Toluʻi ʻOtuá

ʻOku pehē ʻe he ʻuluaki tefito ʻo e tui ʻa e Siasí, “ʻOku mau tui ki he ʻOtua, ko e Tamai Taʻengatá, pea ki Hono ʻAlo ko Sīsū Kalaisí, pea ki he Laumālie Māʻoniʻoní.” ʻOku faʻu ʻe he toko tolú ni ʻa e Toluʻi ʻOtuá. ʻOku nau puleʻi ʻa e māmani ko ʻení pea mo hono kotoa ʻo e ngaahi fakatupu ʻa ʻetau Tamai ʻi he Langí.

ʻOku fakakaukau ʻa e Kau Māʻoniʻoni ʻi he Ngaahi ʻAho Kimui Ní ki he kau mēmipa ʻo e Toluʻi ʻOtuá ʻi ha founga ʻoku fenāpasi mo e ngaahi fakakaukau ʻa e niʻihi ʻi he tui Faka-Kalisitiané, ka ʻi ha ngaahi faikehekehe lahi. ʻOku lotu ʻa e Kau Māʻoniʻoni ʻi he Ngaahi ʻAho Kimui Ní ki he ʻOtua ko e Tamaí ʻi he huafa ʻo Sīsū Kalasí. ʻOku nau ʻiloʻi ko e Tamaí ʻa e taupotu taha te nau moihū ki aí, ko e ʻAló ko e ʻEiki mo e Huhuʻi, pea mo e Laumālie Māʻoniʻoní ko e talafekau mo e tokotaha faifakahā ʻa e Tamaí mo e ʻAló. Ka ko e kehekehe ʻo e Kau Māʻoniʻoni ʻi he Ngaahi ʻAho Kimui Ní mei he ngaahi tui fakalotu Kalisitiané, ko ʻenau tui ko ia ʻoku ʻi he sino nāunauʻiá ʻa e ʻOtuá mo Sīsū Kalaisi, pea ko e tokotaha mavahevahe ʻa e mēmipa takitaha ʻo e Toluʻi ʻOtuá.

Naʻe mole ʻa e tokāteline moʻoni ʻo e Toluʻi ʻOtuá ʻi he hē ko ia ne hoko ʻi he hili ʻa e ngāue fakafaifekau ʻa e Fakamoʻuí pea mo e mate ʻa ʻEne kau ʻAposetoló. Naʻe kamata hono fakafoki mai ʻo e tokāteline ko ʻení ʻi hono maʻu ko ia ʻe he tamasiʻi taʻu 14 ko Siosefa Sāmitá ʻa e ʻUluaki Mata Meʻa-Hā-Maí (vakai, Siosefa Sāmita—Hisitōlia 1:17). ʻOku tau ʻilo mei he fakamatala ʻa e Palōfitá ki he ʻUluaki Mata Meʻa-Hā-Maí pea mo ʻene ngaahi akonaki kehé, ko e kau mēmipa ʻo e Toluʻi ʻOtuá ko e toko tolu ʻoku nau sino mavahevahe. ʻOku maʻu ʻe he Tamaí mo e ʻAló ha sino ongoʻingofua ʻo e kakano mo e ngaahi hui, ka ko e Laumālie Māʻoniʻoní ko ha taha ia ko e laumālie pē (vakai, Tokāteline mo e Ngaahi Fuakava 130:22).

Neongo ko e Toluʻi ʻOtuá ʻoku nau māvahevahe mo ʻi ai honau ngaahi tufakanga pau, ka ʻoku nau taha pē ʻi he taumuʻá mo e tokāteliné. ʻOku nau taha pē ʻi hono fakahoko ʻa e palani fakalangi ʻo e fakamoʻui ʻa e Tamai Hēvaní.

Lekooti e Ngaahi Ongo ʻOkú ke Maʻú

Ngaahi Pōpoaki Lahi Angé