Mekem Tempol Mared wan Fas Samting Blong Mekem

Vitali: Afta we mi kambak hom afta long misin blong mi, afta long sam manis, oli bin askem mi blong mi kam kaonsela long wan lokol yut konfrens. Stiven K. Smit, presiden blong Rasia Novosibirsk Misin, i bin singaotem mi long ofis blong hem. Mi stap tingting finis se bae oli givim wan niu koling long mi, o bae hem i wan intaviu. Be no, Presiden Smit i bin tokbaot se hem i wantem mi blong mi mitim wan woman—wan yang woman we i jes finisim misin blong hem mo i bin gobak hom long wan nara pat blong Rasia, be bae hem i stap long taon blong konfrens ia.

Mi neva luk Katia bifo, be taem mi bin kasem konfrens, mi talem nem blong mi, mo mitufala i storian smol blong sam minit. Afta long naet ia, mi bin askem Katia sapos hem i wantem danis. Long nekis dei, mi bin askem hem sapos hem i wantem go danis bakegen.

Katia: Taem mi stap groap, mi no bin save plante yangfala man we oli holem prishud mo oli singgel. Be oltaem, mi bin hop se Lod bae i givim wan yang man we i klin inaf blong mi save maredem hem. Mi no save wanem taem mo olsem wanem bae mi mitim hem, be mi gat tras long Lod mo long ol promes blong Hem.

Afta long misin blong mi, oli bin invaetem mi blong mi lukaot long ol yangfala long wan yut konfrens. Taem mi bin luk Vitali long konfrens, mi gat intres wantaem blong wantem save moa abaot hem. Mitufala i bin spendem tri dei tugeta we oli gudgudfala mo mi no save fogetem long taem blong konfrens ia.

Mi bin filim strong, long stat, se Vitali i man we bae mi mas maredem. Be yes, i no evriwan bae i filim kaen filing olsem long stat blong wan frensip. Nao, olsem wanem nao mitufala i save se mitufala i stap muv long stret daereksen? Mi bin lanem long misin blong mi blong luksave Spirit mo blong folem daereksen blong Hem, mo no gat tu tingting long daereksen ia. Mekem se taem mi bin filim olsem, se mi nidim blong save Vitali gud moa, mi bin mekem tingting blong folem ol filing ia.

Mi save se Spirit bae i lidim yumi evriwan sapos yumi stap lukaotem blong gat Hem olsem kompanion blong yumi. Hem i impoten blong yumi no komperem rod blong yumi wetem rod blong ol narawan—Spirit bae i no save gaedem yumi long wan sem fasin oltaem—be sapos yumi stap folem Spirit, yumi save gat tras se rod blong yumi i stret long yumi.

Vitali: Long ol trifala dei ia, mi bin luksave se mi bin faenem wan we i spesel. Mi harem nogud taem konfrens i finis mo Katia i mas go mo Mi mi mas go. Be laki, i bin gat wan yang singgel adalt konfrens long nekis manis blong hem. Kwik taem nomo, Mi stat blong wet from konfrens ia.

Konfrens ia i bin gud olsem we mi bin hop from. Katia mo mi i bin spendem plante taem blong mitufala i kam blong save gud mitufala. Taem konfrens i bin finis, mitufala i givim telefon namba blong mitufala long wanwan blong mitufala, mo mitufala i gobak long taon blong mitufala.

Long ol wik afta, mitufala i stap toktok long telefon nomo mo stap sendem ol teks mesej. (Mi ting se mi lanem blong sendem teks long mobaelfon blong mi i kwik moa bitim man i taep long laptop kompiuta, mo hemia, long wan taem we i no kasem manis!)

Katia i bin stap long Yekaterinbeg, we hem i 11 aoa long tren long ples we mi stap long hem long Omesk, Siberia. Be nating hemia, mitufala i bin wantem blong lukluk mitufala bakegen. Mitufala i bin stat blong mekem ol trip oltaem long ol wiken. Bae mi go long hem long wan wiken, mo sam wik afta, bae hem i kam visitim mi. Taem bae mi go visitim Katia, bae mi stap wetem ol fren blong mitufala long taon blong hem, mo taem hem i kam visitim mi, hem i stap wetem sam fren blong mitufala long taon blong mi. Mitufala i stap spendem plante taem wetem ol fren ia we oli blong Jos, long taem blong ol visit blong mitufala.

Katia: Bae ating 11 aoa i wan longfala taem blong travel, be long Rasia, i wan sot wokbaot nomo! From se mitufala i stap longwe long mitufala, ol deit blong mitufala oli no hapen oltaem olsem we mitufala i bin wantem. Mitufala i save mit nomo wan taem afta plante wik, mo spendem tu o tri dei tugeta bifo wan long mitufala i mas gobak hom. Plante taem, mi bin filim se mitufala i bin nidim plante moa taem, mo taem blong mitufala i seperet i had tumas. Be from se mitufala i mas traehad blong luk mitufala, nao mitufala i stap glad long evri minit we mitufala i spendem tugeta. Taem rilesensip blong mitufala i progres i go, mitufala i stat blong lukluk long taem ia we bae mitufala i nomo nid blong talem tata.

Ol deit blong mitufala i gud tumas mo i defren: mitufala i ron long baeskel mo hos, go visitim ol miusium, ridim ol skripja, kuk, wokbaot long pablik pak (mitufala i bin danis tu long wan long ol pak ia), mo mitufala i bin go long ples blong ol pikinini we i no gat papa mo mama blong givim seves mo pleplei wetem ol pikinini.

Evri taem we mitufala i mit, mitufala i mekem wan niu samting, mekem se mitufala i gat plante gud taem tugeta. Mi laekem tumas olsem wanem Vitali i gat tingting mo olsem wanem hem i stap mekem plan blong ol deit blong mitufala. Ol aktiviti we hem i mekem plan from i bin helpem mitufala blong save gud mitufala.

Vitali: From we mi wan studen, mi no gat mane blong pem ol samting blong pleplei plante wetem. Mi stap spendem mane blong mi blong pem transpot blong go luk Katia mo blong pem telefon bil blong mi. Be i no from we mane i smol we bae i minim tu se bae deiting blong mitufala i no wan gud wan o wan gud samting i no save kamot long hem. Yes, sam long ol deit blong mitufala we oli bin moa gud, oli bin olgeta we mitufala i no spendem wan mane nating long hem.

Ating hemia i defren smol, be mi bin wantem luk olsem wanem Katia i stap mekem taem ol pikinini oli stap raon long hem, mekem se mitufala i go long wan ples we ol pikinini we oli no gat papa mo mama oli bin stap long hem. Hem i bin olsem wetem plante deit blong mitufala; mitufala i traem blong lanem plante samting abaot wanwan long mitufala.

Vitali: Long Rasia, semmak olsem long plante ples, hem i olsem wan samting we i stret blong ol pipol oli stap tugeta bifo oli mared. Afta we mi askem Katia blong maredem mi, sam long ol fren blong mi oli bin askem mi olsem wanem nao bae mi save maredem hem bifo mi save stret se mitufala i oraet blong stap tugeta. Oli givim ol risen, mo i bin semmak wetem Katia, se wan wei nomo blong faenemaot sapos hem i stretwan blong mi, i blong mi stap laef wetem hem blong wan longfala taem fastaem.

Mi talem long olgeta se i no gat nid blong laef wetem wan blong kam blong save gud hem. Mi bin traem tu blong eksplenem long ol fren blong mi long wan wei we bae oli andastanem se mi bin prea mo mi bin kasem wan ansa se mi mas maredem Katia. From we mi bin prea abaot tingting blong mi, bae mi no gat fraet long mared laef. Mi bin glad tumas mo mi bin filim se wan niufala laef evriwan i stap open long fored blong mi. I no gat wan i agensem mi o i tokbaot nogud mi from mi mekem desisen ia. Be, oli bin sapotem mi long tingting blong mi.

Katia: Taem Vitali i bin askem mared long mi, papa mo mama blong mi, tufala i traem blong toktok long mi blong mi no mared. Tufala i ting se i eli tumas blong mitufala i mared, mo mi nidim blong save Vitali gud moa. Bos blong mi tu long wok, i bin talem sem samting mo i talem bakegen, “Yu nidim blong yutufala i laef tugeta fastaem bifo yu mekem wan joes olsem ia.”

Mi sore tumas se ol pipol oli filim olsem abaot mared mo famle. Mi no ting se oli andastanem olsem wanem nao ol kapol oli hapi taem oli mared mo oli sil insaed long tempol. Bigfala lav mo hapines we Vitali mo mi i bin filim abaot mared blong mitufala i bin kam strong moa taem mitufala i bin sil blong taem we i no save finis.

Vitali: Katia mo mi i bin mared long 25 Febwari 2006. (Ol loa blong Rasia oli talem se i mas gat wan sivil mared bifo i gat wan siling long tempol, mo hemia i semmak long plante kantri). Long nekis moning, mitufala i go long wan trip i go long Stokolm Swiden Tempol. Blong go ia, mitufala i tekem plen long Omesk mo flae i go long Mosku blong tri aoa, mo mitufala i spendem dei long ples ia. Afta mifala i tekem tren long naet i go long Sent Pitesbeg. Longwe, mitufala i go long bas wetem sam narafala Lata-dei Sent mo ron long bas blong eit aoa i go long Helsinki, long Finlan. Las pat blong rod blong mitufala, i blong mitufala i ron long wan feri blong leven aoa i go long Stokolm.

Long en, mitufala i bin kasem tempol.

Long sam, wan longfala trip olsem i olsem wan jalenj, be long plante wei, trip blong mitufala i krosem Yurop i bin mekem hanimun blong mitufala i naes.

Dei blong siling blong mitufala, long 1 Maj 2006, i bin wan bigfala dei—wan dei blong pis mo wan dei we tingting i harem gud. Mi bin save se hem we mi stap holem han blong hem, i bin stretwan we bae mi serem taem we i no save finis wetem. Tingting ia nomo, i bin fulumap mi wetem bigfala glad mo tangkyu long Papa long Heven blong Hem i trastem mi, mo i givim gel blong Hem olsem waef blong mi. Mi bin filim se mi stap kolosap moa long Hem bitim fastaem.

Katia: Naoia, Vitali mo mi, i gat wan yangfala gel. Hem i naes tumas. Mi wantem hem blong i mared long tempol wan dei, mo sapot we i moa gud we mi save givim long hem, i blong mi mo hasban blong mi i ol gudfala kompanion mo blong mitufala i stap olsem ol gudfala papa mo mama.

Mi hop se bae hem i save faenem wan man we i gat prishud we i klin inaf, mo man ia i gat plante fasin olsem hemia blong Kraes. Taem mi bin luk se Vitali i gat ol kaen fasin ia, hemia i bin helpem mi blong save se mi save maredem hem.

Wanem nao i bin pulum mi long Vitali? Yes, i tru, hem i bin luk naes mo hem i smat, mo hem i bin save olsem wanem blong toktok long wan woman. Be hemia i no stret samting we i pulum tingting blong mi. Hem i bin gat, wanem we mi laekem blong singaotem, “ol ae blong wan disaepol blong Kraes.” Mi bin filim wan laet insaed long hem. Hem i wan man wetem prishud we i gat stret mo gud fasin.

Vitali: Yes, i tru, i gud tumas blong maredem wan we ae blong yu i laekem hem. Be, taem tingting blong yumi i stap nomo long bodi blong man, yumi stap mestem ol standet we oli moa impoten—man o woman ia wetem stret fasin blong hemwan, man o woman ia wetem spirit blong hem, mo ol narafala kwaliti we oli impoten tumas long wan mared we bae i stap strong kasem en.

Mi luksave se bae i wan jalenj long sam yang adalt blong faenem wan waef o hasban insaed long Jos from se i no gat plante Lata-dei Sent long ples we oli stap long hem. Mi andastanem wanem oli stap filim. Be, mi save se nomata wanem kaen situesen yumi stap long hem long laef, sapos yumi mekem pat blong yumi mo mekem yumi rere blong yumi sil insaed long tempol, Papa long Heven bae i save givim wan rod long yumi blong folem.