Taem Ol Dakdak Oli No Flot

Evri samting i stat wetem sapraes presen ia we Papa i karem i kam hom long trifala gel blong hem. Taem oli pusum hed blong olgeta blong luk wanem i stap insaed long bokis ia, ol gel ia oli singsingaot wetem glad. Ol smosmol dakdak! Mifala i no save wet blong pusum han i go insaed mo holem wan. Mifala i puspusum papa olbaot mekem se kolosap nomo hem i dropem bokis ia.

“Ei, yufala i slo ia!” papa i laf mo talem. “I gat wanwan dakdak blong yufala evriwan!”

Mi bin sapraes long smol saes blong ol dakdak ia taem mi holem wan long han blong mi. Long han blong mi, wom bodi blong dakdak ia i olsem saes blong wan twante vatu, mo kilo blong hem tu i semmak.

“Wao, hem i laet tumas!” Mi talemaot strong. “Ating hemia nao ol bebi dakdak oli save flot!”

Papa i laf bakegen mo i wokbaot i go blong joenem mama long kijin. Papa hem i gud wetem ol sapraes, speseli long hemia we i mekem famle blong hem i smael. Hemia nao taem mi tingbaot wan smol pul blong fulumap wota long hem. Bae hem i wan stret hom blong ol niufala dakdak blong mifala.

“Nora, karemaot olfala plastik pul we i stap long garaj,” Mi givim oda long sista blong mi.

Wetem rop blong paep blong mifala we i stap biaen long yad, mifala i fulumap klin wota i go insaed long pul ia, mifala i stat blong lukluk ol dakdak blong mifala mo rere blong givim nem long olgeta. Blong mi i gat wan smol pis braon kala long baksaed blong hem mo hem i gat ol bigfala fani leg.

I no longtaem mi tingbaot ol fren blong mi. Bae oli laf long mi from mi stap krangke long ol niufala dakdak blong mi ia. Afta mi jes tingbaot se ol fren blong mi bae oli no stap blong ol nekis dei we i go ia. Ol papa mo mama blong olgeta i bin givim long olgeta raet blong oli go kamp long ol maonten we i stap kolosap. Oli ron long baskel long wan olfala rod we i doti, oli jusum wan ples we bae oli kamp long hem, mo bae oli stanemap ol tenet blong olgeta. Bae oli gat plante gud taem mo taem bae oli kambak hom long nekis dei, bae oli laf mo tokbaot kamp blong olgeta. Mama blong mi i no bin givim raet blong mi blong go. Hem i se mi mi yang tumas!

Wetem pul ia we i fulap wetem wota, mifala ol gel i raonem, mo stap glad from taem ia. Mifala i putum daon ol dakdak blong mifala long wota mo SUM, oli draon i go daon long pul ia. Trifala dakdak ia oli draon i go daon!

Mifala i pusum kwik ol han blong mifala i go insaed long pul ia mo sevem ol smosmol dakdak ia. Wanem i bin go rong? Mifala i no askem olgeta blong mekem wan had samting, olsem swim. Oli nidim nomo blong flot. Hemia i no wan had samting long wan dakdak?

“Wanem i hapen?” sista blong mi i stap tingting.

“Ating yumi mekem olgeta i sek!”

Mifala evriwan i agri olsem ol bebi taem oli lanem olsem wanem blong wokbaot. Samtaem oli mas foldaon. Mifala i agri blong givim wan nara janis long olgeta blong oli traem bakegen.

“Wan, tu, tri, go!”

Plak! Plak! Plak! Oli go stret daon olsem ol hevi aean.

Laki blong ol dakdak ia, se wan long mifala i no bin gat tingting ia blong folem tingting blong mifala se oli nidim praktis nomo. Taem Nora i talem se bae mifala i yusum ol hea draea blong draem ol feta blong ol dakdak ia, mifala evriwan i ron i go insaed long haos. Sloslo, tufala sista blong mi i draem ol smosmol dakdak ia wetem pink hea draea blong mi, taem mi stap traem blong ringim namba we i stap wetem nem long bokis we oli bin karem ol dakdak ia i kam long hem.

“Helo, Masta? Mifala i jes pem—okei, papa blong mifala i jes pem—tri smosmol dakdak. Yes, Masta. Be, i gat wan problem wetem ol dakdak blong mifala. Yu luk, mifala i wantem ol dakdak blong mifala blong oli mas flot.”

Wanem bae man ia i talem se hem i wan sapraes long mi. Mi no bin luksave se mi bin lanem plante samting finis kasem taem mi harem miwan we i stap eksplenem long Nora mo Susi: “Yu luk, ol feta blong olgeta andanit oli no strong yet blong kipimaot wota. Be oli pulum wota. Yumi mas wet wan nara wik o tu blong ol bodi blong ol dakdak ia i mekem tik oel blong mekem se ol feta blong olgeta i kam wotapruf.”

“Be hemia i no tru,” Nora i talem. “Mi bin luk ol bebi dakdak oli folem mama blong olgeta i go long reva. Hemia we oli jes bon nomo.”

“Man ia i eksplenem long mi. Taem ol dakdak oli bon, ol mama blong olgeta i kavremap olgeta wetem ol wing blong hem raonem ol bodi blong ol bebi ia blong kipim olgeta i wom. Tik oel blong mama blong olgeta i go long ol bebi ia. Wetem mama blong olgeta, oli save stap flot. Be sapos oli stap olgetawan, bae oli nidim blong gro antap smol moa bifo oli save flot sef long wota.”

Afta bren blong mi i bin wokbaot i go long ol maonten samples, mo mi stap tingbaot ol fren blong mi long ol tenet blong olgeta. Ating mama i stap traem blong kipim mi anda long ol wing blong hem blong wan smol taem moa. Mi stap brasem sloslo smol bak blong dakdak blong mi wetem wan fingga.

“Bae mifala i kipim yu aot long pul, naoia, smolwan,” mi promesem hem. Afta, olsem wan tingting we i jes kam long mi nomo, mi talem se, “Yu misim mama blong yu?”