“Olsem wanem nao mi save gat ol klin tingting taem mi luk tumas rabis dresap raon long mi?”

Yumi mas tingbaot se yumi stap long wol ia be yumi no ol man blong wol ia. Yumi ol spesel boe mo gel blong Papa blong yumi long Heven we i lavem yumi tumas. From risen ia, enemi i temtem yumi iven moa, be yumi mas stanap strong bitim temtesen. Ol man blong wol ia bae oli dresap nogud, from oli no save se bodi hem i wan tabu tempol. Be ol Lata-dei Sent oli save samting ia. Taswe, yumi mas kipim yumiwan i klin oltaem. Sapos ol rabis tingting i kam long ol maen blong yumi, yumi mas lukaotem help blong Papa blong yumi long Heven hariap tru long prea, from i no gat wan we i save helpem gud yumi bitim Hem.

Olsem wan Lata-dei Sent nomo long klas sikis, mi bin eksperiensem ol swea, fasin blong no dresap gud, mo presa blong folem ol nogud samting blong ol narafala wan. Be long stat blong yia, mi bin eksplenem long ol fren blong mi abaot ol standet blong mi mo se bae mi folem ol standet ia long evri situesen. Oli bin lanem tru aot long ol manis abaot ol Jos valiu blong mi. Ol fren blong yu bae oli helpem yu sapos yu eksplenem ol valiu mo standet blong yu long olgeta. Ol fasin blong ol fren blong mi, ol klos, mo lanwis blong olgeta i bin jenis gud. Mi bin lanem se sapos oli ol tru fren blong yu, bae oli helpem yu blong yu save gat ol klin tingting mo bae oli helpem yu blong stap long stret mo smol rod.

Mi faenem se taem mi stap traehad blong kipim ol klin tingting, prea hem i stret ansa blong kipim wan klin maen mo i letem paoa blong Spirit blong i stap wetem mi long weaples mi go long hem. Taem mi stap prea evri moning long Papa long Heven blong i helpem mi blong gat ol klin tingting mo blong i givhan long mi tru aot long dei mo talem tangkyu long hem long naet i bin mekem mi gat wan gudfala rilesensip wetem Hem mo i bin helpem mi blong stap longwe long fasin blong no dresap gud mo mi save kipim ol standet blong mi. Wan prea evri moning mo naet i save helpem yu blong invaetem Spirit blong i stap wetem yu taem yu fesem ol enemi blong wol ia. “Yufala i stanap strong mo no muvmuv, mekem plante gufala wok oltaem” (Mosaea 5:15).

Taem ol pipol raon long yu oli no dresap gud, no talem nogud olgeta, from yu nidim blong gat ol gudfala tingting. Setemap wan eksampol long olgeta taem yu soemaot long olgeta se yu stap folem ol standet blong Jos. Mo helpem ol pipol taem yu lavem olgeta mo talem long olgeta se Papa blong yumi long Heven i lavem olgeta mo i wantem olgeta blong stap klin long tingting tugeta long ol aksen mo tingting. Klin tingting hem i impoten long fasin blong sevem yumi, from yumi ol tempol blong God blong yumi.

Mi save se yumi save gat ol klin tingting taem yumi stadi ol skripja mo putum ol tijing ia long praktis. Taem yumi putum long praktis evri valiu we oli tijim long yumi long jos, taem yumi ridim Blong Ol Yut Oli Kam Strong, mo taem yumi go long tempol, yumi save kasem ol klin tingting.

Prijim Gospel blong Mi i gat wan seksen we i tokbaot klin fasin. Hem i talem ol maen blong yumi i olsem wan stej long wan tiata. Long stej ia, wan man nomo i save ak long wanwan taem. Taem yumi gat ol klin tingting, ol maen blong yumi bae oli stap nomo long ol tingting ia, mo ol rabis tingting oli no save kam long stej blong ol maen blong yumi. Klin fasin hem i wan fasin blong Jisas Kraes we oli bin talem long yumi blong yumi developem. Long jos yumi lanem se yumi mas gat ol klin tingting oltaem, be taem wan samting nogud i temtem yumi, yumi save singim hym we yumi laekem tumas o tingting long wan skripja we yu laekem tumas. Bigfala wei blong help i stap long 2 Nifae 32:9: “Prea oltaem, mo no letem tingting blong yufala i foldaon.”

Yu yu kontrolem olsem wanem yu ansabak long wanem yu luk. From i gat wan samting longwe, yu no nid blong putum long stej blong maen blong yu. Yu jusum ol tingting blong yu; mo jusum blong holem taet ol klin wan. Traem blong no lukluk tumas long fasin blong no dresap gud, mo yu mas dresap gud oltaem. Afta tingting long olgeta we yu kam blong save olsem ol pikinini blong God, wetem paoa we i kam long God, we Papa blong yumi long Heven i lavem tumas. Taem mi luk ol narafalawan olsem ol pikinini blong God, mi stap harem nogud nomo taem mi luk plante oli no dresap gud.