Talen blong Teila

Yu save talem long mi wanem talen nao Teila i gat blong i save serem wetem klas?” tija blong Praemeri blong olgeta we oli gat eit yia i askem mi. Hem i bin ringim mi from klas blong Teila bae oli tokbaot ol talen we oli bin kasem long Papa long Heven.

Maen blong mi i go emti. Mi stap tingting i gobak long ol eit yia we i jes pas ia, mo traem blong kam wetem wan ansa. Taem Teila i jes bon fo dei nomo afta hem i bin safa long wan strok we i livim hem wetem damej long bren mo ol atak we i kam oltaem. Hem i no save lukluk, toktok, o komiuniket. Hem i neva progres bitim level blong developmen blong wan bebi we i gat sikis manis. Hem i spendem moa long ol dei blong hem long wan wiljea taem mifala i stap lukaotem hem mo traem blong mekem hem i harem gud.

Mifala i glad taem hem i lanem olsem wanem blong muvmuv hemwan o i dring long wan spesel kap, mo mifala i bin selebret taem hem i save stanap mo tekem ol fasfala step blong hem. Be taem mifala i stap glad mo sapotem hem long aotsaed, be insaed mifala i stap krae wetem luksave ia se ol smosmol ajivmen ia bae oli impoten long eni narafala we bae Teila i save kasem. Be mi ting se hemia i no wanem Praemeri tija blong hem i wantem blong harem.

Mi kliarem trot blong mi mo mi ansabak wetem sore, “Teila i no gat eni talen we mi save tingbaot.”

Kaen sista ia i bin jenisim rilesensip blong mi wetem boe blong mi tru long ansa blong hem ia we bae i stap blong oltaem.

“Taem mi stap tingting long lesen ia, mi luksave se evri pikinini blong God i gat wan talen,” hem i talem. “Mi ting se talen blong Teila hem i we hem i stap tijim ol narafalawan blong oli givim seves. Sapos hem i okei wetem yu, bae mi wantem blong toktok long klas blong mifala abaot olsem wanem mi bin luksave talen blong Teila long jos. Mi bin luk ol narafala Praemeri pikinini oli lanem blong pusum wiljea blong hem, openem ol doa blong hem, mo winim ol fraet blong olgeta blong waepem fes blong hem wetem wan angkejif taem i gat nid. Mi ting se hem i wan bigfala talen we hem i blesem ol laef blong yumi wetem.”

Mi talem yes long hem sloslo nomo, mo mitufala i talem gudbae. Mi stap tingting sapos Praemeri tija ia i save se ansa blong hem ia bae i gat wan bigfala paoa long laef blong mi. Teila i bin stap semmak. Hem i nidim yet bigfala kea. Ol hospital, dokta, mo ol spesel dokta oli tekem bigfala pat blong laef blong mi. Be tingting blong mi i bin jenis, mo mi stat blong luksave talen blong Teila.

Mi bin luk olsem wanem ol pipol raon long mifala bae oli jenisim ol fasin blong olgeta taem oli lukaot blong kea long hem. Mi luksave tu olsem wanem hem i rimaenem mifala blong slo daon, luksave ol nid blong hem, mo gat moa sore, lisin moa, mo gat fasin blong save wet longtaem.

Mi no save stamba tingting blong God blong mekem Teila i fesem ol rabis jalenj olsem ia, be mi bilif se Praemeri tija blong hem i givim long mi wan smol pikja blong hemia ia. Hem i stap long ples ia blong serem talen blong hem wetem mifala. Hem i stap long ples ia blong i givim long mifala janis blong lanem olsem wanem blong givim seves.