Olgeta we Oli Pem Blong Stap Kasem Namba Ia Bae Oli Kasem Niu Tempol Buklet

Olgeta we oli stap pem blong stap kasem Liahona mo Ensign magasin bae oli kasem ol niu buklet blong Tempol blong Jos blong Jisas Kraes blong Ol Lata-dei Sent long ples blong Oktoba 2010 liahona we oli stap kasem oltaem.

Buklet ia hem i wan niu pat blong wan pablikesen we oli bin stap printim blong moa bitim 50 yia finis. Hem i bin kam olsem wan kopi blong magasin ia blong Jos Improvement Era long 1955. Afta i bin kam wan seperet buklet afta we oli bin stap stretem eit taem finis. Niu pat blong hem bae i kam tu wetem ol niu stori mo foto mo bae oli pablisim long 45 lanwis.

Ol lata-dei profet, iven Presiden Tomas S. Monson, oli stap gohed blong leftemap tingting blong ol memba blong oli kasem ol tempol odinens blong olgetawan mo afta gobak long tempol blong mekem wok blong olgeta famle blong olgeta we oli ded finis.

Buklet ia oli mekem blong i tijim ol doktrin mo prinsipol blong tempol wosip. Oli bin leftemap tingting blong ol memba blong Jos blong oli mas gat wan kopi blong buklet ia long ol hom blong olgeta blong ol papa mo mama oli save yusum ol buklet ia long famle haos naet o ol narafala ples blong tijim ol famle blong olgeta abaot tempol.

Ol pipol we oli gat ol defren yia oli save faenem wan samting we oli save yusum long ol laef blong olgeta we i stap long buklet ia. Ol stori we oli niu long edisen blong buklet ia i gat “Ol Blesing blong Tempol,” we i kam long Presiden Tomas S. Monson, mo “Rere long Ol Blesing blong Tempol,” we i kam long Elda Rasel M. Nelson blong Kworom blong olgeta Twelef Aposol. Buklet ia i gat tu wan stori blong ol yut we taetol blong hem i “Mekem Tempol wan Pat blong Laef blong Yu,” mo ol pikinini oli save lanem samting abaot ol tempol long wan stori we taetol blong hem i “Rod blong Yu i Go long Tempol.” Ol man we bae oli ridim buklet ia bae oli laekem blong luk tru long ol foto stori blong ol tempol truaot long wol. Buklet ia i gat tu ol ansa long ol kwestin we oli stap askem oltaem blong helpem ol memba blong oli rere blong go long tempol blong fas taem.

Oli bin leftemap tingting blong ol memba blong oli serem buklet ia wetem ol famle memba mo ol fren blong ol narafala jos. Moa kopi blong buklet ia i stap tu long ol Jos distribusen senta mo long LDScatalog.com.

Ol stek presiden, ol bisop, mo ol tija blong klas blong rere blong go long tempol oli save jus blong yusum ol tul ia olsem wan moa risos wetem Kasem Endaomen We I Kam Antap we i wan lesenbuk blong tija mo buklet ia, Mekem Rere Blong Go Insaed Long Tabu Tempol.

Olsem we i stret, ol prishud lida oli save givim wan buklet long ol memba we oli endao finis blong i helpem olgeta blong tingbaot ol tempol eksperiens blong olgetawan. Bae i save kam wan gudfala samting tu blong helpem olgeta we oli stap kambak long Jos aktiviti we oli stap rere blong oli go sil long tempol.

“Buklet ia i save kam wan gudfala risos blong evri memba,” Elda Yoshihiko Kikuji blong olgeta Seventi i bin talem. “Hem i wan help blong tingbaot ol tabu tempol eksperiens, ol kavenan mo blesing we oli kam wetem, mo wanwan responsabiliti blong ol memba blong famle blong mekem famle histri wok blong oli faenem ol bubu blong olgeta mo mekem ol impoten tempol odinens blong olgeta taem oli tekem pat fulwan long tempol seves.”