Ua paraparau mai ratou ia tatou

« Ia riro tatou ei mau taata maitai roa i roto i to tatou iho fenua, e ei mau taata tupu mai-tai i roto i to tatou mau vahi faaearaa, e ia tauturu hoi i te feia o te tahi atu mau faaroo, e o ta tatou iho faaroo ». —Peresideni Thomas S. Monson (a hi‘o api 106).

« I rotopu i te mau tamarii a te Atua, ua hau a‘e te mau mea i tuati te mana‘o i te mau mea i taa’e ai te mana‘o… E tauturu te Atua ia outou ia hi‘o i rot ratou mau taa’eraa eiaha ei tumu no te riri, ei tautururaa râ. E nehenehe te Fatu e tauturu ia outou ia hi‘o e ia haafaufaa i te mea ta te tahi atu mau taata i horo‘a mai, e aita ta outou ». Peresideni Henry B. Eyring (a hi‘o api 68).

« Ia tai‘o ana‘e tatou i te mau papa‘iraa mo‘a, ia paraparau ana‘e tatou i to tatou Metua i te Ao ra i te mau mahana atoa, e ia fafau ana‘e tatou e haapa‘o i te mau faaueraa a te Atua… e roaa ïa ia tatou te ti’aturiraa ». —Peresideni Dieter F. Uchtdorf (a hi‘o api 21).

Ua haapii mai te peresideni Henry B. Eyring ia patu te hoêraa na roto i te parau maitai te tahi i te tahi : « Te fafau atu nei au e, e farii outou i te hau e te oaoa mai te mea e, e parau outou i te parau maitai no ni‘a ia vetahi ê i roto i te maramarama o te Mesia (a hi‘o api 68).

« E te feia apî, e ere te [pureraa oro’a] i te taime aparauraa i roto i te niuniu afaifai e aore ra i te haponoraa i te parau na roto i te niuniu afaifai », te na reira ra o Elder Dallin H. Oaks (a hi’o api 17).

Ua parau o Elaine S. Dalton, « ua ite papû vau e, te hoê tamahine e aore ra, te hoê tamaroa peu maitai, tei arata‘ihia e te Varua, e nehenehe ta’na e taui i te ao nei, tera râ, no te faatupuraa i te reira, e ti‘a ia tatou ia ho‘i i roto i te peu maitai » (a hi‘o api 78).

No te tai’o i te mau iteraa o te feia apî no ni‘a i te amuiraa, a hi‘o i te newera.lds.org.

Ua faati‘a mai te peresideni Boyd K. Packer e rave rahi mau ati tei farereihia e te feia mo’a i te matamua ra (a hi‘o api 88). E mea nahea to ratou faaroo i te haapuairaa ia ratou i roto i taua mau ati ra ? E mea nahea e ti’a ai i to outou faaroo ia haapuai ia outou ? (No te tahi atu mau mana‘o, a hi‘o i te a‘oraa a Elder Robert D. Hales i te api 72)

Ua faaite mai o Elder D. Todd Christofferson e toru mea e titauhia ia tatou no te riroraa ei nunaa no Ziona (a hi‘o api 37). A hamani i te hoê tapura no te mau rave‘a e ti‘a ai ia outou ia haere i mua i roto i taua mau tuahaa ra.

Ua a‘o mai o Elder M. Russell Ballard e o Silvia H. Allred no ni‘a i te haaparareraa i te evanelia i roto i te mau nunaa atoa o te fenua nei (a hi‘o i te mau api 81 e te 10). I roto atoa i ta’na a‘oraa omuaraa, ua parau te peresideni Thomas S. Monson e, « te ani nei au ia outou ia pure ia iritihia te uputa o teie mau fenua [aita tatou e fariihia ia poro i te evanelia i reira], ia ti‘a ia tatou ia afai atu i te oaoa o te evanelia ia ratou ». Te haamana‘o ra paha outou ua ani atoa mai te peresideni Spencer W. Kimball (1895–1985) i taua aniraa ra, a faaite i to outou iho iteraa ia au i taua aniraa ra. Eaha ta outou i ite no ni‘a i te tupuraa o te Ekalesia i roto i to outou iho fenua ? A paraparau i to outou utuafare no ni‘a i te mau rave‘a e ti‘a ai i te evanelia ia porohia i roto i te tahi atu mau fenua.

Noa’tu te huru o te ati ta tatou e farerei, eita te Metua i te Ao ra e vaiiho otahi noa ia tatou (a hi‘o i te mau a‘oraa i te api 21, 29, 32, 41, 75, e te 102). E mea nahea to outou iteraa i te Metua i te Ao ra i te pahonoraa i ta outou mau pure i roto i te mau taime fifi ?