“Josefa uye Nzara,” Nyaya dzeTestamente Yekare (2022)
“Josefa uye Nzara,” Nyaya dzeTestamente Yekare
Joseph uye Nzara
Mukana wemununʼuna wekubatanidza mhuri yake.
Mhuri yaJakobo yaiva inenzara nokuda kwenguva yenzara. Zvino Jakobo akatuma vanakomana vake kuEgipita kuti vanotenga zvokudya. Akachengeta mwanakomana wake mudukusa, Benjamini, ari kumba. Aiva achitya kurasikirwa naBenjamini sekurasikirwa kwaakanga aitwa nemwanakomana wake Josefa makore mazhinji akanga apfuura. Akanga asingazive kuti vanakomana vake vakurusa vakanga vakatengesa Josefa senhapwa.
Panguva ino, Josefa aiva ari mutungamiriri mukuru muEgipita. Aiva achitungamirira kutengeswa kwezvokudya panguva yenzara. Madzikoma akasangana naJosefa uye akamukumbira zvokudya. Havana kumuziva.
Josefa akavaziva, asi akanyepedzera kusavaziva. Akabvunza pamusoro pemhuri yavo kuti aone kana baba vake nemununʼuna wake Benjamini vaiva vari vapenyu.
Zvino Josefa akapa madzikoma ake zvokudya. Akavaudza kuti vasazodzoka kuzotsvaga zvimwe zvokudya kunze kwekunge vauya vaine munun’una wavo mudukusa, Benjamini.
Apo mhuri payakapererwa nezvokudya zvakare, Jakobo akaziva kuti aifanira kutuma Benjamini nevamwe vanakomana vake kudzokera kuEgipita. Jakobo aiva achirikutya pamusoro pekurega Benjamini achienda. Asi Juda, umwe wemadzikoma, akavimbisa kuti aizochegeta Benjamini akadzivirirwa.
Apo madzikoma acho paakadzokera kuEgipita, Josefa akaita kuti zvitaridzike sekunge Benjamini aiva aba mukombe wesirivha. Aida kuona kana madzikoma ake akanga ashanduka. Juda akateterera kuna Josefa kuti asaranga Benjamini asi kuti arange Juda panzvimbo pake.
Josefa akafara kuona kuti madzikoma ake akanga ashanduka. Aida Benjamini zvakakwana kumudzivirira. Naizvozvo, pakupedzisira, Josefa akavaudza kuti aiva ani.
Josefa akaregerera madzikoma ake pamusoro pokumutengesa kuti ave nhapwa. Josefa akati yaive nzira yaIshe yekubatsira mhuri yavo kuti vapone panguva yenzara.
Madzikoma aJosefa akadzokera kuna baba vavo, Jakobo, uye akavaudza zvose zvakanga zvaitika. Jakobo akatamisa mhuri yake yose kuenda kuEgipita.
Farao akatambira mhuri yaJakobo. Akavapa nyika uye nemhuka kuitira kuti vakwanise kuzova nezvokudya zvakawanda. Mhuri yaJakobo yakagara murunyararo kwenguva yakareba.