Presiden Spensa W. Kimbol (1895–1985)

Taem hem i bin groap long kantri saed blong Arisona, Spensa W. Kimbol i bin lanem blong wok had taem hem i yangfala nomo. Apu boe blong Aposol Heba C. Kimbol (1801–68) mo boe blong wan stek presiden, Spensa i bin developem tu wan strong testemoni mo wan strong tingting blong laef folem gospel.

Taem hem i bin wan boe, plante taem, hem i diuti blong Spensa blong sidaon antap long kat, mo stanap daon long ol drae gras blong ol animol, taem tufala bigfala brata blong hem i stap sakem moa drae gras i go antap long kat blong olgeta. Hem i wan wok blong swet, das mo sikras, be hem i mekem nomo kasem—taem bel blong jos i ring blong talem se Praemeri i stat, we long taem ia oli stap holem Praemeri klas truaot long wik. Spensa i gat wan gudfala atendens rekod mo bae hem i no save mestem klas ia. Ol brata blong hem oli gat ol narafala tingting mo oli stat blong sakem moa drae gras i go antap long kat hariap nomo. Taem oli luk se drae gras ia i stap kam antap, Spensa hem i stap haf wei finis i go long Praemeri.

Spensa W. Kimbol i bin gohed blong sev olsem wan misinari, wan bisop, mo wan stek presiden bifo kol blong hem blong kam wan aposol long 1943. Ol gudfala wok blong hem oli save gud long hem, nomata long ol rabis siknes we hem i bin stap kasem olsem wan hat atak mo kansa long trot. Hem i bin askem strong ol memba blong oli kam antap long ol hadwok blong olgeta, mo simpol toktok blong hemwan oltaem hem i “Yu Mekem.” From helt blong hem, sam oli ting se administresen blong Spensa W. Kimbol olsem Presiden blong Jos bae i sot nomo. Be hem i bin prisaed ova long Jos blong 12 yia, long taem ia namba blong ol tempol we oli open i bin dabol, namba blong ol misinari i bin kam antap long 50 pesen, mo prishud i bin go long evri memba blong jos we oli man we oli klin inaf.