Kasem Blesing tru long Mama Taamino

Taem mi mitim Taumatagi Taamino, mi bin wan yang misinari we i stap wok long hom kantri blong mi. Olsem wan olfala wido, bak blong Sista Taming i bin ben smol from hem i stap kam olfala mo from hadwok, be hem i pusum han blong hem oltaem blong i gritim mi mo kompanion blong mi mo i kisim mitufala long jik blong mitufala, olsem kastom long Franis Polinisia.

Sista Taamino i bunbun tumas, mo hem i wokbaot slo mo i tekem taem, be hem i tekem kea long evriwan. Hem i iven mekemsua se mi mo kompanion blong mi i gat ol klin klos we oli aenem oltaem. Ol pikinini oli laekem blong oli stap raon long hem from hem i welkamem olgeta mo i lisin long wanem oli stap talem. Hem i laef long wan simpol laef nomo long wan hom we i gat tu rum nomo mo sanbij, ol pamtri, ol famle mo fren oli raonem. From respek nomo, evriwan oli singaotem hem “Mama Taamino.”

Misin presiden blong Tahiti Papeete i bin jusum kompanion blong mi, Elda Tjan Fat, mo mi blong help blong mekem rere wan grup blong 80 Lata-dei Sent blong kasem ol endaomen blong olgeta mo blong oli sil olsem ol famle long tempol we i kolosap—Hamilton Niu Silan Tempol, we hem i faef aoa blong go long hem long plen. Mama Taamino i bin stap travel i go long tempol evri yia blong sikis yia, mo yia ia bae hem i go bakegen. Mi stap tingting se hem i stap gat mane wea blong i stap flae olsem taem ol samting we hem i laef wetem oli smol nomo. Sikis yia afta mi bin lanem ansa blong hem.

Long 1976, olsem presiden blong Papeete Tahiti Stek, oltaem mi mas stap jekem ol mitinghaos blong stek. Wan dei long aftenun mi stop long japel long Tipaerui. Long taem ia, mifala i pem ol man we oli klinim ol mitinghaos, mo long ples ia mi bin faenem Mama Taamino, we naoia hem i gat ova 60 yia finis, we hem i stap wok olsem wan klina blong help blong sapotem bigfala famle blong hem. Hem i gritim mi wetem nomol “Kam mo kakae,” be mi ansabak, “Mama Taamino, yu yu nomo yangfala, mo long lanj yu kakae wan pis bred, wan smol tin sadin, mo wan smol botel jus? Yu no stap kasem inaf mane blong gat moa kaekae bitim hemia ia?”

Hem i ansabak, “mi stap sevap blong travel i go long tempol bakegen.” Hat blong mi i fulap wetem respek long eksampol blong lav mo sakrifaes blong hem. Mama Taamino i bin travel i go long tempol long Niu Silan kolosap 15 taem—evri yia kasem taem oli dediketem Papeete Tahiti Tempol long Oktoba 1983. Long dedikesen ia hem i soemaot glad.

Long 1995, naoia olsem wan misin presiden, mi luk Mama Taamino bakegen. Hem i bin muv i gobak long smol aelan blong Makemo, i no longwe tumas long ples we hem i bon long hem. Naoia, hem i gat ova 80 yia, hem i nomo save wokbaot, be ol laen long olfala fes blong hem i soemaot pis, fasin blong save wet longtaem, mo wan dip save long laef mo gospel. Hem i gat wan naesfala smael yet, mo ol ae blong hem oli soemaot stret jareti.

Eli long nekis moning mi faenem hem i sidaon long wan long ol flaoa bed blong mitinghaos, i stap pulumaot gras mo i stap klinim ol flaoa bed ia. Wan long ol boe blong hem i bin karem hem i kam long ples ia. Afta hem i finisim wan eria, bae hem i yusum tufala han blong hem blong i muvum hemwan i go long nekis eria. Hemia hem i wei blong hem blong gohed blong givim seves long Lod.

Long let aftenun taem mi stap kondaktem ol tempol rekomen intaviu, bae oli karem Mama Taamino i kam long ples we mi stap sidaon long hem long sed blong wan tri kolosap long japel. Hem i wantem gat janis blong ansarem wanwan kwestin we oli nidim blong wan tempol rekomen.

“Presiden, mi nomo save go long tempol,” hem i talem. “Mi stap kam olfala mo mi stap sik, be mi wantem blong gat wetem mi oltaem, wan tempol rekomen we i laef.”

Mi save talem hamas hem i wantem blong gobak long tempol, mo mi save se nid blong hem ia, God i luksave. I no longtaem tumas, hem i bin livim tabenakol blong hem blong wol ia mo i go blong i joenem olgeta we hem i bin fetful blong stap givim seves long olgeta long haos blong Lod. Hem i no tekem eni samting wetem hem be fet, testemoni, kaen fasin, jareti, mo strong tingting blong hem blong givim seves.

Mama Taamino hem i wan tru paeonia blong Polinisia we eksampol blong hem i bin blesem plante long ol brata mo sista blong hem—wetem mi.