Bae Hem I Tekem long Hem Ol Wik Samting blong Olgeta

Sam yia i pas afta we waef blong mi, Jisel mo mi i bin kambak afta we mi bin prisaed ova long Fiji Suva Misin, Jisel i bin kasem kansa long bel blong hem. Tes ia bae i kam wetem tri operesen mo hadtaem we i en long wan ful operesen we oli katemaot ful basket blong kaekae blong hem. Hem i long taem we mi stap luk waef blong mi i stap safa ia nao, we mi kam blong andastanem gud Atonmen blong Jisas Kraes.

Mi tingbaot mi bin harem nogud tumas from wanem Jisel i bin stap go tru long hem. Wanem nao hem i bin mekem blong hem i safa long wan hadtaem olsem ia? Olsem wanem, hem i no bin stap strong blong givim seves long Lod? Hem i no bin laef folem Tok blong Waes? From wanem nao Hem i no save stopem sik ia? From wanem?

Wan spesel naet, mi letem hat mo ol filing blong mi oli go aot long prea taem mi stap talem long Lod evri smosmol kros blong mi. “Mi no save stap luk dia waef blong mi i stap go tru long ol soa ia!” mi talem long Hem. Afta mi bin tanem mi mo mi go long ol skripja. Mi bin faenem kamfot long ol ves ia abaot Jisas Kraes long Alma 7:11–12:

“Mo [Jisas] bae i go aot, i harem nogud long ol soa blong bodi mo fulap hadtaem mo temtesen blong evri kaen; mo samting ia bae i mekem profesi i hapen we i talem se, bae hem i tekem long hem ol soa blong bodi mo ol siknes blong ol pipol blong hem.

“Mo bae hem i tekem long hem ded, blong hem i save tekemaot ol rop blong ded we i fasem ol pipol blong hem; mo bae hem i tekem long hem ol wik samting blong olgeta, blong mekem se insaed long hem i save kam fulap long sore, long saed blong bodi blong mit mo bun, mekem se hemi save, long saed blong bodi blong mit mo bun, olsem wanem blong helpem ol man blong hem long saed blong ol samting blong olgeta we oli no strong long hem.”

Kasem taem ia mi no bin luksave evri gudfala samting we Atonmen blong Sevya i karem i kam. Mi no bin luksave gud se bae Jisas Kraes bae i tekem long Hem soa blong Jisel—o blong mi. Mi bin muvum harem nogud mo fraet blong mi i go long Hem we bae i tekem “ol soa blong bodi mo ol siknes blong ol pipol blong Hem.” Wetem niufala save ia, mi filim se wan hevi samting i bin kamaot long mi!

Tedei, Jisel i harem gud finis, olsem we hem i neva kasem kansa. Long ol nomol jekap blong hem, dokta blong hem i talem long hem se hem i “wan merikel.” Mi glad tumas from hem i kam gud bakegen long saed blong bodi, be mi glad tu from we mi bin kam gud bakegen, hat blong mi i bin kam gud bakegen. Kamfot we i rere i stap oltaem long yumi tru long Sevya, i bin givim mi wan kwaet promes se evri samting bae i oraet.

Naoia taem mi fesem hadtaem, oltaem, ol tingting blong mi oli tanem long lesen ia we i gat paoa, mo long wanem Lod i bin talem long Profet Josef Smit se Pikinini blong Man i bin go tru long evri samting. Afta Hem i askem sapos Josef Smit i bigwan bitim Hem? (luk longD&C 122:8). Oltaem, taem mi tingbaot sakrifaes blong Jisas Kraes, i stap leftemap tingting blong mi.

Mi stap glad oltaem from strong tingting blong Sevya blong yumi blong go tru long ol taem blong filim ol rabis soa mo winim. Mi testifae long lav blong Hem, sore blong Hem, mo gudfala kea blong Hem long ol pikinini blong Hem. Hem i Sevya blong yumi, mo mi lavem Hem.