Hem I Girap Bakegen long Ded

I kam long Presiden Tomas S. Monson

Long weaples mi go long hem, mi traem blong go visitim beregraon blong taon ia. Hem i wan taem blong stap tingting hevi, blong luklukbak long mining blong laef mo ded. Long smol beregraon blong taon blong Santa Klara, Yuta, mi tingbaot se plante long ol nem we oli raetem long ol gref oli ol man we oli kamaot long Switsalan. Plante long ol man ia oli bin livim hom mo famle long grin graon blong Switsalan mo, long ansabak long singaot ia “Kam long Saeon,” oli bin bildimap ol komuniti we naoia oli “spel long pis” long hem. Oli bin stanap agensem ol bigfala wota we i ron, ol sama we i no gat wota, taem we kaekae i smol, mo i had blong kasem wok. Oli bin livim wan memori blong sakrifaes i stap biaen.

Ol bigfala beregraon, mo long plante wei olgeta we oli bin karem ol gudfala filing i kam, oli bin onarem olgeta olsem ol ples blong spel blong ol man we oli bin ded long faet long wo taem oli stap werem yunifom blong kantri blong olgeta. Wan i tingbaot wan drim we i no bin fulfil, ol hop we oli no bin fulfil, ol hat we oli fulap wetem harem nogud, mo olgeta yangfala we oli ded from wo.

I gat plante waet kros long ol gref long ol siti blong Franis mo Beljium we i talemaot rabis praes blong Wol Wol I. Vedan, Franis, hem i wan bigfala beregraon tru. Evri spring (taem blong planem ol samting,) taem ol fama oli digim graon, oli faenem wan hat blong faet long ples ia, wan dram blong masket longwe—ol nogud samting we i mekem yumi tingbaot ded blong ol milian man we blad blong laef blong olgeta i bin ron i go long graon ia.

Ded, Wan Niu Japta blong Laef

Plante yia i pas, mi bin stanap long saed blong bed blong wan yang man, papa blong tu pikinini, taem hem i stap rere blong ded. Hem i tekem han blong mi, i lukluk mi long ol ae blong mi, mo i askem strong, “Bisop, mi save se bae mi ded nao. Talem long mi wanem bae i hapen long spirit blong mi taem mi ded.”

Mi bin prea from givhan we bae i kam long heven. Maen blong mi i go stret long Buk blong Momon we i stap long tebol long saed blong bed blong hem. Mi stat blong rid laod:

“Nao, long saed blong ples blong ol sol bitwin ded mo laef bakegen— … ol spirit blong evri man, taem we oli bin aot long bodi ia blong wol, … oli gobak long God we i bin givim laef long olgeta.

“… Ol Spirit blong olgeta we oli stret bae oli kasem wan ples blong glad, we oli singaotem paradaes, wan ples blong spel, wan ples blong pis, long ples ia bae oli spel long ol trabol mo ol wari, mo ol harem nogud blong olgeta” (Alma 40:11–12).

Yang fren blong mi ia i sarem ol ae blong hem, i talem wan tru tangkyu long mi, mo spirit blong hem i go kwaet long paradaes ia we mi jes tokbaot.

Viktri ova long Ded

Letem Luk, we hem i wan dokta, i tokbaot eksperiens blong Meri mo narafala Meri taem tufala bin kamaot long hol blong ston long garen:

“Nao oli luk we bigfala ston blong blokem maot blong hol ya i no moa stap. …

“… Be taem oli go insaed long hol ya, oli no luk bodi blong Jisas, Masta blong yumi.

“… Oli no save se bodi blong Jisas i go wea, mo oli stap tingting tumas from samting ya, nao wantaem nomo, tu man i kamtru, we klos blong tufala i saen we i saen:

“Mo … tufala man ya i talem long olgeta se, From wanem yufala i stap lukaot man we i laef long ples blong ol dedman?

“Hem i no stap long ples ia, Hem i [girap] bakegen [long ded]” (Luk 24:2–6).

Hemia i singaot blong aksen blong evri Kristin man. Tru mining blong Laef Bakegen long Ded i givim long wan mo long evriwan, pis we man i no save andastanem. Hem i kamfotem olgeta we famle blong olgeta we oli lavem tumas oli ledaon long Flanda Fils (wan eria long wes blong Yurop we plante soldia oli ded long hem) o we oli bin ded long solwota o we oli ledaon long smol taon blong Santa Klara, long Yuta. Hem i wan trutok blong ful wol.

Olsem wan long ol disaepol blong Hem, mi talemaot witnes blong miwan se Jisas i bin winim ded, se viktri ia ova long ded oli bin winim finis. Letem ol toktok oli kam tabu tru long Hem we i bin fulfilim olgeta toktok ia, i kam wan tru save long evriwan. Tingbaot olgeta. Luksave olgeta. Givim Ona long olgeta. Hem i girap bakegen long ded

Yumi bin kam long wol blong lan, blong laef, blong progres long rod blong yumi we i no save finis blong yumi save kam stret evriwan.
Sam oli stap long wol ia be blong wan sot taem nomo, mo ol narafalawan oli stap long wol ia blong wan longfala taem. Bae oli no jajem yumi folem hamas taem nao yumi bin laef long hem be long olsem wanem nao yumi bin laef long ol laef blong yumi.
Afta, ded i kam mo wan niu japta blong laef i stat.
Niu japta ia i lidim yumi i go long naesfala dei ia blong laef bakegen long ded, taem spirit mo bodi bae i kam wan bakegen, mo bae i neva seperet bakegen.

I kam long “He Is Risen,” Liahona, Epril 2003, 2–7.

Kraes i talem long Mata we i stap harem nogud, “Mi nao, mi stamba blong laef bakegen long ded. Mi nao mi stamba blong laef. Man we i bilif long mi, nating we bambae i ded, hem bambae i mas laef. Mo man we i laef, i bilif long mi, hem bambae i no save ded samtaem” (Jon 11:25–26).

Laef Bakegen long Ded blong Kraes, olsem pat blong Atonmen, i openem rod blong yumi evriwan i laef bakegen long ded.

Long lef: Ridima blong Mi i Laef, i kam long Roja Lavles, bae oli no save mekem kopi; ol foto pikja i kam long Matiu Raea, Kristina Smit, mo Welden C. Andesen; Luk Ol Han mo Leg blong Mi, i kam long Hari Andesen; Lasaros, i kam long Kal Henrij Blok