Ol Skripja Oli Sefples blong Mi

Taem mi bin statem seminari olsem wan niu memba blong Jos, mi neva save se bae ol skripja bae oli kam wan sefples blong mi, sil mo proteksen blong mi, harem gud mo glad blong mi. Tru long ol skripja mi kam blong save ol tru man blong God we oli bin faet from ol bilif blong olgeta mo blong ol famle blong olgeta mo we oltaem oli stap muv i go long fored, wetem strong tingting mo oli stanap strong long Kraes. Oli gat tingting we i stap daon, fasin blong save wet longtaem, mo oli fulap wetem lav, jareti, mo fet. Mi save se oli bin gat wan strong tingting long ol hat blong olgeta from yumi long dei blong yumi blong laef folem wanwan prinsipol we oli bin tijim long ol skripja.

Wanwan long ol strong man long ol skripja ia oli bin sapraesem mi bigwan, be wan long evri wan ia we i bin gat tingting we i stap daon mo fasin blong stap obei taem hem i wan pikinini, wan we i bin setem wan stret eksampol, wan we evri man long wol ia oli gat kaon long hem. Man ia Hem i Jisas Kraes. Mi no gat eni toktok blong talemaot tangkyu blong mi long Hem.

Seminari i tijim mi se ol skripja oli no jes blong storem ol memori blong yumi long hem be blong yumi yusum long ol laef blong yumi. Mi mi glad tumas from wanwan long ol gudfala tija blong mi, we oli bin ol tru tul long ol han blong Lod.