Stori blong Nifae, Stori blong Mi

Sam yia afta we mi bin finisim kolej, mi faenem miwan i stap sidaon long famle haos naet wetem ol narafala yang singgel adalt long wod blong mi. Wan kaonsela blong stek presidensi blong mifala i bin invaetem mifala long hom blong hem, mo waef blong hem nao i givim lesen.

Mifala i stap rid long stori blong Nifae mo ol brata blong hem we oli go blong karem ol bras plet long Leban (luk long 1 Nifae 3–5). Tija blong mifala i tokbaot strong tingting mo fasin blong gohed blong mekem samting we Nifae i stap soemaot. Afta hem i lukluk smol grup blong mifala. Fes blong hem i strong nomo.

“Oli bin givim long Nifae mo ol brata blong hem wan hadwok,” hem i poenemaot. “I bin tekem olgeta fulap taem, no gat wan long ol taem ia i bin isi. Be hadwok ia i gat gud samting long hem. Olsem wan risal blong gat ol skripja, Nifae bae i save stopem famle blong hem blong oli ‘no save kam slak mo ded from oli lusum bilif’ (1 Nifae 4:13).

“Bae i gat ol jalenj olsem blong go karem ol plet long ol laef blong yuwan,” hem i gohed blong talem. “Ating bae yu mas soemaot fasin blong save mekem samting oltaem blong kasem edukesen blong yu. Ating bae oli singaotem yu blong yu soemaot strong tingting taem yu stap deit. Nomata long wanem sakrifaes, ol hadtaem, ol problem, ol harem nogud—eni samting we i tekem blong sevem fiuja famle blong yu mo kipim olgeta blong oli no kam slak from oli lusum bilif—gobak mo karem ol plet.”

Hem i wan naesfala tingting, mi talem long miwan. Mi putum tingting ia long memori blong mi blong mi save tingbaot afta. Long taem ia mi no filim se laef blong mi i gat tumas problem. Mi bin finisim skul, mo mi stap harem gud long wok blong mi, mo mi bin stap deit wetem wan gudfala boe—wan fren blong longtaem we ol samting oli stap kam moa series—blong fo manis nao. Mi glad tumas long olsem wanem ol samting oli stap go.

Sam manis afta long rilesensip blong mi wetem Jek (nem i bin jenis) i bin progres bigwan. Be papa mo mama blong Jek i bin divos sam yia finis, divos blong tufala i stap mekem Jek i harem nogud from. Hem i fraet se sapos mifala i mared, bae ol samting bae oli kamaot olsem we i bin hapen long papa mo mama blong hem.

Mi talem long hem se mi save givim long hem taem—plante taem sapos hem i nidim—blong hem i stretem ol samting long maen mo hat blong hem. Mitufala i bin tokbaot se bae mitufala i mekem ol desisen aot long fet mo i no long fraet. Mitufala i bin toktok raon long rol blong raet blong jusum mo se hem i no nidim blong tekem se rod blong papa mo mama blong hem bae i kamaot long hem tu. Mo mitufala i bin tokbaot Atonmen blong Jisas Kraes mo paoa blong Sevya blong i hilim ol hat blong yumi.

Ol storian blong mitufala i helpem Jek blong i katem daon sam wari blong hem, mo rilesensip blong mitufala i bin gohed olsem fastaem. Mekem se taem hem i bin ringim mi wan Satedei aftenun blong i endem rilesensip blong mitufala, hem i sapraesem mi bigwan. Hem i talem long mi se hem i no luk hemwan i maredem mi—o long eni wan. Hem i jes no bilif long mared.

Long nekis aoa ia mitufala i bin tokbaot bakegen wanem mitufala i bin toktok raon long hem finis, be mi no save jenisim tingting blong hem. Hem i jes wispa, “mi sori tumas,” mo hem i ofem fon. Mi sidaon kwaet long bed blong mi, ol wota blong ae i ron i kam daon long fes blong mi, mo mi sapraes bigwan.

Smol taem afta rum met blong mi i kam noknok long bedrum doa. “Bae yu kam long stek konfrens?” hem i askem. Mi no filim se mi wantem go eni ples o mekem eni samting, be mi putum wan dres mo go long trak.

Taem mifala i kamaot longwe fas man mi luk hem i woman ia we i bin givim famle haos naet lesen ia sam manis i pas finis. Wan long mitufala i no talem eni samting, be ol ae blong mitufala i mit, mo long maen blong mi, mi harem wan voes i singaotem nem blong mi mo talem se, “Gobak mo karem ol plet.”

Long sam wei mi save se evri samting ia oli tru. Hem i no jes abaot wan olfala profet i stap gobak blong karem wan tabu rekod. Hem i abaot mi tu. I minim se nomata Jek i no bilif long mared, be mi mi save. Mi save hop from mo wok from—i no olsem wan tingting nomo, be long wan wei blong bilif, wan aktiv wei blong rere long miwan evri dei from hemia i plan God blong ol pikinini blong Hem. Hem i no minim se mi mas gobak long Jek mo stap wetem hem kasem taem mi “winim tingting” blong hem blong mared, mo i no minim tu se bae mi stat blong deit wetem wan niu boe naoia. Hem i oraet blong mi gat taem blong mi harem nogud mo hil.

Be long taem ia mi save stap longwe long fasin blong harem nogud miwan. Mi save winim temtesen blong kros long Jek—o long ol man long jeneral tingting. Mi save lukaotem ol fren we oli bilif long mared mo mi stap wet long taem ia. Mo mi save, olsem Nifae, trastem wan gudfala Papa long Heven we i no givim komanmen—nomata hem i blong kasem ol olfala rekod long saed blong spirit o mared mo krietem ol famle—sapos Hem i no rere long wan wei blong yumi save kasem samting ia.

Mi stap yet long stej blong—“kasem” be—i no “kasem finis.” Mi no mared yet, be mi filim glad from ol gudfala eksperiens long saed blong deit we mi bin gat—ol eksperiens oli kam moa gud tru long wan save we i kam antap long rol blong fasin blong mekem samting oltaem we i kamaot long ol stret mo gud gol.

Mi filim kamfot mo tras blong save wanem Elda Rijad J. Skot blong Kworom blong olgeta Twelef i bin tijim abaot paten blong Nifae blong gohed blong stap mekem samting. Hem i talem:

“Afta tu taem we hem i no save winim, Nifae i gohed blong gat tras. Hem i bin haed i gobak long siti i go long haos blong Leban, be i no gat ol ansa. Hem i bin talem, ‘Spirit i bin lidim mi, mi no bin save yet wanem ol samting we bae mi mas mekem,’ mo i ademap gud, ‘Be mi bin go fored.’ (1 Ni. 4:6–7; oli ademap italik.)

“Nifae i wantem blong traem plante taem, wetem ol bes hadwok blong hem. Hem i bin talemaot fet se bae hem i kasem help. Hem i no wantem blong letem tingting blong hem i go daon. Be from hem i bin wok, mo gat tras long Lod, hem i bin obei, mo i yusum gud fridom blong jus blong hem, hem i bin kasem givhan. Hem i bin kasem insperesen step afta step kasem sakses, mo long ol toktok blong mama blong hem oli “bin givim … paoa [blong] oli save finisim samting we Lod i bin talem long olgeta.’ (1 Ni. 5:8; oli ademap italik.)”¹

Prinsipol blong fasin blong stap mekem samting oltaem, i tru i no en long eria blong deit. Hem i aplae tu long olgeta we oli sik oltaem mo oli no sua se bae oli save fesem gud wan narafala dei blong harem nogud; long wan kapol we oli stap traehad blong wok tru long ol jalenj long mared blong olgeta; long ol papa mo mama we oli stap prea blong ol yia blong wan pikinini we i bin lusum rod; long wan yangfala we i mitim fasin blong go agensem ol narafala man long skul from ol bilif blong olgeta; long ol misinari we oli bin wokhad blong ol dei be oli no bin save tijim wan lesen. Long sam wei evriwan long yumi oli bin komandem blong oli gobak mo karem ol plet.

Mo olsem Nifae, yumi save. Wetem strong tingting, fasin blong mekem samting oltaem, mo fet, yumi save kasem evri samting we Lod i bin komandem yumi blong mekem.