Kam Wan Gufala Man Naoia

Blong yumi gat wan kwaliti laef hem i bigfala samting we God i wantem blong yumi. Laef hem i blong stap laef gud long hem nomata long wanem situesen yumi faenem yumiwan long hem. I no mas gat wan taem blong stap wet. …

Evriwan long yumi i mas laef wetem ol prapa samting we yumi mas mekem fastaem mo ol stamba tingting. Yu no stap tingting daon long yuwan. Be, skelem yuwan se yu stap laef folem gospel blong Jisas Kraes o no.

Mi laekem wei blong laef we fren blong mi, Karol Klak i bin tokbaot, … taem hem i talem se jalenj blong yuwan hem i no blong wet be blong laef gud, mo fulwan. Gol hem i no blong wet blong maredem raet wan be blong yu kam raet wan ia.

“Tru hapi pat blong laef ia hem i blong winim ol jalenj taem yumi stap hapi mo hop se bae evri samting bae i kamaot gud. … Mi save talemaot tru se blong laef wetem ol drim blong mi we oli no fulfil yet i bin pruvum long mi paoa we i putum tingting blong mi i stap daon, from hem i bin had tumas. Be yumi gat ol samting blong save mekem samting ia, mo from hem i olsem ia, mo from samting ia nao, mi save progres, iven kasem naoia, mi no gat sakses blong faenem wan we bae mi lavem—be wan samting ia nomo we mi wantem moa long laef bitim eni narafala samting hem i fasin blong stap stret mo gud. …

“Long las sama mi bin komplen long wan fren we i no wan Lata-dei Sent, se mi mi taed, mi no gat eni gudfala samting, mo mi laef olsem wan robot (wan man we oli wokem long masin nomo). Fren blong mi ia i talem, stret long fes blong mi, ‘Yu ting se samting i wanem? Wan praktis blong dresap? Hemia i laef blong yu, Karol. Yu fiksim.’ Mi stap ting se bae hem i putum wan han long solda blong mi mo bae i givim wan kaen toktok. Be, mi sek, hem i talem stret long fes blong mi wanem i stap olsem se oli sakem kol wota long fes blong mi. Hem i stap talem tru ia. Mi no stap tingting bigwan long laef, mekem se mi no filim se laef i gat valiu long hem. Mi bin go hom, mo ridim bakegen ol parabol blong man we i stap planem ol sid mo parabol blong ol talen, mo i bin jenisim laef blong mi” (A Singular Life, ed. Karol L. Klak mo Blaiti Dalin Taja [1987], 35–36).

Ol brata mo sista, jenisim laef, sapos hemia nao wanem yu nidim. Yu no wet. Be yu mas fulumap laef blong yu wetem seves, edukesen, developmen long yuwan, lav blong evriwan, mo ol narafala fasin we i gat mining long hem. Laef wetem stamba tingting evri dei. …

… Mi talem long yu se yu mas save Papa long Heven. Kam blong lavem Hem. Tingbaot oltaem se Hem i lavem yu mo bae i givim long yu givhan mo sapot sapos yu givim long Hem wan janis. Mekem ol desisen long Hem tu. Putum Hem tu long ol harem nogud blong yu. Tekem Hem tu taem yu stap skelem ol samting blong yu we oli gat valiu long hem. “Nao luk, laef ia hem i taem blong ol man blong mekem rere blong mitim God; yes, luk dei blong laef ia i dei blong ol man [mo ol woman] blong mekem ol wok blong olgeta” (Alma 34:32).

Taem yu stap traehad blong kam wan gudfala man, toktok evri dei wetem Papa blong yu long Heven we i save gud yu. Hem i save ol talen blong yu, ol paoa, mo ol wiknes blong yu. Yu stap long wol ia long taem ia blong developem mo polisim gud ol fasin ia. Mi promesem yu se bae Hem i helpem yu. Hem i luksave ol nid blong yu.