Wan Bigfala Wok blong God

Wan handred eiti yia i pas finis, Josef Smit, Oliva Kowdri, mo wan grup blong ol narawan oli bin stap tugeta blong oganaesem Jos blong Jisas Kraes blong Ol Lata-dei Sent. Folem evri storian, hem i wan simpol be wan miting we spirit i stap. Josef i stap rekodem se afta long sakramen, “Tabu Spirit i bin kam daon bigwan long olgeta—sam oli bin profesae, taem mifala evriwan i stap presem Lod, mo stap glad bigwan.”¹

Ol samting we i bin hapen long dei ia, wol i no bin luksave; oli no bin tokbaot long ol niuspepa o oli no bin anaonsem long wol. Be nomata long hemia, ol heven oli bin glad mo givim ol glori long God—from long dei ia, Jos blong Jisas Kraes i bin kambak long wol!

Stat long dei ia kasem tedei, ol milian long ol fetful boe mo gel blong Papa long Heven oli bin folem ol slo toktok blong Tabu Spirit mo oli bin kam insaed long ol tabu wota blong baptaes. Wan long olgeta man olsem ia hem i Solomon Jambalan.

Solomon hem i wan man long saed blong spirit mo i bin spendem plante aoa long prea, we i stap lukaot blong kam klin aot long ol sin blong hem mo i stap krae wetem Papa long Heven blong i lidim hem i go long trutok. Samtaem raon long 1816, Solomon i bin gat wan visen we oli bin promesem hem se bae hem i laef blong luk dei ia we bae Jos blong Kraes bae i oganaes bakegen afta we oganaesesen blong olgeta Twelef Aposol i bin stanap wan moa taem bakegen long wol.

Sam yia i pas, Solomon i stap go long Kanada long bot, taem bot blong hem i bin stop long smol taon blong Palmaera, Niu Yok. Long ples ia hem i filim wan strong fos i stap pusum hem blong i mas go so. From hem i no save from wanem hem i stap longwe, hem i stat blong toktok wetem ol man blong taon ia. I no longtaem tumas bifo hem i harem wan storian abaot wan “gol Baebol.” Hem i se tufala toktok ia i sendem “wan paoa olsem elektrik [we] i pas stat long hed blong mi go kasem daon long en blong ol fingga blong leg blong mi.”

Ol kwestin blong hem oli lidim hem i go long hom blong ol famle Smit, ples ia hem i bin toktok wetem olgeta we oli bin stap abaot gudfala nius blong gospel we i bin kambak. Afta we hem i bin spendem tu dei longwe mo kasem wan testemoni blong trutok, Solomon i statem rod blong hem bakegen i go long Kanada, mo i bin tekem wetem hem 64 niufala pej blong Buk blong Momon, we oli jes printim nomo. Evri ples we hem i go long hem, hem i tijim ol pipol, “tugeta ol man we oli stap long ol hae mo lo klas long sosaeti, rij mo pua, … blong rere from bigfala wok blong God we naoia i stat blong kam fored.”²

Stat long dei ia long Epril 1830, ol milian oli bin faenemaot ol trutok blong gospel we i bin kambak mo oli bin kam insaed long ol wota blong baptaes. Mi testifae se “bigfala wok blong God” ia i stap long wol tedei. Mi serem witnes se Lod i lukaotem gud Jos blong Hem mo i daerektem tru long profet blong Hem, Presiden Tomas S. Monson. Hem i wan bigfala blesing blong stap laef long ol lata dei ia. Hemia i ol gudfala taem, we ol profet blong bifo oli bin luk finis mo enjel long heven oli bin stap wet from. Lod i luksave Jos blong Hem. Hem i luksave tu olgeta, olsem Solomon Jambalan, we oli folem ol slo toktok blong Tabu Spirit mo joen wetem ol brata mo sista blong olgeta tru aot long wol blong help blong karem bigfala wok blong God i kam long fored.