Help blong Fidim Ol Sipsip blong Sevya

Sevya i bin ded mo afta i laef bakegen long ded. Ol disaepol blong Hem oli bin go long Galili. Oli bin stap pulum net blong ol fis tru long naet, be oli no bin kasem eni fis. Taem oli stap kam kolosap long so, long moning, oli no bin luksave Hem. Hem i bin singaot i go long olgeta, mo i talem long olgeta blong sakem ol net blong olgeta, mo taem oli bin mekem olsem ia, ol net blong olgeta i bin fulap wetem ol fis. Oli bin ron i go blong gritim Hem long so.

Oli bin faenem wan faea wetem fis mo bred i stap tan long hem. Afta Hem i bin givim wan komanmen long olgeta we i aplae tu long yumi evriwan.

“Taem we oli kakae finis, Jisas i askem long Saemon Pita se, Saemon, pikinini blong Jon. Yu yu lavem mi moa, i winim we ol narafala ya oli lavem mi? Pita i talem long hem se, Yes Masta, yu save we mi mi lavem yu. Nao Jisas i talem long hem se, Ale yu lukaot gud long ol sipsip blong mi” (Jon 21:15).

Ol Sent blong God, oltaem, oli stap anda long kavenan blong lukaot long wanwan long olgeta long saed blong spirit, speseli long olgeta we oli jes kam blong save gospel.

Wan pikinini i save mekem ol samting we i save lukaotem fet blong ol narafalawan. Ol pikinini oli save invaetem wan konvet we i jes baptaes nomo blong i kam wetem olgeta long wan miting. Ol pikinini oli save smael mo gritim wan niu memba we i stap kam long wan japel o i kam long wan klas. Mo taem yumi mekem, Tabu Spirit bae i save kam kompanion blong yumi.

Evri toktok we yumi stap talem i save mekem fet blong yumi i kam moa strong o i kam mo wik. Yumi nidim help blong Spirit blong i talem long yumi ol toktok we bae i save lukaotem mo mekem ol narafalawan i kam moa strong.

Yumi save mekem samting ia taem yumi obei long help blong Lod blong tekem ol sipsip, ol sipsip blong Hem, i kam insaed long ol han blong Hem we i hom blong Papa blong olgeta mo Papa blong yumi.

Mi save se Jisas Hem i Kraes. Mi save se Hem i laef. Mo mi save se Hem i lidim wok ia—wok blong Hem—blong karem i kam long laef we i no save finis long ol pikinini blong Papa blong Hem.