Ringim Wan Ambulans!
Saemon Hil, Kwinslan, Ostrelia
Long 1991 taem mi stap nilim siling long haos blong mifala, mi filim wan bigfala soa long lef ae blong mi. Soa ia, we i olsem wan doti wota, i bin kasem ful hed blong mi. Mi gohed blong wok gogo kasem taem mi harem nogud tumas mo mi mas go long bedrum blong spel.
Taem mi wantem blong ledaon, be, wan smol voes i stap talem long mi. “Girap,” Spirit i talem. “No silip.”
Taem mi stap tingting hevi long woning ia mo stap tingbaot wanem bae mi mekem, mi tingting blong tekem wan meresin we mama blong mi i bin tekem from ol hed i soa. Mi wokbaot i go long rum blong papa mo mama blong mi mo faenem ol meresin ia, be taem mi stap openem botel,voes ia i kam bakegen: “No tekem ol meresin ia.”
Wan sot taem afta, voes ia i kam nambatri taem bakegen: “Yu nidim blong ringim wan ambulans —naoia!”
Mi neva ringim ol imejensi seves bifo, be mi bin ring hariap.Wan ambulans i kam, mo tu wokman blong hospital i putum mi long wan bed. Las samting mi tingbaot hem i we oli askem nem blong mi. Afta ol ples i tudak.
I no longtaem mi wekap long intensiv kea yunit blong hospital. Mi slak yet mo mi stap anda long paoa blong strong meresin, be mi tingbaot se mi bin filim ol han antap long hed blong mi taem papa blong mi mo bisop blong mi i givim mi wan blesing. Mi bin harem ol toktok ia “bae yu kam gud bakegen, olsem we i no gat samting i bin hapen.”
Afta tri dei long intensiv kea mo fo moa dei long wan hospital wod, mi jes gobak hom. Kasem taem ia nomo mi jes lanem se mi bin safa from i gat tumas blad long bren blong mi. Dokta we i bin operetem mi i jes talem long mi afta se mi mi “stap long poen blong ded” mo se, sapos mi bin tekem meresin blong hed i soa ia bae mi ded finis.
Tedei mi mi oraet mo mi stap helti, mi talem tangkyu long Lod we i bin gaedem ol tingting blong mi long dei ia. Mi bin sil long tempol long naesfala waef blong mi, mo mifala i gat faef naesfala pikinini.
Mi talem tangkyu long Papa blong mi long Heven mo Sevya blong mi, Jisas Kraes, from merikel blong laef. Mi wokhad evri dei blong mekem gudfala yus long taem we Tufala i bin givim long mi, mo mi glad blong tingbaot paoa blong proteksen blong voes blong Spirit.
Bigfala soa long lef ae blong mi i bin kasem ful hed blong mi. Taem mi wantem blong ledaon, be, wan smol voes i stap talem long mi: “Girap. No silip.”