Gris

Rigas Pofantis mo Nikolas Malavetis tufala i bin stap lukaotem trutok long saed blong relijin blong tri yia taem tufala i bin faenem long wan niuspepa atikol long 1898 we i bin tokbaot bilif blong ol Momon. Tufala i bin gat intres mo tufala i raet i go long Jos hedkwota blong lanem moa. Ol Jos lida oli bin sendem Misin presiden blong Teki blong visit mo tijim tufala ia long Gris. Long 1903 Nikolas Malavetis i bin ded, be tu yia afta, Rigas Pofantis bakegen i raet i go long Jos hedkwota mo askem blong hem i baptaes. Ol Jos lida bakegen oli sendem Misin presiden blong Teki, we i bin baptaesem Brata Pofantis mo faef narafalawan, wetem wido blong Nikolas Malavetis.

Ol fas misinari oli bin kasem Gris sikis manis afta long ol fas baptaes ia, be long stat blong 1909, Jos i bin stopem misinari wok longwe blong kolosap 70 yia, from ol raorao long saed blong politik long eria ia. Long taem ia, ol man long militeri nomo we oli stap long eria ia oli stat blong serem gospel wetem ol pipol blong Gris. Be yet, wok i slo; taem Ethens Branj i bin riplesem namba blong ol seves man blong Jos yunit long 1967, namba blong olgeta we oli stap kam long Jos hem i kasem 80 memba long branj ia nomo be eit long olgeta ia nomo oli ol man Krik.

Long 1972 Elda Godon B. Hinkli (1910–2008), we i bin wan memba blong Kworom blong olgeta Twelef Aposol, i bin dediketem Gris blong oli prijim gospel long hem. Stat long taem ia i bin gat sam developmen we i bin leftemap tingting blong gro blong Jos membasip, wetem pablikesen blong translesen blong Buk blong Momon long lanwis blong Gris, long 1987, kriesen blong Krik Ethens Misin long 1990, mo dedikesen blong fas mitinghaos long Kris long 1999.