Fakafoki Mai ʻo e Ongoongoleleí

Naʻe mole ha ngaahi konga mahuʻinga lahi ʻo e ongoongolelei ʻo Sīsū Kalaisí hili e pekia ʻEne Kau ʻAposetoló. ʻOku faʻa ui e kuonga ko ʻeni ʻo e hē mei he ongoongolelei moʻoní ko e Hē Lahi mei he Moʻoní. Lau ʻa e ʻĪsaia 24:4–5; Mātiu 24:9–12; Sione 16:1–3; 2 Tesalonika 2:1–4; mo 1 Nīfai 13:26–29. Ko e hā ʻoku talamai ʻe he ngaahi potufolofola ko ʻení ʻe hoko hili e pekia ʻa Kalaisi mo ʻEne kau ʻAposetoló? Kuo faitokonia fēfē hoʻo moʻuí ʻe he Fakafoki Mai ʻo e ongoongolelei ʻo Sīsū Kalaisí?

Lau ʻa e fakamatala ʻa Siosefa Sāmita ki heʻene ʻUluaki Mata Meʻa-hā-mai ʻoku hā ʻi he Siosefa Sāmita—Hisitōlia 1:14–20. Ko e hā naʻe ʻilo ʻe Siosefa Sāmita ʻo kau ki he tūkunga ʻo e māmani fakalotu naʻá ne ʻākilotoa iá? Ko e hā ʻoku mahuʻinga ai ke maʻu ha fakamoʻoni ki he moʻoni ʻo hono Fakafoki Mai ʻo e ongoongoleleí?

Fakaafeʻi e kau mēmipa ʻo e kulupú ke nau fakamatalaʻi pe ʻoku ongo fēfē ʻa e fiekaiá. ʻE lava fēfē ʻe he fiekaiá ʻo uesia ʻetau ongó? ngaahi meʻa ʻoku tau fakamuʻomuʻá? ʻetau ngaahi holí? Hili e fealēleaʻaki ko ʻení, lau fakataha ʻa e ʻĀmosi 8:11–12. ʻOkú ke pehē ko e hā naʻe fili ai ʻe he palōfita ko ʻĀmosí ʻa e fakatātā ko ʻení ke fakamatalaʻi ʻaki ʻa e māmaní ʻi he lolotonga ʻo e Hē Lahi mei he Moʻoní? ʻOku faitatau fēfē ha mole ʻa e moʻoni ʻo e ongoongoleleí mo ha “honge ʻi he fonuá”? ʻE uesia fēfē ʻetau moʻuí kapau te tau fiekaia ki he ngaahi moʻoni fakalaumālié ʻi he founga tatau pē ʻoku tau fiekaia ai ki he meʻakaí?

ʻI heʻene lea “Teuteu ki Hono Fakafoki Mai ʻo e Ongoongoleleí mo e Hāʻele ʻAngaua Maí: ʻʻE ʻIate Koe ʻa Hoku Nimáʻ,”¹ Naʻe fakamatalaʻi ai ʻe ʻEletā Lōpeti D. Heili ha ngaahi meʻa pau ne hoko ʻi he hisitōlia ʻo e māmaní naʻe tokoni ki hono teuteuʻi ʻo e māmaní ki hono Fakafoki Mai ʻo e Ongoongoleleí. Fakafanongo pe lau fakataha ʻa e lea ko ʻení, pea fakaafeʻi leva ʻa e kau mēmipa ʻo e kulupú ke nau vahevahe ʻa e meʻa ne nau akó. Naʻe hā mahino fēfē ʻa e toʻukupu ʻo e ʻEikí ʻi he ngaahi meʻa naʻe hokó ʻo aʻu ki hono Fakafoki Mai ʻo e Ongoongoleleí?

2 Tesalonika 2:1–4

“Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko Ha Fanongonongo ki Māmani ʻo e Taʻu Uangeaú,” Gospel Library

D. Todd Christofferson, “Ko hono Vahevahe e Pōpoaki ʻo hono Fakafoki Mai ʻo e Ongoongoleleí mo e Toetuʻú,” Liahona, Mē 2020, 110–13

Ngaahi Akonaki ʻa e Kau Palesiteni ʻo e Siasí: Kōtoni B. Hingikelī (2016), 43–53

ʻOku tau moʻui ʻi he kuonga ʻo e kakato ʻo e ngaahi kuongá—ko ha taimi ʻoku ʻikai tatau mo ha toe kuonga. ʻOku tau ʻilo he ʻikai ngata ʻa e kuonga fakakosipeli ko ʻení ʻi ha hē mei he moʻoní, ka ʻoku ʻikai ʻuhinga ia ʻoku ʻikai ke tau fehangahangai mo ha ngaahi faingataʻa lahi. Ako ʻa e pōpoaki ʻa ʻEletā Sefilī R. Hōlani “This, the Greatest of All Dispensations.”² Ko e hā ʻa e ngaahi faingataʻa ʻoku fakamahino ʻe ʻEletā Hōlani ʻi he pōpoaki ko ʻení? Ko e hā ʻokú ke ako mei heʻene pōpoakí fekauʻaki mo e loto te ke lava ʻo fili ke maʻu ʻi hoʻo fehangahangai mo e ngaahi faingataʻa ko ʻení?

Ko ha konga fakafiefia ʻo e moʻui ʻi he kuonga ʻo e kakato ʻo e ngaahi kuongá ko ʻete kau ʻi he hokohoko mai ʻo e Fakafoki Mai ʻo e ongoongoleleí. Lau ʻa e Ngāue 3:19–21; ʻEfesō 1:3, 10; Tokāteline mo e Ngaahi Fuakava 27:13; 112:30; 128:18. Ko e hā ʻokú ke ako mei he ngaahi veesi ko ʻení fekauʻaki mo e meʻa ʻe hoko lolotonga e kuonga fakakosipeli ko ʻení? Te ke lava fēfē ʻo tokoni ki he ngāue maʻongoʻongá ni?

ʻE lava ke ʻi ai ha ola mahuʻinga ʻo e feinga mo e tui ki he hokohoko mai ʻo e fakahaá ʻi hoʻo moʻuí. ʻI he “Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko Ha Fanongonongo ki Māmani ʻo e Taʻu Uangeaú,” naʻe pehē ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá: “Kuo ʻosi eni ha taʻu ʻe uangeau talu mei hono kamataʻi ʻe he ʻOtua ko e Tamaí mo Hono ʻAlo ʻOfaʻanga ko Sīsū Kalaisí ʻa e Fakafoki Mai ko ʻeni ʻo e ongoongoleleí. … ʻOku mau fakahā loto-fiefia ʻoku laka ki muʻa hono Fakafoki Mai ʻo e ongoongolelei ne talaʻofá, ʻi he hokohoko atu hono maʻu ʻo e fakahaá.”³ Kole ki he kau mēmipa ʻo e kulupú ke nau vahevahe ʻa e ngaahi fakahā ʻi onopōní pe ngaahi akonaki fakalaumālie kuó ne tokoniʻi lahi kinautolu. Ko e hā ʻokú ke ako mei he ngaahi aʻusia ʻa e kau mēmipa ʻo e kulupú ʻi he fakahā ʻo onopōní?

ʻE lava ke faingataʻa ke mahino ʻa e fakakaukau ʻo e ngaahi kuonga fakakosipelí. Mamataʻi fakataha ʻa e foʻi vitiō “Dispensations: The Pattern of Apostasy and Restoration” (6:52), ʻo taʻofi ʻi hano fiemaʻu ke fefehuʻiʻaki ha ngaahi fehuʻi mo kumi e ngaahi talí. ʻOku fakamālohia fēfē hoʻo fakamoʻoni ki hono Fakafoki Mai ʻo e Ongoongoleleí ʻi hotau kuongá ʻi he mahino kiate koe ʻa e sīpinga ʻo e ngaahi kuonga fakakosipelí? Ko e hā hoʻo ongo fekauʻaki mo e moʻui ʻi he kuonga ʻo e kakato ʻo e ngaahi kuongá?

Taniela 2:35, 44–45; Tokāteline mo e Ngaahi Fuakava 65:2

Gordon B. Hinckley, “At the Summit of the Ages,” Ensign, Nov. 1999, 72–74

Faith Sutherlin Blackhurst, “What, Why, and How: A Breakdown of the Restoration,” Liahona, Apr. 2018, 58–61

ʻI heʻene lea ʻi he taʻu 2014 “ʻOkú Ke Mohe Koe ʻi he Lolotonga Hono Fakafoki Mai ʻo e Ongoongoleleí?”⁵ Naʻe fokotuʻu mai ʻe ʻEletā Tietā F. ʻUkitofa, ʻi heʻene ʻi he Kau Palesitenisī ʻUluakí, ha ngaahi ʻahiʻahi ʻe tolu te ne lava ʻo taʻofi kitautolu mei heʻetau kau mālohi atu ki hono Fakafoki Mai ʻo e ongoongoleleí. Ako ʻa e lea ko ʻení, pea tokanga ki he ngaahi maka tūkiaʻanga ʻokú ne pehē te ne lava ʻo taʻofi kitautolu mei heʻetau aʻusia e meʻa te tau malavá. Ko e fē ʻi he ngaahi meʻá ni te ke lava ʻo ngāueʻi ke ikunaʻí? Faʻu ha palani ke fai ia.

Naʻe ueʻi ha kakai ʻe niʻihi ne nau mamata ki he ngaahi meʻa lahi naʻe hoko ʻi hono Fakafoki Mai ʻo e Ongoongoleleí ke nau lekooti kinautolu. Fili ha himi mei he peesi ki he tefito ko e “Fakafoki Mai ʻo e Ongoongoleleí” ʻi he Ngaahi Himí, pea lau hono fakaleá. Ko e hā ʻoku akoʻi atu ʻe he fakaleá fekauʻaki mo e mahuʻinga ʻo hono Fakafoki Mai ʻo e Ongoongoleleí? Ko e hā ʻa e ongo ʻoku ʻai ʻe he ngaahi fakalea ko ʻení ke ke ongoʻí? Ko e hā ʻokú ke ongoʻi ʻoku ueʻi koe ke ke faí?

ʻI ha lea ʻi he 2020 naʻe ui ko e “Ko Hono Fakakakato ʻo e Kikité,”⁶ Naʻe hiki ai ʻe ʻEletā Lainolo A. Lasipeni ha ngaahi kikite fakakuongamuʻa mo fakaeonopooni kuo hoko, ko ha konga ʻo hono Fakafoki Mai ʻo e ongoongoleleí. Ako fakataha ʻa e lea ko ʻení, pea fakaafeʻi leva ʻa e kau mēmipa ʻo e kulupú ke nau vahevahe pe ko e fē ʻa e ngaahi meʻa ʻoku mahuʻinga taha kiate kinautolu ʻi he fakahoko ʻo e kikité. ʻOku liliu fēfē ʻe he ngāue ko ʻení ʻa e anga hoʻo fakakaukau ki he Fakafoki Mai ʻo e Ongoongoleleí? Ko e hā hoʻo ongó ʻi he taimi ʻokú ke fakakaukau ai ki he mahuʻinga ʻo e moʻui ʻi he taimi fuoloa ko ʻeni kuo tau tatali ki aí?

ʻI he fakamatala “Ko e Hokohoko Atu Hono Toe Fakafoki Mai ʻo e Ongoongoleleí”⁷ naʻe hiki ai ʻe ʻEletā Likuleni R. Ketisi ko e Siʻí, faihisitōlia mo e Tauhi Lekooti ʻo e Siasí, ha founga ʻe tolu te tau lava ai ʻo kau ʻi he hokohoko atu hono Fakafoki Mai ʻo e Ongoongoleleí:

• Fakahoko mo tauhi ʻa e ngaahi fuakava toputapú

• Fakahoko e ngaahi uiuiʻi mo e ngaahi ngāue ʻoku tau maʻú

• Tokoni ki hono tānaki ʻo ʻIsilelí

Lau fakakulupu ʻa e meʻa naʻe akoʻi ʻe ʻEletā Ketisi fekauʻaki mo e ngaahi tokoni takitaha ko ʻeni ki he ngāué. Ko e fē ʻokú ke ongoʻi ke ke kau ki ai he taimi ko ʻení? Te ke fakahoko fēfē nai ia? Vahevahe hoʻo ngaahi fakakaukaú mo e kulupú, pea feinga ke ʻiloʻi e ngaahi founga te mou lava ai ʻo fetokoniʻaki ke aʻusia hoʻomou ngaahi taumuʻá.

Fakahā 14:6–7; Tokāteline mo e Ngaahi Fuakava 1:17–30; 43:28; Ngaahi Tefito ʻo e Tuí 1:6, 9

Gary E. Stevenson, “The Ongoing Restoration” (lea ʻi he Uike Ako ʻa e ʻApiako ʻUnivēsiti Pilikihami ʻIongi, 20 ʻAokosi 2019), speeches.byu.edu