Blong ol yut
Tes blong Fet blong Mi
Taem mi gat 13 yia, mi stat blong ridim Buk blong Momon evri dei, mo mi bin kasem blesing stat long dei ia.
Sandei Skul klas blong mifala blong ol 13 yia, oli no save long mifala from fasin blong stap revren blong mifala. Be, mifala i gat wan gudfala tija we i traem bes blong hem blong tijim wanwan lesen tru long Spirit. Wan lesen olsem ia i abaot ridim ol skripja.
Long en blong lesen hem i givim long mifala wan jalenj. Jalenj ia i blong mifala evriwan, be blong sam risen hem i lukluk stret long mi mo i talem, “Mi jalenjem yu blong ridim Buk blong Momon evri singgel dei!” Mi talem long miwan, “Bae mi soem long yu. Bae mi mekem!”
Mi statem 1 Nifae japta 1 long sem naet ia mo mi bin gohed blong rid evri dei. Ating mi no bin gat wan stret fasin taem mi bin stat, be ova taem mi stat blong laekem wei we mi stap filim taem mi stap ridim Buk blong Momon. Rid evri naet i kam wan samting we mi glad tumas blong mekem evri taem.
Sam manis i pas mi kasem Alma 32 mo mi bin sapraes long tingting ia blong wan tes blong fet. Long skul mifala i jes lanem nomo blong kondaktem ol tes long saed blong saens, mekem se mi bin nildaon mo talem long Papa long Heven se mi stap statem tes ia. Mi askem se bae mi kam blong save sapos Buk blong Momon i tru.
Taem mi stap tingbaot eksperiens ia naoia, mi save se Papa long Heven i bin ansarem ol prea blong mi plante taem. Taem mi stap ridim Buk blong Momon evri dei, i givim mi wan paoa we i kam antap blong winim devel. Mi filim se mi stap kolosap long Papa blong mi long Heven. Mi filim se mi kam moa strong tru long paoa blong Tabu Spirit blong winim ol samting we oli stap blokem mi. Wanem Alma i bin talem abaot blong mekem tes wetem toktok blong God i tru: “Hem i stat blong leftemap sol blong mi; yes hem i stat blong openem save blong mi, yes, hem i stat blong kam swit long mi” (Alma 32:28).