Wan Dres blong Mared mo Wan Plan

I kam long Jen Makbraed Koet

God nao i odenem mared (luk long D&C 49:15).

Lori i sidaon long bed blong bigfala sista blong hem, Karin we i stap putum ol samting insaed long tempol basket blong hem. Karin bae i mared tedei.

Lori i bin glad tumas blong go long pati blong mared ia long naet ia, be hem i harem nogud tu. Bigfala brata blong hem, we i bin sevem wan misin, i save go insaed long tempol wetem Karin. Papa mo mama blong hem tu oli save go insaed tu. Be Lori mo tufala yang brata blong hem i no save go insaed.

“Mi wantem tumas blong mi save go insaed long tempol wetem yu,” Lori i talem.

Karin i lukluk i go antap long Lori. “Mi tu, be bae yu oraet aotsaed. Mo wan dei bae mi go long tempol wetem yu taem yu mared.”

Lori i no moa harem nogud, be hem i stap tingting long wan narafala samting. “Olsem wanem nao yu save se yu wantem blong maredem Mat?” hem i bin askem.

Karin i sidaon narasaed long Lori. “Wan long taem finis mi bin lanem se Papa long Heven i gat wan plan blong mi. Taem mi mitim Mat, mi luksave se mitufala i save fulfilim plan ia tugeta.”

“Yu bin finisim plan ia finis?” Lori i bin askem.

Karin i saksakem hed blong hem mo talem no. “Mi mo Mat i wantem gat pikinini, finisim edukesen blong mitufala, mo plante moa.”

Lori i stap lukluk naesfala waet dres blong mared we i hang insaed long doa blong kabod blong Karin. “Dres blong yu i naes tumas,” hem i talem.

Karin i bin smael. “Hemia hem i wan narafala pat blong plan,” hem i talem. “Oltaem, mi bin wantem blong mared insaed long tempol, mekem se dres blong mi i mas naes mo i stret blong werem insaed long tempol.

Wan aoa i pas Lori i bin lukluk Karin mo Mat i kamaot long tempol. Yu save luk glad long fes blong tufala.

Lori i ron i go long Karin mo sakem ol han blong hem raonem hem.

Sam wik i pas Lori i kasem wan pikja long mel bokis blong hem. Hem i wan foto blong Karin mo Mat we tufala i stanap long fored blong tempol. Karin i bin raetem antap long foto ia, “Papa long Heven i gat wan plan blong yu.”

Lori i putum pikja ia long drowa blong hem. Hem i bin promesem hemwan se wan dei bae hem i go long tempol mo gat sem fes we i gat glad long hem olsem we hem i bin luk long fes blong sista blong hem.