Advaes long Ol Yang Woman Abaot Deiting

Yu save stat naoia blong developem ol kwaliti ia blong mekem yu kam moa naes mo gud blong ol man oli gat intres blong wantem save yu.

• Smael! Yes, smael mo stap hapi. Mo smael blong yu bae i save pas i go long ol narawan mo bae i helpem ol narafalawan blong oli harem gud long kampani blong yu.

• Stap fit long saed blong spirit. Mekem ol samting we bae oli mekem yu kam kolosap long Tabu Spirit blong Hem i save kam kompanion blong yu oltaem.

• Stap fit long saed blong bodi. Lukaot gud long bodi blong yu, stap aktiv, mo praktis blong stap kakae ol helti kaekae. Stap klin mo naes.

• Developem ol intres mo ol talen blong yu. Lukaotem evri edukesen we yu save atendem. Yu save ridim ol gudfala buk, lisin long gud miusik, save wanem i stap hapen naoia, o lanem narafala lanwis.

• Mekem aksen olsem wan gel blong God. Yu no hariap, tok strong, kros, o tingting olbaot. Ating yu bin luk fasin olsem ia long ol muvi, be hem i no fit wetem wan yang woman we i andastanem aedentiti blong hem olsem wan gel blong God.

• Mekem ol sosol skil blong yu oli kam antap. Stap kaen, tingbaot ol naraman, mo luksave ol nid blong ol naraman. Praktis blong toktok stret long fored blong wan man o woman. Lanem ol stret mo gud fasin. Evri samting ia bae oli helpem yu blong kam kaen woman ia we ol narafalawan bae oli wantem blong stap raon wetem.

• Gat intres long ol pipol. Soemaot intres long ol narafalawan mo long ol samting we oli laekem blong mekem. Askem ol kwestin we bae i helpem olgeta blong filim gud mo i helpem yu blong yu save gud moa olgeta.

• Putum ol limit. No letem ol narafalawan oli yusum yu. Kipim fasin blong yuwan blong stap klin.

• Laef folem ol standet we i stap long buk ia, Blong Ol Yut Oli Kam Strong. Yu no stop blong serem ol standet ia wetem olgeta we yu deitem. Yu no mas putum daon ol standet blong yu from wan man. Sapos wan i wantem blong yu mekem olsem, hem i no klin inaf blong kam fren o kompanion blong yu.

• Helpem ol narafala man blong kam ol bes man, olgetawan. Mekem olgeta oli kam moa gud from oli bin deitem yu. Nomata sapos yu no gat plante janis blong deit, yu save smael mo mekem ol niu fren. Jusum blong gat sakses. Iven ol harem nogud long taem blong deiting i save helpem yu gro. Evriwan we yu mitim i save blesem laef blong yu, mo yu save blesem ol nara man taem yu serem wetem olgeta wanem yu mekem bes yuwan.

Deiting i wan janis blong kam blong save ol yangfala man rere blong mared. Lukaot long olgeta we yu jusum blong deitem. Taem yu tingting blong go wetem wan yang man, mekemsua se hem i gat ol hae standet mo bae i helpem yu oltaem blong laef long gospel blong Jisas Kraes. Hemia sam long ol kwestin ating yu wantem blong askem yuwan:

• Hem i gat wan strong mo gudfala fasin?

• Mi save trastem hem, mo mi save dipen long hem?

• Hem i ones?

• Hem i gat respek mo i stap kaen long ol narafalawan mo long mi?

• Hem i no selfis?

• Hem i stap respektem papa mo mama blong mi mo i givim ona long papa mo mama blong hem?

• Hem i onarem prishud blong hem?

• Hem i stap helpem mi blong mi kam gud?

• Hem i klin inaf blong atendem tempol?

Gat gud taem mo givim gud taem long ol deit taem yu stap wantem blong save ol nara man. Mekem plan blong ol aktiviti tugeta we i bae yufala i gat gud taem long hem. Sam long ol deit we i mekem wan i gat gud taem, samtaem hem i wan taem blong kukum wan kaekae tugeta. O, lukluk long wan janis blong givim seves. Yu save traem mo kam blong save wan narawan moa tru long fasin blong mekem plante aktiviti bitim we taem yu sidaon nomo mo lukluk ol muvi.

Profet blong yumi i bin talem se, “Long deiting, tritim deit blong yu wetem respek, mo ekspektem deit blong yu blong soem sem respek ia long yu.”³ Mifala i save se bae yu stap wan gudfala eksampol long ol laef blong evri yang man we yu deitem—mo evri fren blong yu oli stap luk ol stret mo gud eksampol blong yu.

Taem yu gohed blong developem ol presen mo ol talen blong yu, mekem ol waes joes long taem blong frensip blong yu wetem ol narawan, mo kam wan gud mo stret eksampol, ol yia blong yu blong deiting bae i gud, i gat gud risal, mo i wan gud taem. Hemia i wan taem blong stat luluk i go hae antap, mo wet from bes samting, mo kam evri samting we Papa blong yumi long Heven i wantem yu blong kam. Yu yu wan gel blong Papa blong yumi long Heven; Hem i lavem yu, mo i mekem se yumi tu, yumi lavem Hem.