Ol Tes blong Tras Aot long Fraet Go Kasem Fet long Desisen blong Mared

Mi no sua se hemia ia hem i evri risen blong ol fraet blong mared, be hemia, mi bilif se, i sam long ol risen:

• Isi blong stap hangaraon. Plante yang pipol oli no moa pat blong gem ia blong deit blong faenem raet kompanion taem oli stap mekem tumas samting long saed blong stap spendem taem long ol grup. From fasin ia i kamaot long ol miks grup wetem ol boe mo gel, sam oli mistek blong tekem se oli stap long stret rod ia we i impoten blong faenem wan kompanion we i no save finis. Be hemia i no olsem ia. Fasin blong stap spendem taem wetem ol fren long grup i save stopem janis blong wan blong luklukgud long saed blong spesel fasin blong wan man o woman, we hem i impoten tumas blong oli mas mekem wan waes joes.

• Fraet blong mekem wan mistek. Yumi save gud ol namba blong divos. Sam yang pipol oli bin laef tru long ol harem nogud blong luk ol mared blong ol papa mo mama blong olgeta o blong ol fren blong olgeta i foldaon o oli bin go tru long divos olgetawan. Oli bin go tru long stret soa we i kam taem hom i brokdaon olsem ia. Samtaem, ol samting ia oli mekem olgeta i fraet blong oli save mared from oli fraet se bae oli jusum wan rong man o woman.

• Yangfala hem i pusumbak responsabiliti. Ating sam, oli no wantem blong setem ol strong tingting mo ol intres blong olgeta i go long ol narafalawan. Ol kaen fasin blong selfis olsem ia i gat wan wei blong talem kwik long sam blong oli pusumbak desisen blong mared.

Nomata long wanem risen blong fraet long desisen blong mared, bae hem i lid i go long sam rong tingting, blong wan i “sakemaot” tras we hem i gat long hemwan. Afta, hemia, i save mekem wan man blong i no andastanem gud responsabiliti blong hemwan blong mekem desisen ia. Mo tu sapos fraet olsem blong no mared i hapen kwik o ronwe long mared, samting ia i save lid i go long ol narafala rong. Olsem eksampol, sam oli wantem blong tingting se desisen ia, i olsem wan long saed blong spirit nomo. Oli fel blong mekem wanem we oli mas mekem, mo oli wet from wan samting olsem wan tabu fingga blong i raetem ansa long wol o blong ol solwota oli seperet o blong sam narafala samting wetem paoa i hapen blong i talemaot stret long olgeta wij patna nao hem i “stret wan.”

Ol narafalawan oli lukluk long wan nara man blong i mekem desisen ia blong olgeta. Wan stek presiden blong Brigam Yang Yunivesiti i bin talem long mi se hem i no wan nomol samting blong sam woman oli lisin long tingting blong wan boefren we i stap talem long olgeta se hem nao hem i “stret wan.” Ol narafalawan oli lisin long jajmen blong wan papa o mama—plante taem wan papa—we i bin stap mekem ol desisen blong olgeta long bifo finis. Long eni long tufala situesen ia, wan i stap ronwe long responsabiliti blong joes ia we i moa impoten blong wan man i stap mekem long laef ia.

Kaonsel we i kam long ol papa mo mama, ol bisop, mo ol nara man we oli klin inaf, oli gat valiu long hem. Be long en blong dei, i no gat wan i save—o i sud—talem long yu wanem blong yu mekem. Desisen blong huia bae yu maredem hem i wan strong mo bigfala desisen blong yuwan.

“Nao from samting ya, yufala i mas stanap strong, from we i gat bigfala pei blong yufala i stap, we bambae yufala i kasem. Tingbaot se oli bin mekem plan blong yumi kam long wol ia, bae wan i save talem se, yumi save laekem wan man o woman. No mekem samting ia i had bitim olsem we i stap! Tingbaot wanem yu save, mo muv i go fored wetem tras long Papa long Heven mo wea ples yu stap glad long hem olsem boe o gel blong Hem.

Blong mekem fren hem i wan taem we wan man mo wan woman i traem blong save tufalawan. Hem i wan taem blong kam blong save wan narawan, ol intres blong hem, ol fasin, mo tingting blong hem long laef mo gospel. Hem i wan taem blong serem ol gol mo ol drim, ol hop mo ol fraet. Hem i wan taem blong testem komitmen blong wan blong laef folem gospel.

Elda Deved A. Bedna blong Kworom blong olgeta Twelef Aposol i stap tokbaot wan misinari we i kambak long misen mo stap deitem wan spesel yang woman. Hem i lukaotem gud gel ia mo i stap tingting strong blong hem i askem gel ia blong i maredem hem. Hemia i bin hapen afta long kaonsel blong Presiden Godon B. Hinkli (1910–2008) we i bin givim long ol woman blong oli werem wan iaring nomo long wanwan sora. Yangfala man ia i bin wet blong sam taem, Elda Bedna i talem, blong yang woman ia i karemaot ekstra iaring we hem i werem long tufala sora blong hem. Be gel ia i no bin mekem. From hemia mo sam nara risen, wetem wan hat we i fulap wetem sore, yang man ia i stop blong deitem yang woman ia.

Folem eksperiens ia, Elda Bedna i talem: “mi bilif se sam long yufala … bae i ting se yang man ia i jajem gel ia tumas o blong stanap long wan smol samting nomo olsem blong mekem wan impoten desisen blong taem we i no save finis, i olsem wan krangke samting. Ating bae yu harem nogud from eksampol ia i lukluk moa long wan yang woman we i no bin folem kaonsel blong wan profet be i no long yang man ia. [Be letem mi jes poenemaot long yu nomo se] samting we mi stap tokbaot i no ol iaring!”¹

Hemia wan narafala smol advaes. Olsem pat blong wan eksperiens long fasin blong mekem fren, traem blong no mekem ol jajmen blong yu i stanap long wanem oli singaotem olsem krangke “fasin blong stap jekem sam samting nomo wanem we man ia o woman i bin akjivim be yu no traem blong save evri samting abaot man o woman ia.” Long hemia, mi minim se, blong mekem ol desisen blong yu, yu no mas lukluk nomo long saed ia se wan i bin sevem wan fultaem misen o gat wan koling long wod blong yu. Ol samting ia, oli sud kam, mo plante taem oli kam olsem ol saen blong divosen, fasin blong stap fetful, mo stap tru. Be i no oltaem. Hemia nao risen we yu nidim blong save gud. Gat inaf save long wan, blong lanem abaot wanem kaen man o woman we bae hem i kam blong yuwan be i no blong yu dipen long ol narafala pruf mo i no from “lis blong ol koling mo posisen we man o woman ia i gat.”

Wan nara tingting we i kolosap semmak hem i olsem: stap longwe long fasin blong jajem wan man o woman kasem taem yu save gud hem. Ol kwik jajmen we i no stret oli save kam wan mistek mo oli no tru, semmak long ol kwik jajmen we oli stret. Lukaotem gud wan we i gat bigfala valiu insaed long hem, be valiu ia yu no save luk aotsaed long hem o hem i no developem ol valiu ia yet, mo traem blong stap longwe long samting we i saen long fes be i gat smol valiu long hem.

Afta yu yusum jajmen blong yuwan nomo mo wan gud tingting long rilesensip afta long wan taem we i longwan inaf, yu sud prea from wan konfemesen. Tingbaot, olsem evri narafala impoten desisen, mared hem i joes blong yu. Lod bae i wantem yu blong yusum jajmen blong yu. Olsem we Lod i talem long Oliva Kowdri, se Oliva i no bin andastanem; hem i ting se bae Lod i givim long hem skil ia, taem Oliva i no bin tingting long hem fastaem mo askem Hem (luk long D&C 9:7). Taem yu mekem pat blong yu tru long wan stret fasin blong mekem fren mo mekem wan desisen, gat tras se Papa long Heven bae i ansabak long prea blong yu.

Lod i wantem yu blong yusum gudfala tingting blong yu. Hem i wantem yu blong yu dipen long ol filing blong yuwan long fasin blong laekem wan man o woman we i stap wetem yu taem we yu bon. Taem yu laekem wan we i defren long seks blong yu, harem gud long wan impoten taem blong frensip—fasin blong mekem fren—wetem hem, mo glad se hem i bin serem ol valiu blong yu mo hem i wan we yu save stap hapi wetem blong serem ol dip filing blong ol rilesensip—afta putum samting ia long Papa long Heven. Sapos yu no gat wan defren tingting long ol filing blong yuwan ating hem i wan wei blong Hem blong talem long yu se Hem i no gat tu tingting long jus blong yu.

Ol yia i bin pas nao afta long taem blong ol jalenj blong mi long trening blong mi blong kam wan Renja. Mi bin gat plante eksperiens long laef blong mi stat long ol tes blong tras long ol dei blong mi olsem wan soldia. Be memori mo lesen blong olgeta i stap yet wetem mi. Yumi save winim ol problem blong laef mo yumi save mekem gud moa bitim we yumi ting se yumi save mekem. Hem i jes wan samting we yumi mas stap tingbaot oltaem wanem yumi save.

“Nao from samting ya, yufala i mas stanap strong, from we i gat bigfala pei blong yufala i stap, we bambae yufala i kasem.” Gat tras long wanem yu save! Afta bae yu mitim ol tes blong tras blong yuwan wetem strong tingting mo gladhat, mo bae Lod i daerektem ol rod blong yu.