‘iraa ra, e au ïa mai te hihi mahana e ti‘a mai ra i ni‘a a‘e i te iriatai o to tatou huru oraraa i teie nei. E puta oia i roto i te poiri o te po‘ipo‘i. Na’na e faaitoito e e faauru ia tatou ia tuu i to tatou ti‘aturiraa i roto i te poihereraa here a te hoê Metua mure ore i te ao ra tei faaineine i te hoê rave‘a no te feia e imi nei i te parau mau mure ore i roto i te hoê ao tauiui noa, te taa ore e te ri‘ari‘a.

Na te huru o te reo e horo‘a i te huru-ê-raa e i te hohonuraa o te parau ti‘aturi. Hi‘oraa, e nehenehe te hoê aiu e ti‘aturi e horo‘ahia ta’na niuniu ha‘uti, e ti‘aturi te hoê taure‘are‘a e farii oia i te hoê niuniu na te hoê hoa taa ê e te hoê taata paari ra, e ti‘aturi ïa oia e faaea te niuniu i te ta‘i.

Te hinaaro nei au e paraparau i teie mahana i te tia‘iraa o te haere i ô mai i te fifi, e o te faatumu i ni‘a i te ti‘aturiraa o Iseraela,¹⁶ te tia‘iraa rahi a te taata nei, oia to tatou Faaora o Iesu Mesia.

E ere te tia‘iraa i te iteraa,¹⁷ area râ te ti‘aturiraa e, e faatupu te Fatu i Ta’na mau fafauraa i fafau mai no tatou. Te ti‘aturi nei au e mai te mea e ora tatou i te mau ture a te Atua e te mau parau a Ta’na mau peropheta teie nei, e farii ïa tatou i te mau haamaitairaa i hinaarohia a muri a‘e.¹⁸ O te ti‘aturiraa ïa e te tia‘iraa e, e pahonohia mai ta tatou mau pure. E itehia te reira i roto i te ti‘aturiraa, te mana‘o papû, te anaanatae, e te tutava-tamau-raa ma te faaoroma‘i.

I roto i te parau o te evanelia, teie huru tia‘iraa, e tia‘iraa papû ïa, te aueue ore, e te ohipa. Ua parau te mau peropheta no mutaa ihora i te parau no te « ti‘aturi aueue ore »¹⁹ e te « mana‘o ora »²⁰ E tia‘iraa ïa o te faahanahana i te Atua na roto i te ohipa maitai. Na roto i te tia‘iraa e tupu mai ai te poupou e te oaoa.²¹ Na roto i te tia‘iraa, e nehenehe tatou e « haamahu e ia faaoroma‘i… i to [tatou] mau pohe ra ».²²

Te mau mea ta tatou e tia‘i nei no te mau ohipa ïa e tupu mai a muri a‘e. Ahiri pa‘i e nehenehe ta tatou e hi‘o i ô mai i te reni hopea o te tahuti nei i roto i te mau mea e tia‘i maira ia tatou i ô mai i teie nei oraraa. E nehenehe anei ta tatou e feruri i te hoê oraraa a muri a‘e hau atu i te hanahana i tei faaineinehia e to tatou Metua i te Ao ra no tatou ? Na roto i te tusia a Iesu Mesia aita e titauhia ia tatou ia mata‘u, i te mea e, e ora tatou e a muri noa’tu, e ore e pohe faahou.²³ Na roto i Ta’na Taraehara mure ore, e nehenehe tatou e tamâhia i te hara e ia ti‘a ma te viivii ore e te mo‘a i mua i te auri o te haavaraa.²⁴ O te Faaora te Tumu no to tatou Faaoraraa.²⁵

Eaha te huru oraraa e nehenehe ta tatou e tia‘i ? O ratou o te haere mai i te Mesia ra, e e tatarahapa i ta ratou mau hara, e e ora ma te faaroo, e ora ïa ratou i roto i te hau e a muri noa’tu. A feruri na i te faufaa o teie nei horo‘a mure ore. Ma te haaatihia e te feia o ta tatou i here, e ite tatou i te auraa o te oaoa hopea a rahi noa ai to tatou ite e te oaoa. Noa’tu te pe‘ape‘a o teie pene o to tatou oraraa i teie mahana, na roto i te oraraa e te tusia a Iesu Mesia, e nehenehe ta tatou e tia‘i e e haapapû e, te faaotiraa o te buka o to tatou oraraa, e hau atu ïa i te rahi i ta tatou mau tia‘iraa rahi a‘e. « O te mau mea, aore i hi‘ohia e te mata ra, aore i faaroohia e te taria ra, aore hoi i ô i roto i te aau o te taata ra, o ta te Atua ïa i vaiiho no te feia i hinaaro ia’na ra ».²⁶

Na te mau mea ta tatou e ti‘aturi nei e paturu ia tatou i roto i to tatou oraraa i te mau mahana atoa. Na te reira e paturu ia tatou i roto i te mau tamataraa, te mau faahemaraa, e te oto. Ua farii paatoa tatou i te mana‘o haaparuparu e i te fifi. Te vai ra te tahi mau taime e mea teimaha mau te poiri. I roto i taua huru taime ra te parau tumu hanahana o te faaho‘i-raa-hia mai te evanelia ta tatou e ti‘aturi nei, e nehenehe e paturu ai ia tatou e ia amo ia tatou e tae roa’tu ua haere faahou tatou i roto i te maramarama.

Te tia‘i nei tatou ia Iesu te Mesia, i te maitai o te Atua, i te faaururaa a te Varua Mo‘a, i te iteraa e, e faaroohia e e pahonohia te mau pure. No te mea ho‘i e, ua haapa‘o maitai te Atua e ua tape‘a i Ta’na mau fafauraa i mutaa iho ra, e nehenehe ta tatou e tia‘i ma te ti‘aturi papû e tape‘a te Atua i Ta’na mau fafauraa no tatou i teie tau e i te tau a muri a‘e. I te mau taime pe‘ape‘a, e nehenehe ta tatou e tape‘a paari i ni‘a i te tia‘iraa e, « e ohipa amui mai te mau mea atoa ei maitai no [tatou] »²⁷ a pee ai tatou i te a‘o a te mau peropheta a te Atua. Teie huru tia‘iraa i roto i te Atua, To’na maitai, e To’na mana, na te reira e horo‘a faahou ia tatou i te itoito i roto i te mau titauraa fifi, e ia horo‘a i te puai i te feia e mana‘o ra e, tei rotopu ratou i te mau papa‘i o te mata‘u, o te mana‘o tapitapi, e o te ahoaho.

Ua haapii tatou ia faahotu i te tia‘iraa mai te huru i to tatou haapiiraa ia haere, hoê taahiraa i te taime hoê. Ia tai‘o ana‘e tatou i te mau papa‘iraa mo‘a, ia paraparau ana‘e tatou i to tatou Metua i te Ao ra i te mau mahana atoa, ia fafau ana‘e tatou e haapa‘o i te mau faaueraa a te Atua, mai te parau paari, e te aufauraa i te hoê tuhaa ahuru ti‘a, ua roaa ïa ia tatou te tia‘iraa.²⁸ E tupu tatou i te rahi i roto i te ite « ia rahi to [tatou] ti‘aturi i te mana o te Varua Maitai ra »²⁹ na roto i to tatou « haapa‘o-maitai-roa-raa » i te evanelia.

Te vai ra te tahi taime e titauhia ia tatou ia rave i te hoê faaotiraa teimaha no te tia‘i, noa’tu e, te faaite ra te mau mea atoa e, aita e nehenehe. Mai to tatou Metua o Aberahama, « o tei ore hoi i haapa‘o ra e aore e tia‘iraa, faaroo atura ïa ma te tia‘i ».³⁰ E aore ra, mai te hoê taata tei papa’i e, « i roto i te pu‘e tau to‘eto‘e, e iteahia ia tatou i roto ia tatou iho, te hoê pû‘e tau mahanahana fati ore ».³¹

E faateitei te faaroo, te tia‘iraa e te aroha i te tahi e te tahi, e ia tupu te tahi i te rahi ra, e rahi atoa ïa te tahi. No roto mai te tia‘iraa i te faaroo³² no te mea, aita ana‘e e faaroo, aita ïa e tia‘iraa.³³ Mai te reira atoa te faaroo, no roto mai ho‘i te reira i te tia‘iraa, no te mea, te faaroo, « o te ti‘aturi ïa i te mau mea e tia‘ihia nei ».³⁴

E mea faufaa te tia‘iraa no te faaroo e no te aroha. Ia faaino ana‘e te haapa‘o ore, te mauruuru ore, e te faataere i te faaroo, na te tia‘iraa e paturu i to tatou faaroo. Ia haafifi ana‘e te inoino e te faaoroma‘i ore i te aroha, na te tia‘iraa e faaitoito i to tatou mana‘o itoito e e faaitoito ia tatou ia aupuru i to tatou taata tupu ma te tia‘i ore i te haamauruururaa. Rahi noa’tu to tatou tia‘iraa, rahi noa’toa’tu to tatou faaroo. Paari noa’tu to tatou tia‘iraa, rahi noa’toa’tu to tatou aroha.

Na te mau mea ta tatou e tia‘i nei e faatupu i te faaroo i roto ia tatou, area te mau mea ta tatou e ti‘aturi nei, e faatupu ïa te reira i te aroha. Na taipe e toru—te faaroo, te ti‘aturiraa e te aroha³⁵—faaohipa amui ana‘e ma te niuhia i ni‘a i te parau mau e te maramarama o te evanelia i faaho‘ihia mai a Iesu Mesia ra, na te reira e arata‘i ia tatou ia rahi i roto i te ohipa maitai.³⁶

I te mau taime atoa e haapa‘ohia te tia‘iraa, e tupu mai te ti‘aturi e te tia‘iraa rahi a‘e. E nehenehe ta‘u e feruri i te mau hi‘oraa e rave rahi i roto i to‘u oraraa a haapii ai au i te auraa o te mana o te tia‘iraa. Te haamana‘o maitai nei au i te mau mahana o to‘u apîraa a haaatihia au i te mau ino e te ahoaho o te hoê tama‘i na te ao atoa nei, te oreraa te mau rave‘a e roaa ai te ite, e te mau fifi o te oraraa pae tino, e te titauraa teimaha e te pe‘ape‘a o te ti‘araa taata tipee. Te hi‘oraa o to matou metua vahine, noa’tu te fifi rahi, no te haere i mua, e te faaohiparaa i te faaroo e te tia‘iraa, eiaha te haape‘ape‘a noa e aore ra te faatupuraa i te hinaaro ua riro ra ei patururaa i to matou utuafare e ia‘u nei, e ua horo‘a mai i te ti‘aturiraa e, te mau huru o taua taime ra, e riro mai ïa ei mau haamaitairaa a muri a‘e.

Na roto i teie mau iteraa, ua ite au e, na te evanelia a Iesu Mesia e to tatou riroraa ei melo i roto i te Te Ekalesia a Iesu Mesia i te Feia Mo‘a i te Mau Mahana Hopea nei, e haapuai i te faaroo, e horo‘a mai i te tia‘iraa rahi a‘e, e e horo‘a ia tatou te aroha.

Na te tia‘iraa e paturu ia tatou i roto i te mau taime ahoaho. Te haapii nei te tia‘iraa e, te vai ra te tumu e oaoa ai tatou, noa’tu e, ua hope te mau mea ino atoa i te haaati ia tatou.

Te apiti nei au ia Ieremia no te parau e, « e ao to te taata… i ti‘aturi ia Iehova ».³⁷

Te apiti nei au ia Ioela no te faaite papû e « [ua] riro râ Iehova ei haapûraa no to’na ra mau taata, e ei pare no te mau tamarii a Iseraela ».³⁸

Te apiti nei au ia Nephi i te parauraa e, « ia haere ti‘a’tu outou i mua i te ti‘a-maite-raa i te Mesia, ma te tia‘i papû roa, e te here i te Atua e te taata atoa. E tena na, ia haere ti‘a outou i mua ma te oaoa i te ite i te parau a te Mesia, ma te tape‘a ho‘i e tae noa’tu i te hopea ra, inaha… te na ô maira te Metua, e ora mure ore to outou i reira ».³⁹

Teie te huru o te tia‘iraa e titauhia ia tatou ia poihere e ia faahotu. Teie nei huru tia‘iraa paari, na roto mai ïa i to tatou Faaora o Iesu Mesia, no te mea, « e te taata atoa tei ia’na taua tia‘iraa’tu ia’na ra, te haamaitai ra ïa ia’na iho, mai [te Faaora] atoa e maitai ra ».⁴⁰

Ua horo‘a mai te Fatu ia tatou nei i te hoê parau haapapûraa no te tia‘iraa: « Eiaha e horuhoru te aau e te nana iti e ».⁴¹ E tia‘i mai te Atua ma « te rima-faatoro-noa-hia e ite mai »⁴² i te feia e haapae i ta ratou mau hara, e o te tamau noa i roto i te faaroo, te tia‘iraa, e te aroha.

E i te feia atoa tei mauiui—i te feia atoa tei paruparu, tei pe‘ape‘a, e aore ra, tei vai otahi noa—te parau nei au ma te here e te mana‘ona‘o ia outou, eiaha roa’tu e tuu.

Eiaha e faaru‘e.

Eiaha roa’tu e vaiiho i te ahoaho ia upooti‘a i ni‘a i to outou varua.

A tape‘a e a ti‘aturi i te tia‘iraa a Iseraela, i te mea e, e patia te here o te Tamaiti a te Atua i te mau poiri atoa, e tamaru ho‘i i te mau oto atoa, e e faaoaoa ho‘i i te mau aau atoa.

Te faaite papû nei au i te reira e te vaiiho atu nei au i ta‘u haamaitairaa na roto i te i‘oa o Iesu Mesia ra, amene.