Ol Pikinini blong Praemri we Oli Plei Piano

“Nogat!”

“Yu stap series ia!”

“Hemia bae i neva save hapen!”

Hemia nao ating wanem we Andrea, Erik, Kristofa, Suset, mo Yuridia blong Provo, Yuta oli bin talem sapos yu bin talem long olgeta se bae oli plei piano long nekis Praemeri sakramen miting presentesen blong olgeta. Afta evri samting, ating wan long olgeta nomo i save plei piano bifo!

Be woman we i plei piano long Praemeri, Sista Peri, i bin givim long olgeta jalenj ia—mo oli wantem blong akseptem.

Wan taem long wan wik, wanwan pikinini ia i gat wan piano lesen wetem Sista Peri, be wan long olgeta ia nomo we i gat wan tija finis. Long hom, oli praktis long ol lektrik kibod. I no longtaem oli lanem ol sot vesen blong ol singsing blong sakramen miting presentesen. Oli praktisim tu long Praemeri taem ol narafala pikinini oli singsing wetem olgeta.

Long en, bigfala dei ia i kam. Wanwan pikinini i bin plei wan o tu singsing. Oli fraet blong plei long fored blong ful wod blong olgeta? Yes! Be hemia i no stopem olgeta.

“Mi harem se mi fraet tumas,” Kristofa i talem, “be mi gohed blong gat fet.”

Tangkyu from fet mo had wok blong olgeta, evriwan long olgeta i bin mekem gud long dei ia. Mo bes samting abaot dei ia?

“Hem i gud blong save help insaed long jos,” Andrea i talem. “Hem i wan bigfala blesing blong mi.”

Naoia ol pikinini ia oli save plei long taem blong famle haos naet, long ol taem blong baptaes, mo taem ol famle blong olgeta i singsing long sakramen miting. I naes!