Visiting Tijing Mesej
Stap Lukaotem mo Stap Kasem Revelesen blong Yuwan
Tijim ol skripja mo ol toktok ia o, sapos i gat nid, tijim wan narafala prinsipol we bae i save blesem ol sista we yu stap visitim. Serem testemoni blong yu abaot doktrin ia. Invaetem olgeta we yu stap visitim blong serem wanem oli bin filim mo lanem.
Olsem Wanem Nao Mi Save Stap Lukaotem Revelesen blong Miwan?
“Yumi rere blong kasem revelesen blong yumiwan olsem ol profet oli mekem, tru long stadi long ol skripja, livim kaekae, prea, mo bildimap fet. Fet hem i ki. Tingbaot olsem wanem Josef i bin rere from Fas Visen:
“‘Sipos wan long yufala i no gat waes, hem i mas askem long God. …
“‘Be taem yufala i prea, yufala i mas bilif tru, we tingting blong yufala i no hafhaf.’”1
Elda Robet D. Hels blong Kworom blong olgeta Twelef Aposol.
“Prea hem i ki blong yuwan i go long heven. Lok blong hem i stap long vel, long saed blong yu.
“Be hemia i no evriwan. Long Oliva we i stap tingting se revelesen i kam olsem samting nating nomo, Lod i talem se
“Oliva i no bin andastanem gud; Oliva i stap ting nomo se bae Lod i givim long hem paoa ia, taem hem i no bin tingting gud be i go mo askem Hem nomo.
Lod i talem se yumi mas stadi ol samting ia long ol maen blong yumi; afta askem God sapos desisen blong yumi i raet. Sapos desisen ia i raet bae Hem i mekem yumi filim wan gudfala filing insaed long yumi se desisen blong yumi ia i raet.2
Presiden Boed K. Peka, Presiden blong Kworom blong Olgeta Twelef Aposol.
Olsem Wanem Nao Mi Save Kasem Revelesen blong Miwan?
“Long ol nomol wei blong olgeta, revelesen o fasin we God i toktok long man i kam tru long ol toktok o tingting we i kam long maen (luk long Inos 1:10; D&C 8:2–3), long ol kwik klia tingting (luk long D&C 6:14–15), long ol stret o nogud filing abaot ol fiuja rod blong aksen, o iven tru long ol gudfala wok, olsem blong soemaot ol art. Olsem Presiden Boed K. Peka, … Presiden blong Kworom blong olgeta Twelef Aposol, i bin talem, ‘Fasin we God i toktok long man i kam moa olsem wan filing bitim olsem wan saon.’”3
Elda Dalin H. Oks blong Kworom blong olgeta Twelef Aposol.
“Tempol hem i wan haos blong lan. Plante long ol tijing we oli givim long tempol oli ripresentem ol saen mo yu save lanem tru long Spirit. Hemia i minim se ol tijing we yumi stap kasem i kam long God. … Andastanding blong yumi long ol odinens mo kavenan bae i kam antap taem yumi gobak long tempol oltaem wetem fasin blong lan mo stap tingting hevi long ol trutok we i no save finis we oli bin tijim yumi long hem. … Letem yumi harem glad long paoa long saed blong spirit mo revelesen we yumi kasem taem yumi stap go long tempol oltaem.”4
Silvia H. Olred, fas kaonsela long Rilif Sosaeti jeneral presidensi.
Foto pikja i kam long Juan Pablo Aragón Armas