“Eria Muporofita,” Nyaya dzeTestamente Yekare (2022)
“Eria Muporofita,” Nyaya dzeTestamente Yekare
1 Madzimambo 16–18
Eria Muporofita
Rutendo rwaamai uye zvishamiso zvaIshe
Nyika yeIsraeri yakanga isina mvura inonaya, uye mvura yaiva yodakupera munyika. Mambo Ahabi naMambokadzi Jezeberi vakanga vasingade vaporofita vaIshe. Vakatoita kuti vamwe vevaporofita vaurayiwe. Mambo namambokadzi vakanamata kuzvifananidzo kuti mvura inaye. Asi muporofita Eria akavataurira kuti Ishe havaizotumira mvura inonaya kwemakore.
1 Madzimambo 16:29–33; 17:1; 18:13
Mambo namambokadzi vakatsamwira Eria. Ishe vakayambira Eria kuti ahwande nekuti upenyu hwake hwaiva munjodzi.
Ishe vakatungamirira Eria kurukova uye vakatumira shiri kuti dzimuunzire zvokudya. Asi nokuda kwekuti kwaiva kusina mvura inonaya, rukova rwakapwa, uye Eria akanga asisina mvura.
Ishe vakatungamirira Eria kumudzimai aiva muguta riri kure. Eria akamukumbira mvura nechingwa. Asi akanga aine zvakakwanirana naiye nemwanakomana wake chete kwezuva rimwechete.
Eria aiziva kuti ndizvo zvaiva zvokudya zvake zvokupedzisira. Akavimbisa kuti kana akamupa zvokudya, Ishe vaizopa zvokudya zvemhuri yake kusvikira mvura inonaya yadzoka.
Mudzimai uyu akabikira Eria chingwa. Zvino mafuta ake nefurawa zvakawanda kakapetwa! Pakanga pava nezvokudya zvaikwanirana naEria uye nemhuri yemudzimai uyu kwemazuva mazhinji.
Rimwe zuva mwanakomana wemudzimai uyu akarwara uye akafa. Akabvunza Eria kuti sei Ishe vaizobvumira kuti izvi zviitike kwaari.
Eria akanga aine hupirisita. Akaropafadza mwanakomana wemudzima uyu uye akakumbira Ishe kuti vamubvumire kuti adzoke kuupenyu. Mwana akafema zvakare, uye mudzimai akaziva kuti Eria aiva muporofita waIshe.