Taem Ia blong Laef Bakegen long Ded I Bin Hapen Tru

Long wan taem blong Krismes, sam yia i pas, mifala i bin wokbaot long rod we Jisas i bin wokbaot long hem. Mifala i bin spendem sam gudfala taem long wanem we oli singaotem Garen blong Getsemane mo mifala i stap traem blong tingting long maen blong mifala se ol safaring blong Jisas i olsem wanem, mo olsem wanem Hem i bin muv tru long ol safaring ia kasem taem Hem i hang long kros mo Hem i laef bakegen long ded. Mifala i bin stap kolosap long ples we Hem i bin prea long hem, ples we oli bin tekem Hem olsem wan prisena, mo ples we Hem i bin pas long kot mo oli bin panisim Hem blong Hem i mas ded.

Aotsaed long ol wol blong taon ia, mifala i bin klaem long wan hil blong ston, we insaed long hem i gat ol smolsmol hol blong ston, mekem se en blong hem i raon olsem bun blong hed blong man, mo oli bin talem long mifala se hemia nao Golgota, ples we oli bin hangem Hem long kros. Afta, mifala i go daon long narasaed blong hil ia raon blong hil, we i stip mo insaed long wan hol blong ston we saes blong hem i olsem wan smol windo, mo oli bin talem se insaed long hol blong ston ia nao oli bin putum bodi blong Jisas i bin slip long hem.

Mifala i bin spendem sam aoa long smol garen aotsaed long tum (gref) blong Hem mo tekem bakegen gospel stori blong taem we oli bin berem Hem mo taem we Hem i bin laef bakegen long ded, mo mifala i bin stap long ples ia we ol samting ia oli bin tekem ples. Mifala i bin ridim, wetem ful tingting mo prea, stori blong taem we ol woman oli bin kam long hol blong ston ia mo enjel blong Lod i bin rolemaot ston we i bin blokem hol, mo fraet blong ol gad we oli stap lukaot long gref ia.

Kolosap mifala i save luk long tingting blong mifala, tufala enjel ia we tufala i werem ol klos we i saen, taem tufala i toktok long Meri mo talem, “From wanem yufala i lukaot man we i laef long ples blong ol dedman?

“Hem i no stap long ples ia, Hem i [girap] bakegen [long ded].”

Lod i bin talem finis bifo: “Mi mi Pikinini blong Man, bambae olgeta oli putum mi long han blong ol man nogud, mo bambae ol man nogud ya oli nilim mi long kros blong kilim mi mi ded. Be long nambatri dei, bambae mi mi laef bakegen.” (Luk 24:5–7).

Mifala i bin tingbaot storian bitwin Meri, ol enjel mo Lod:

“Woman, yu yu stap krae from wanem? Nao hem i talem long tufala se, ‘Olgeta oli tekemaot bodi blong Masta blong mi, nao mi mi no save weples oli putum.’

Hem i tanem hem mo “i luk Jisas i stap stanap long ples ya. Be hem i no save se Jisas.

“Nao Jisas i askem long hem se, ‘Woman. Yu yu stap krae from wanem? Yu stap lukaot hu? Be woman ia i stap ting se man ya i man blong luakot long plantesen blong tri ya olif, nao hemi talem longhem se, ‘Sipos yu karemaot bodi blong hem, mo yu putum hem samples, plis yu talem long mi, blong mi save go karem hem.’

Nao Jisas i talem se, “Meri.” Meri i tanemraon i luk hem, nao i talem se, “Raboni!” Hemia i lanwis blong ol laen blong Isrel, we i minim se “Tija”.

Jisas i talem long hem se, “Yu no holem mi, from we mi mi no go antap long Papa blong mi yet. Be yu go luk ol brata blong mi, yu talem long olgtea we mi mi stap gobak long Papa blong mi we hem i papa blong yufala tu, mo i God blong mi mo i God blong yufala tu.” (Jon 20:13–17). …

Samtaem, fasin blong yumi blong selebretem ol impoten samting we i bin hapen, oli go lus long fasin blong wol blong selebretem ol taem ia, mo yumi nomo luksave mining blong risen biaen long selebresen ia. Hemia i tru tu long saed blong Ista, we plante taem tumas, yumi stap selebretem holidei ia be yumi no stap tingting hevi long bigfala mining blong Laef Bakegen long Ded blong Lod. Olgeta ia we oli oli no luksave Kraes olsem wan god, mo oli no luksave Jisas olsem Pikinini blong Masta, olgeta ia, oli no stap hapi. Mifala i filim sore tumas long olgeta we oli singaotem bigfala merikel blong Laef Bakegen long Ded, se hem i “wan eksperiens nomo blong ol disaepol we wanwan man o woman i save gat defren tingting long hem, be i no wan samting we i tru we i bin hapen long histri blong wol.”

Mifala i save tru se evri samting ia oli tru. Kraes i bin tokbaot Hemwan long Nikodimas:

Tru mi talem long yu, ol samting ya we mifala i stap tokbaot, mifala i savegud. Mo ol samting ya we mifala i stap talemaot, mifala i luk finis. Be yufala i no save bilif long ol toktok blong mifala. (Jon 3:11).

Mo afta, mifala i bin tingbaot wanem we Pita i bin testifae long hem:

“From samting ya, yumi ol laen blong Isrel evriwan, yumi mas savegud se Jisas ya we yufala i nilim hem long kros, hem nao God i mekem hem i Masta blong yumi, mo i Mesaea tu.” (Ol Wok 2:36).

Jisas ya, hem i Man we i stret mo i tabu, be yufala i no wantem hem … ;

Be long fasin ya, yufala i kilim Man ya we i Stamba blong Laef, i ded. Be biaen, God i mekem hem i laef bakegen mo mifala i stap talemaot se samting ya i tru (Ol Wok 3:14–15).

Wetem klia toktok we i no gat fraet long hem, Pita mo Jon, tufala i bin stanap long fored blong kaonsel mo talem bakegen:

Oraet, yufala evriwan i mas save samting ya. Mo olgeta laen blong Isrel tu oli mas save. Man ya i stap stanap long fes blong yufala, we leg blong hem i gud finis long paoa blong nem blong Jisas Kraes, man Nasaret. Hemia Jisas ya we yufala i nilim hem long kros, nao hem i ded, be God i mekem hem i laef bakegen. …

Mo i no gat wan narafala man nating we i save sevem yumi, from we olbaot long wol ya, God i no givim nem blong wan narafala man nating long yumi, we hem i stap yusum blong sevem yumi (Ol Wok 4:10, 12).

Taem kaonsel i bin panisim tufala Aposol mo i bin givim oda blong tufala i nomo toktok o tijim ol kaen tijing ia long nem blong Jisas, tufala i ansa mo talem se: “Olsem wanem? Yufala i ting se i stret long fes blong God blong mifala i obei long yufala, no mifala i obei long hem? Hemia i stap long yufala blong yufala i skelem.

Be mifala, bambae mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala” (Ol Wok 4:19–20).

Nao tok blong ol aposol i gat paoa mo oli stap talemaot we Jisas, Masta blong yumi, hem i laef bakegen. Mo God i stap givhan bigwan long olgeta long gladhat blong hem (Ol Wok 4:33).

Mifala i save tu se Laef Bakegen long Ded i wan samting we i hapen tru. Pita we i bin laef i bin talem long kaonsel we i stap jajem hem se:

Yufala i kilim Jisas finis, yufala i nilim hem long kros, Be God ya blong ol olfala blong yumi bifo i mekem hem i laef bakegen. …

Mifala i stap talemaot ol samting ya, mifala wetem Tabu Spirit ya we God i givim finis long ol man we oli obei long hem (Ol Wok 5:30, 32).

Mifala i stanap wetem bigfala tingting long man ia we i strong, Pita, we i bin save stret evri samting, mo hem i werem gud klos blong lidasip mo kot blong atoriti, mo hem i gat strong paoa long tingting blong olgeta ia we oli stap kasem insperesen mo tras. Hem i kam blong kasem wan strongfala paoa taem hem i bin lidim olgeta Sent mo taem hem i bin fesem wol wetem evri man blong wol ia we oli agens, we oli no biliv, mo taem hem i bin fesem ol hadtaem. Mo, taem hem i bin talem bakegen mo bakegen stret save ia, mifala i givim glori long hem from strong tingting blong hem taem hem i bin fesem ol rabis man mo ol bigman blong ol Kristin Jos, ol man blong gavman we oli gat paoa blong tekemaot laef blong hem, mo taem hem i no bin fraet mo bin presem Lod, Prins blong Pis, Man we i stret mo i tabu, Man ya we I Stamba blong Laef, Pikinini blong King mo Sevya. Naoia Pita i bin savegud, i save stret, mo bae i no save tanem baksaed blong hem long save ia. Yumi mas kasem ful save tru long save ia blong Pita. …

Testemoni blong Pol i no gat wan kwestin long hem. Hem i bin harem voes blong Kraes we i bin girap bakegen long ded:

“Sol, Sol! Weswe yu stap mekem i nogud long mi olsem?” Mo blong mekemsua se hem i stap toktok long stret man, nao Sol i askem se, “Masta, yu yu hu ya?” mo hem i kasem stret ansa, “Mi Jisas ya we yu yu stap mekem i nogud long mi.” (Ol Wok 9:4–5).

Mo naoia, semfala Pol ia, we i bin karembak paoa blong hem, we i bin kasem blesen long prishud, we i bin save lukluk klia bakegen, i bin go long ol jos haos blong ol man Jiu long Damaskas mo, “i stap tij long nem blong Masta blong yumi” (Ol Wok 9:22).

Mo afta i no longtaem Pol i kam long ol Aposol long Jerusalem, mo Banabas, we i toktok blong Pol, “i talem long olgeta we Sol i luk Masta blong yumi long rod, mo we Masta blong yumi i toktok wetem hem, mo Sol i no fraet nating blong prij long nem blong Masta blong yumi, we hem i no fraet nating” (Ol Wok 9:27).

Nao Pol i gohed i talem se:

Mo taem olgeta oli mekem olgeta samting ya long hem we Baebol i tokbaot finis, se bambae oli mekem, oli tekem hem long kros, mo oli berem hem long wan hol long ston we i rere finis.

Be God i mekem hem i laef bakegen:

Mo taem hem i laef bakegen, sam man we bifo oli blaien long hem, i stat long Galili, i kam kasem Jerusalem, olgeta ya oli stap luk hem long plante dei. Mo naoia, olgeta ya oli stap talemaot hem yet long fes blong ol laen blong Isrel. …

[God] i mekem finis long yumi ya we yumi kamaot long olgeta. Hem i mekem Jisas i laef bakegen. …

God i talemaot finis long Baebol we bambae hem i mekem Jisas i laef bakegen, we bambae i no save ded bakegen samtaem (Ol Wok 13:29–31, 33–34). …

Yumi kam antap tru long witnes blong profet blong yumi tedei, Josef Smit, taem hem i kamfotem ol pipol abaot Laef Bakegen long Ded. Elda Joj A. Smit i bin kwotem las pablik adres blong Josef Smit long Jun 1844, sam dei nomo afta long rabis ded blong hem:

“Mi mi rere blong kam wan sakrifaes blong ol pipol ia; wanem nao ol enemi blong yumi oli save mekem? Bae oli save kilimded bodi nomo mo paoa blong olgeta i en. Stanap strong ol fren blong mi. Neva givap. No traem blong sevem ol laef blong yufala, from hem we i fraet blong ded from trutok bae i lusum laef we i no save finis. Stanap strong kasem en; mo bae yumi save laef bakegen mo kam olsem ol God, mo rul long ol selestial kingdom, ol posisen mo ol paoa we i no save finis.”¹ …

Kwestin we Job i bin askem, ol milian man tu we oli bin stanap long ded blong wan we oli lavem tumas, oli bin askem: “Sipos mifala i ded, bambae mifala i no save laef bakegen?” (Job 14:14).

Mo kwestin ia, oli bin ansarem gud long plante long olgeta taem wan bigfala, swit pis i kam daon long olgeta olsem ol smosmol wota we i foldaon long heven. Mo long plante taem ol hat we oli sore long ol nogud safaring oli bin filim kis blong pis ia we oli no save.

Mo taem wan dip kwaet blong sol i karem wan niu wom promes i kam long ol maen we oli wari mo ol hat we oli brok, olgeta ia oli save ripitim toktok wetem Job we yumi lavem tumas:

“Be mi mi save we God i stap long heven. Mo biaen, hem bambae i kam, i tok long saed blong mi blong talemaot we mi mi stret.

Nating we sik i spolem skin blong mi finis, be long bodi ya blong mi bambae mi mi luk God:

Bambae mi mi luk hem stret long ae blong mi (Job 19:25–27).

Job i bin talemaot se hem i bin wantem tumas se testemoni blong hem, bae oli save printim long ol buk mo katem long ston blong ol jeneresen we bae oli kam afta long hem, blong olgeta oli ridim. Tingting blong hem i bin kam tru, from pis i bin kam long plante sol from oli bin ridim strong testemoni blong hem.

Mo blong endem, letem mi ridim visen blong Jon we i Reveleta:

Nao mi luk olgeta dedman, olgeta we bifo oli haeman wetem olgeta we oli no gat nem, oli kam stanap long fes blong Man ya we i stap sidaon long bigfala jea blong hem. Nao ol enjel oli openem ol buk, mo oli openem wan narafala buk we i gat nem blong ol man we oli gat laef i stap long hem. Nao Man ya i jajem ol dedman from ol fasin we oli mekem bifo, we hem i bin raetemdaon long ol buk ya.

Olgeta man we oli ded long solwota, oli aot long solwota oli kam. Mo olgeta narafala dedman tu oli kam. Ded wetem Hom blong ol Dedman tufala i no moa save holem olgeta, olgeta evriwan, oli aot long tufala, oli kam. Nao man ya i jajem olgeta from ol fasin we oli mekem bifo. (Revelesen 20:12–13).

Mo olsem olgeta we oli stap laef, spring i folem rabis winta, evri samting long wol i talemaot stret tru tabu fasin blong Lod we i laef bakegen, se Hem i Krieta, se Hem i Sevya blong wol, se Hem i stret Pikinini blong God.