Ol Niu Rilif Sosaeti Jeneral Gaedlaen I Stap Blesem Ol Memba
Juli B. Bek, Rilif Sosaeti jeneral presiden, i bin anaonsem ol niu gaedlaen blong Rilif Sosaeti sikis manis i pas finis long jeneral Rilif Sosaeti miting, mo ol risal blong ol gaedlaen ia i stap blesem ol laef blong ol sista raon long wol.
Ol risal blong ol niufala gaedlaen ia oli bin gud, Sista Bek i talem, mo hem i poenemaot se ol memba long fulwol naoia oli save planem ol miting blong olgeta folem ol wanwan nid blong olgeta, long wan jos we i no fosem man blong lukluk nomo long wan kalja o samting.
“Hemia i bin wan gudfala step blong wan intanasonal oganaesesen,” Sista Bek i bin talem. “Yumi lavem ol sista, yumi trastem ol sista, mo yumi save se sapos oli mekem hemia i kam wan samting blong fet mo fasin blong obei, bae oli no save gat wan problem wetem.”
Toktok blong Sista Bek, we taetol blong hem i “Rilif Sosaeti: Wan Tabu Wok” (Liahona, Nov. 2009, 110) i mas kam olsem wan ofisol polisi long saed blong ol miting, mo ol lida blong Rilif Sosaeti wetem ol kwestin abaot ol polisi ia oli mas kaonsel wetem ol prishud lida blong olgeta.
Ol Jeneral Jenis
Oli bin talemaot se ol kaonsela blong Rilif Sosaeti oli mas folem paten blong prishud mo oli mas singaotem olgeta fas o seken kaonsela. Koling we oli bin save long hem fastaem olsem lida blong wanwan, hom mo famle enrijmen miting, oli mas singaotem hem olsem Rilif Sosaeti miting kodineta. Sista we i stap long koling ia i mas gohed blong arenjem ol miting blong Rilif Sosaeti we oli stap holem long ol dei blong wik anda long daereksen blong presidensi.
Ol Rilif Sosaeti Miting Gaedlaen
Long toktok blong hem, Sista Bek i bin talem olsem wanem ol miting oli bin stap singaotem fastaem olsem “wanwan, hom, mo famle enrijmen miting” we naoia bae oli singaotem olgeta olsem ol miting blong Rilif Sosaeti.
Sista Bek i bin tokbaot olsem wanem wod Rilif Sosaeti presiden i mas lukaotem evri miting blong Rilif Sosaeti mo kaonsel wetem bisop o branj presiden, blong hem i apruvum evri plan blong ol miting.
Presiden blong Rilif Sosaeti i mas lukaotem evri miting, be i save askem fas o seken kaonsela—o givim nem blong wan sista long wod o branj blong oli singaotem hem—i kam kodineta blong ol miting. Wan memba blong presidensi i mas stap long ol miting ia.
Ol miting oli mas stap holem evri manis, be oli save holem tu long wan taem long evri tri manis (wan kwota), long wan dei we i no long wan Sandei o wan Mandei naet. Bisop o branj presiden mo presiden blong Rilif Sosaeti i mas faenemaot paten blong ol miting, mo ol sista oli no mas filim se oli mas go long evri miting ia.
Taem oli planem ol miting, presidensi blong Rilif Sosaeti i mas lukluk long ol problem ia olsem taem, komitmen, mane, sefti, mo taem blong travel.
Ol miting ia oli mas mekem se “ol responsabiliti blong jareti mo praktis” blong Rilif Sosaeti oli kamtru; oli mas mekem tu se ol sista oli kam antap long saed blong fet mo fasin blong stap stret mo gud olgetawan mo tekem kea long ol nid blong wanwan man mo ol famle long saed blong spirit mo long laef blong olgeta naoia.
Blong planem ol miting, presidensi blong Rilif Sosaeti i mas lukluk fastaem long ol topik we bae oli fulfilim ol stamba tingting blong Rilif Sosaeti; ol miting oli mas lukluk nomo long wan topik o oli mas divaedem i go long moa bitim wan klas o aktiviti. Ol memba blong wod o stek nao oli mas kam ol tija.
“Sapos oli yusum gud ol miting blong Rilif Sosaeti bae i save mekem paoa blong Rilif Sosaeti i kam antap blong i wok long ol strong wei wetem ol prishud lida long evri wod,” Sista Bek i talem.