Hem I Onarem Rikwes blong Mi

Taem mi baptaes long 18 yia blong mi, mi save se blong laef folem gospel blong Jisas Kraes bae i kam wan wei blong laef. Mi filim se hem i impoten mo hem i series blong laef folem ol gospel standet, mo taem mi mekem olsem ia mi bin kasem blesing long laef blong mi long plante wei.

Wan gospel prinsipol we i rili impoten long mi hem i blong onarem Sabat dei. Hem i letem mi blong stopem ol wok blong mi we mi stap mekem evri dei mo putum evri tingting blong mi long Papa long Heven.

Mi wok long wan bisnis blong turis long Kosta Rika. Long bisnis ia, hem i nomol blong ol pipol oli wok long ol Sandei. Taem mi statem wok blong mi, mi bin talemaot se mi mi wan memba blong Jos. Mi bin rikwestem—mo oli bin apruvum rikwes blong mi—blong mi no wok long ol Sandei.

From rikwes blong mi ia we i defren, ol fren blong mi long wok mo bos blong mi oli wantem blong save. Oli askem mi plante kwestin abaot bilif blong mi. Ova taem mi bin gat ol janis blong eksplenem long olgeta sam long ol samting we ol Lata-dei Sent oli bilif long hem. Long plante ples ol eksplenesen blong mi blong ol gospel doktrin oli bin respektem bigwan.

Wan dei bos i bin singaotem evri staf blong mifala blong hem i mekem wan anaonsmen. “Mi nidim yufala evriwan blong wok long tufala nekis wiken ia,” hem i talem. Hat blong mi i foldaon. Mi save se hemia i minim se mi mas wok long Sandei.

Be afta bos blong mi i gohed blong talem: “Hemia i minim, evriwan be i no Ruan Karlos. Yumi save se bae i no gat samting i save mekem hem i kam long wok long Sandei.”

Mi bin harem gud. Bos blong mi i bin onarem rikwes blong mi! From fasin blong mi mo ol standet we mi bin soemaot long wok, mi bin kasem respek ia. Olsem wan risal hem i wantem blong onarem ol bilif blong mi.

Mi save se taem yumi mekem ol gospel standet i kam ol nambawan samting long ol laef blong yumi, bae Lod i blesem yumi.