“Lakanga Taulaʻeiki Faka-Melekisētekí,” Ngaahi Tefitó mo e Ngaahi Fehuʻí (2023)
Fakahinohino ki hono Ako ʻo e Ongoongoleleí
Lakanga Taulaʻeiki Faka-Melekisētekí
Ko e mālohi mo e mafai ʻo e ʻOtuá ke tāpuakiʻi ʻEne fānaú
ʻOku mateuteu ʻa e Tamai Hēvaní ke tokoniʻi koe ke ke maʻu ha mālohi fakalaumālie mo ha fakahinohino ʻi hoʻo hala fononga ki he moʻui taʻengatá. ʻOku fakaʻatā ʻe he mafai ʻo e lakanga fakataulaʻeiki ʻo e ʻOtuá ke lava ‘o maʻu ʻa e ngaahi tāpuaki ko ʻení ʻe he fānau kotoa ʻa e ʻOtuá ʻoku fili ke haʻu kiate Iá. Naʻe akoʻi ʻe he Palōfita ko Siosefa Sāmitá: “Ko e Lakanga Taulaʻeiki Faka-Melekisētekí … ko e halanga ia ʻoku fakahā mai ai ʻa e ʻiló, tokāteliné, palani ʻo e fakamoʻuí, pea mo e meʻa mahuʻinga kotoa pē mei he langí.”1 ʻI he mālohi ʻo e Lakanga Taulaʻeiki Faka-Melekisētekí, ʻe lava ai ke [fakahoko] ʻe he ngaahi foha mo e ngaahi ʻofefine kotoa ʻo e ʻOtuá ha ngaahi fuakava mo maʻu ʻa e ngaahi ouau ʻokú ne tokoniʻi kinautolu ke nau hoko ʻo hangē ko e Tamai Hēvaní mo Sīsū Kalaisí (vakai, Tokāteline mo e Ngaahi Fuakava 76:52–60; 84:19–22).
Ko e Hā ʻa e Lakanga Taulaʻeiki Faka-Melekisēteki?
Ko e lakanga fakataulaʻeikí ko e mālohi mo e mafai taʻengata ia naʻe fakatupu mo puleʻi ʻaki ʻe he ʻOtuá ʻa e ngaahi langí mo e māmaní. ʻOku ʻi ai ha lakanga fakataulaʻeiki ʻe ua ʻi he Siasi ʻo Sīsū Kalaisí: ko e Faka-ʻĒlone mo e Faka-Melekisēteki. Ko e Lakanga Taulaʻeiki Faka-Melekisētekí ko e lakanga fakataulaʻeiki māʻolunga pe lahi angé ia pea kuo foaki maʻu pē ia ki he kau tamaioʻeiki ʻa e ʻOtuá ʻi he taimi naʻe ʻi māmani ai ʻa e kakato ʻo e ongoongoleleí. ʻI he ngaahi kī ʻo e lakanga fakataulaʻeikí mo e mafai fakataulaʻeiki ‘oku foakí, ʻoku fakamafaiʻi ai ʻa e kau tamaioʻeiki ʻa e ʻOtuá ke nau malanga ʻaki ʻa e ongoongoleleí, fakahoko ʻa e ouau ʻo e fakamoʻuí mo e hākeakiʻí, mo puleʻi ʻa e puleʻanga ʻo e ʻOtuá ʻi māmani.
Vakai fakalūkufua ki he tefitó: Lakanga Taulaʻeiki Faka-Melekisētekí
Ngaahi fakahinohino ʻoku fekauʻaki mo e ako ʻo e ongoongoleleí: Lakanga Taulaʻeiki Faka-ʻĒloné, Ngaahi Kī ʻo e Lakanga Fakataulaʻeikí, Ko Hono Fakafoki Mai ʻo e Lakanga Fakataulaʻeikí
Konga 1
ʻOku Foaki ʻe he ʻOtuá ʻa e Mafai mo e Mālohi ʻo e Lakanga Fakataulaʻeikí ki Heʻene Kau Tamaioʻeikí
ʻI he hisitōliá kotoa, kuo foaki ai ʻe he ʻOtuá ʻa e mafai ʻo e lakanga fakataulaʻeikí ki Heʻene kau tamaioʻeikí ke ngāue ʻi Hono huafá pea tokoni ʻi he fakamoʻui mo e hākeakiʻi ʻo ʻEne fānaú. Naʻe akoʻi ʻe Siosefa Sāmita, “Naʻe maʻu ʻe he kau palōfitá kotoa ʻa e Lakanga Taulaʻeiki Faka-Melekisētekí.”2
ʻI he kuonga muʻá, naʻe ui ʻa e lakanga fakataulaʻeikí ko e “Lakanga Fakataulaʻeiki Toputapu ʻi he Lakanga ʻo e ʻAlo ʻo e ʻOtuá. Ka ko e meʻa pē ke fakaʻapaʻapa pe ʻapasia ai ki he huafa ʻo e ʻOtua Fakalevelevá, koeʻuhi ke ʻoua naʻa fuʻu tuʻo lahi ʻa hono lea ʻaki ʻa [e] huafa [ʻo e ʻEikí],” naʻe ui ʻa e lakanga fakataulaʻeikí ko e “Lakanga Taulaʻeiki Faka-Melekisēteki” (Tokāteline mo e Ngaahi Fuakava 107:3–4). Ko Melekisētekí ko ha taulaʻeiki lahi mo ha palōfita angatonu ʻi he lolotonga ʻo e kuonga ʻo e Fuakava Motuʻá. ʻI he lea faka-Hepeluú, ko e hingoa Melekisētekí ʻoku ʻuhinga ia ko e “tuʻi ʻo e māʻoniʻoni” (Fakahinohino ki he Ngaahi Folofolá, “Melekisēteki,” Gospel Library).
ʻOku tau ʻilo ʻi he Fuakava Foʻoú, naʻe fakanofo ʻe Sīsū ʻEne kau ākongá mo foaki kiate kinautolu ʻa e mafai ʻo e lakanga fakataulaʻeikí (vakai, Luke 9:1–2; Sione 15:16; Hepelū 5:1–10). ʻI he Moʻunga ʻo e Liliú, naʻe maʻu ai ʻe Pita, Sēmisi, mo Sione ʻa e ngaahi kī ʻo e lakanga fakataulaʻeikí. ʻI he ngaahi kī ko iá, naʻe maʻu ai ʻe he kau ʻAposetoló ʻa e mafai ke hokohoko atu e ngāue ʻa e Siasi ʻo Kalaisí ʻi he hili ʻo ʻEne Hāʻele Haké (vakai, Fakahinohino ki he Ngaahi Folofolá, “Liliú,” Gospel Library; vakai foki, Mātiu 16:15–19; 17:1–9; Ngāue 1:21–26; ʻEfesō 4:11–13).
ʻI he ngaahi senituli hili e pekia ʻa e kau ʻAposetolo ʻa e ʻEikí, naʻe mole ai ʻa e mafai ʻo e lakanga fakataulaʻeikí mei māmani. ʻI hotau kuongá, naʻe fakafoki mai ʻa e Lakanga Taulaʻeiki Faka-Melekisētekí ʻia Pita, Sēmisi, mo Sione ki he Palōfita ko Siosefa Sāmitá mo ʻŌliva Kautele (vakai, Tokāteline mo e Ngaahi Fuakava 27:12–13; Siosefa Sāmita—Hisitōlia 1:72). Naʻe foaki kimui ange ʻe ha kau talafekau fakalangi kehe ʻa e ngaahi kī ʻo e lakanga fakataulaʻeikí kiate kinautolu ʻi he Temipale Ketilaní ʻi ʻOhaiō, USA (vakai, Tokāteline mo e Ngaahi Fuakava 110:11–16).
Ngaahi meʻa ke fakakaukau ki ai
-
Naʻe fakahā ʻe Palesiteni Tāleni H. ʻOakesi ʻo pehē, “Ko e lakanga fakataulaʻeikí ko ha mālohi mo ha mafai fakalangi ia kuo tuku mai ki he ngāue ʻa e ʻOtuá ki he lelei ʻEne fānaú kotoa. ʻOku ʻikai ko e lakanga fakataulaʻeikí ʻa kinautolu kuo fakanofo ki ha tuʻunga ʻi he lakanga fakataulaʻeikí pe ko kinautolu ʻoku nau ngāue ʻaki hono mafaí. ʻOku ʻikai ko e lakanga fakataulaʻeikí ʻa e houʻeiki tangata ʻoku nau maʻu e lakanga fakataulaʻeikí. Neongo ʻoku ʻikai totonu ke tau ui ʻa e houʻeiki tangata kuo fakanofó ko e lakanga fakataulaʻeikí ia, ka ʻe lelei ke tau ui kinautolu ko e kau maʻu lakanga fakataulaʻeiki.3 Ko e hā ʻoku mahuʻinga ai ke fakafaikehekeheʻi ʻa e lakanga fakataulaʻeikí mo e kau maʻu lakanga fakataulaʻeikí?
ʻEkitivitī ki he ako mo e niʻihi kehé
-
Naʻe pehē ʻe Palesiteni Kōtoni B. Hingikelī, “ʻOku ʻi heni ʻa e lakanga fakataulaʻeikí. … ʻOku tau ʻiloʻi, he kuo tau mamata, ki he mālohi ʻo e lakanga fakataulaʻeiki ko ʻení. Kuo tau mamata ki he fakamoʻui ʻo e mahakí, ki he ʻeveʻeva ʻa e pipikí, pea mo e maʻu ʻo e māmá mo e mahinó ʻe kinautolu naʻe ʻi he fakapoʻulí.”4 Ko e hā ha ngaahi fakamoʻoni kuó ke mamata ai ʻoku ngāue ʻa e mālohi mo e mafai ʻo e lakanga fakataulaʻeiki ʻa e ʻOtuá ʻi he Siasi ʻo Sīsū Kalaisí ʻi hotau kuongá ni?
Ako lahi ange
-
ʻAlamā 13:14–19; Tokāteline mo e Ngaahi Fuakava 84:23–26; 107:2–8, 18, 42–52
-
“Vahe 8: Ko e Lakanga Fakataulaʻeiki Taʻengatá,” Ngaahi Akonaki ʻa e Kau Palesiteni ʻo e Siasí: Siosefa Sāmita (2011), 117–29
Konga 2
Te Ke Lava ʻo Teuteu ke Foki ki he ʻAo ʻo e ʻOtuá ʻo fakafou ʻi he Ngaahi Fuakava mo e Ngaahi Ouau ʻo e Lakanga Taulaʻeiki Faka-Melekisētekí
Naʻe akoʻi ʻe Palesiteni Pilikihami ʻIongi, “Ko e Ongoongoleleí pea mo e Lakanga Fakataulaʻeikí [ko e founga ia ʻoku fakaʻaongaʻi ʻe he ʻOtuá] ke fakamoʻui pea mo hākeakiʻi ʻEne fānau talangofuá, ke nau maʻu fakataha mo [Ia] ʻa e nāunau pea mo e mālohi tatau ke fakakalauni ʻaki kinautolu ʻa e kalauni ʻo e nāunaú, moʻui taʻe-faʻa-maté pea mo e moʻui taʻengatá.”5 Te tau lava ‘o fai ha ngaahi fuakava mo e ‘Otuá pea mo maʻu ‘a e ngaahi ouau toputapu ʻoku fiemaʻú ke maʻu ʻa e moʻui taʻengatá ʻi he malumalu ʻo e fakahinohino ʻa kinautolu ʻoku nau maʻu ʻa e ngaahi kī ʻo e Lakanga Taulaʻeiki Faka-Melekisētekí.
Ngaahi meʻa ke fakakaukau ki ai
-
Ko e taimi ʻoku maʻu ai ʻe ha tangata ʻa e Lakanga Taulaʻeiki Faka-Melekisētekí pea fakanofo ki ha tuʻunga ʻi he lakanga fakataulaʻeikí, ʻokú ne fakahoko ai ʻa e “fakapapau mo e fuakava ʻo e lakanga fakataulaʻeikí.” Lau ʻa e Tokāteline mo e Ngaahi Fuakava 84:33–44. Ko e hā ʻa e ngaahi meʻa ʻoku fuakava ha taha maʻu lakanga fakataulaʻeiki ke ne fakahokó? Ko e hā ha talaʻofa fakalangi ʻoku fai ʻe he ʻOtuá kiate kinautolu ʻoku nau maʻu mo fakahoko totonu honau uiuiʻí?
ʻEkitivitī ki he ako mo e niʻihi kehé
-
Fakaafeʻi ʻa e kau mēmipa hoʻo kulupú ke nau lau ʻa e Tokāteline mo e Ngaahi Fuakava 84:17–22 pea aleaʻi ʻa e meʻa naʻe fakahā ʻe he ʻEikí fekauʻaki mo e lakanga fakataulaʻeikí. Ke fakamahinoʻi ʻa e ʻuhinga ʻo e potufolofolá, fakakaukau ke fakamatalaʻi ko e “ngaahi meʻa lilo ʻo e puleʻangá” ko ha “ngaahi moʻoni fakalaumālie ʻoku toki ʻiloʻi pē ʻi he fakahā” (Fakahinohino ki he Ngaahi Folofolá, “Ngaahi Meʻa Lilo ʻa e ʻOtuá,” Gospel Library). Mahalo naʻa ala ʻaonga ke fakamatalaʻi ko e mālohi ʻo e anga faka-ʻOtuá ko e mālohi ia ʻo e anga māʻoniʻoni, ʻoku tau lava ai ʻo ʻilo ʻa e ʻOtuá pea hoko ʻo tatau mo Ia (vakai, Bruce R. McConkie, The Promised Messiah [1978], 589). Ko e hā ha ngaahi founga ʻe lava ke tataki ai kitautolu ʻe he ngaahi ouau toputapú ke mahino kiate kitautolu ʻa e ʻOtuá mo teuteuʻi kitautolu ke tau tatau lahi ange mo Ia?
Ako lahi ange
-
Henry B. Eyring, “Ngaahi Fāmili kuo Fakafuakavaʻí,” Liahona, Mē 2012, 62–65
-
Kent F. Richards, “Ko e Mālohi ʻo e Anga Faka-ʻOtuá,” Liahona, Mē 2016, 118–20
-
Julie B. Beck, “Ko ha Taumalingi Mai ʻa e Ngaahi Tāpuakí,” Liahona, Mē 2006, 11–13
-
“Ko e Lakanga Fakataulaʻeiki Māʻoniʻoní—ke Faitāpuekina e Fānau ʻa e ʻOtuá,” Ngaahi Akonaki ʻa e Kau Palesiteni ʻo e Siasí: Siaosi ʻAlipate Sāmita (2011), 49–58
Konga 3
ʻOku Fakatou Ngāue ʻa e Houʻeiki Fafiné mo e Houʻeiki Tangatá ʻi he Siasi ʻo Kalaisí ʻaki ʻa e Mafai mo e Mālohi ʻo e Lakanga Fakataulaʻeikí
ʻOku fakatou ui ʻe he ʻOtuá ʻa e houʻeiki fafine mo e houʻeiki tangata ʻi Hono Siasí ke nau tokoni ʻi he ngāue mahuʻinga ʻo e fakamoʻuí mo e hākeakiʻí. Neongo ko e houʻeiki tangatá pē ʻoku fakanofo ki he ngaahi tuʻunga ʻo e lakanga fakataulaʻeikí, ka ʻoku ʻatā e mafai mo e mālohi ʻo e lakanga fakataulaʻeikí ki he houʻeiki fafiné mo e houʻeiki tangatá fakatouʻosi, ke tokoni ke nau fakahoko e ngāue ʻa e ʻOtuá. ʻOku maʻu fakafoʻituitui ʻa e mālohi ʻi he lakanga fakataulaʻeikí ʻi he taimi ʻoku tauhi totonu ai ʻe he kau mēmipa ʻo e Siasí ʻa ʻenau ngaahi fuakava mo e ʻEikí. ʻOku vaheʻi ʻa e niʻihi fakafoʻituituí ke nau ngāue ʻi he ngaahi uiuiʻi faka-Siasí ʻo fakatatau mo e fakahinohino ʻa e tokotaha ʻokú ne maʻu ʻa e ngaahi kī ʻo e lakanga fakataulaʻeikí. ʻOkú ne maʻu ʻa e mafai ʻo e lakanga fakataulaʻeikí ke fakahoko ʻa e ngaahi fatongia kuo vahe angé, ʻi he hilifaki ʻo e nimá. (Vakai, Dallin H. Oaks, “Ko e Ngaahi Kī mo e Mafai ʻo e Lakanga Fakataulaʻeikí,” Liahona, Mē 2014, 50–51).
Ngaahi meʻa ke fakakaukau ki ai
-
Naʻe akoʻi ʻe ʻEletā M. Lāsolo Pālati: “ʻOku mohu ʻaloʻofa ʻetau Tamai Hēvaní ʻaki Hono mālohí. ʻOku lava ke maʻu ʻe he houʻeiki tangata mo fafine kotoa ʻa e mālohi ko ʻení ke tokoni ʻi heʻenau moʻuí. ʻE lava ke maʻu ʻe kinautolu kotoa kuo nau fai e fuakava toputapu mo e ʻEikí pea fakaʻapaʻapaʻi e ngaahi fuakava ko iá ha fakahā fakatāutaha, ke faitāpuekina ʻi he tauhi mai ʻa e kau ʻāngeló, ke fefolofolai mo e ʻOtuá, ke maʻu ʻa e kakato ʻo e ongoongoleleí, pea ko hono tumutumú, ke hoko ʻa e kau ʻea-hoko fakataha mo Sīsū Kalaisi, ki he meʻa kotoa ʻoku ʻa ʻetau Tamaí.”6 Ko e hā ʻoku mahuʻinga ai ke ʻiloʻi ʻoku ʻikai makatuʻunga e ngaahi tāpuaki toputapú ʻi he fakanofo ʻo ha taha ki ha tuʻunga ʻi he lakanga fakataulaʻeikí?
Ngaahi ʻekitivitī ki he ako mo e niʻihi kehé
-
Lau fakataha mo e kau mēmipa hoʻo kulupú ʻa e fakamatala ko ʻeni naʻe fai ʻe Palesiteni Lāsolo M. Nalesoní:
“ʻE lava ke maʻu hangatonu ʻe he fefine mo e tangata kotoa ʻokú ne fai ha fuakava mo e ʻOtuá pea tauhi ʻa e ngaahi fuakava ko iá, pea moʻui taau ʻo kau atu ʻi he ngaahi ouau ʻo e lakanga fakataulaʻeikí, ʻa e mālohi ʻo e ʻOtuá. ʻOku maʻu ʻe kinautolu kuo fakakoloaʻi ʻi he fale ʻo e ʻEikí ha meʻafoaki ʻo e mālohi ʻo e lakanga fakataulaʻeiki ʻo e ʻOtuá ʻi heʻenau fuakavá fakataha mo ha meʻafoaki ʻo e ʻilo ʻa e founga ke maʻu ai ʻa e mālohi ko iá.
“ʻOku fakaava tatau mai pē ʻa e langí ki he houʻeiki fafine ʻoku fakakoloaʻi ʻaki e mālohi ʻo e ʻOtuá ʻa ia ʻoku tafe mai mei heʻenau ngaahi fuakava ʻo e lakanga fakataulaʻeikí, ʻo hangē pē ko ia ki he houʻeiki tangata ʻoku nau maʻu ʻa e lakanga fakataulaʻeikí.”7
Aleaʻi ʻa e founga ʻe lava ai ha mēmipa moʻui taau ʻo e Siasí ke fakaʻaongaʻi ʻa e mālohi ʻo e ʻOtuá.
Ako lahi ange
-
Russell M. Nelson, “Ngaahi Koloa Fakalaumālié,” Liahona, Nōvema 2019, 76–79
-
Dallin H. Oaks, “Ko e Ngaahi Kī mo e Mafai ʻo e Lakanga Fakataulaʻeikí,” Liahona, Mē 2014, 49–52
-
Jean B. Bingham, “Faaitaha ʻi hono Fakahoko e Ngāue ʻa e ʻOtuá,” Liahona, Mē 2020, 60–63