Pepetuol Edukesen Fan I Kam Wan Sakses Afta Naen Yia

Nomata we ol hadtaem long saed blong mane oli no bin gat tumas paoa ova long program ia, olgeta we oli bin stap lukaotem program ia oli talem se program ia i mas winim sam jalenj. Wan long ol bigfala jalenj we program ia i stap fesem hem i bigfala namba blong olgeta we oli stap tekem pat long hem.

“Ol problem we mifala i stap fesem mo winim hem i ol problem we i go wetem kwik gro mo wan intanasonol had wok,” Elda Jon K. Kamak i bin talem, wan memba blong olgeta Seventi mo eksekutif daerekta blong fan ia. “Sam long ol problem ia i gat tu hemia blong mifala i mas letem ol pipol i save abaot program ia, mekem ol samting we program ia i mas gat mo man i mas save, mo sastenem olgeta we oli tekem pat long hem.”

Program ia wan smol administretiv grup nao oli stap lukaotem long ol Jos hedkwota, wetem sam wok man, ol misinari kapol, mo ol lokol volontia. Program ia tufala olfala Jeneral Atoriti ia, Elda Kamak mo Elda Rijad E. Kuk nao tufala i stap lukaotem.

Blong save kontrolem wan program we i gro hariap olsem ia, olgeta we oli wok blong PEF mo ol misinari oli wok wetem ol Eria Presidensi blong trenem ol eria lida, we bae oli save wok wetem ol lokol lida blong trenem mo sapotem ol lokol tija, staf, volontia, mo ol man we oli tekem pat.

“Hem i bin mo naoia i gohed blong stap olsem wan niu projek,” Reks Alen i bin talem, daerekta blong trening mo komunikesen blong program ia. “Hem i wan niu program long evri level, mekem se komunikesen mo trening oli bin wan impoten pat.”

Program ia i kamaot tru long ol handred taosen man we oli donetem mane i go long fan ia. Evri mane we oli givim ia i go blong sapotem olgeta we oli tekem pat long program ia.

Blong olgeta we oli tekem pat long program ia, proses ia i stat wetem wan stej blong rere we i go wetem program blong institiut blong relijin we memba ia i mas enrol long hem. Wetem help blong ol LDS risos senta blong kasem wok, olgeta we oli tekem pat oli tekem kos blong “Planning for Success (Plan blong Gat Sakses)” mo ol karia woksop bifo oli komplitim lon aplikesen we i stap long intanet.

Taem oli apruvum lon, olgeta we oli tekem pat oli go afta long ol edukesen blong olgeta wetem save se bae oli mas pem bak kaon blong olgeta blong ol narafala wan oli save harem gud long program ia tu. Olgeta we oli tekem pat oli pem bak moa bitim 2.5 milian U.S dola i go from ol lon blong olgeta evri yia.

Elda Kamak i bin talem se program ia bae i kam wan sakses i no from bigfala sapot long saed blong mane blong ol memba be tu from gudfala lidasip. “Papa blong Pepetuol Edukesen Fan hem i Godon B. Hinkli,” hem i bin talem, “be sapot mo intres blong Presiden [Tomas S.] Monson oli semmak nomo long hemia blong Presiden Hinkli. [Presiden Monson] i bin stap long stat blong proses ia mo i daerektem program ia tedei wetem lukluk blong wan profet.”

Taem oli anaonsem program ia long Epril 2001 jeneral konfrens, Presiden Hinkli i bin talem: “Wetem ol gudfala skil blong kasem wok, ol yang man mo woman ia oli save kam moa antap mo kamaot long fasin blong stap pua we olgeta mo ol jeneresen bifo long olgeta oli bin save long hem. Bae oli save provaedem gud ol samting blong ol famle blong olgeta. Bae oli sev long Jos mo gro long lidasip mo responsabiliti. Bae oli pem bak ol lon blong olgeta blong mekem i posibol blong ol narafala wan blong oli kasem blesing olsem olgeta i bin kasem blesing” (“The Perpetual Education Fund,” Liahona, Julae 2001, 60; Ensign, Mei 2001, 51).

Ol lida blong program ia oli gohed blong luk ol toktok blong Presiden Hinkli i kam tru. Kolosap 10 kasem 15 pesent blong ol lida blong Jos naoia long sam kantri we oli bin apruvum blong oli kasem PEF program ia oli bin kasem sapot long program ia fastaem.

“Hemia i no wan krangke drim,” Presiden Hinkli i bin talem. “Yumi gat ol risos tru long gud mo kaen fasin blong ol gudfala fren we oli laekem blong givim bigwan. Yumi gat oganaesesen. Yumi gat paoa mo ol gudfala wok man we oli putum evri samting blong olgeta long Lod blong mekem program ia i kam wan sakses. Hem i wan hadwok blong evri volontia we bae i no kosem Jos wan samting nating. Yumi prea wetem tingting we i stap daon mo talem tangkyu se God bae i mekem hadwok ia i kam antap mo bae i karem ol blesing, we oli rij mo gud, i kam long ol hed blong ol taosen we oli bin tekem pat long program ia mo tu long olgeta we oli bin statem oganaesesen ia, Pepetuol Emigresen Fan, we i bin karem ol blesing we man i no save tokbaot i kam long ol laef blong olgeta we oli bin tekem pat long ol janis we hem i givim.”

Naen yia afta, program ia i gohed blong gro, i bin kam posibol, olsem we Brata Alan i talem, “tru long bigfala kea mo plante fet.”