Wan Tempol blong Kona

Liroe Alip i bin lisin gud taem we oli bin setem hem apat blong givim seves insaed long wan stek hae kaonsel long Bigfala Aelan blong Hawae. Long blesing ia, oli bin talem long Brata Alip se bae hem i stap long aelan ia long taem we bae oli bildim wan tempol longwe mo bae hem i givim seves insaed long tempol ia. Hemia, i bin hapen long 1984, mo wan tempol nomo we i bin stap, i stap long aelan bong Oahu, plante kilometa longwe blong kasem tru long bot o plen.

Blesing blong prishud i leftemap tingting blong Brata Alip. “Mi biliv se taem yu kasem wan blesing, yu gat wan responsabiliti blong mekem wanem samting we yu save mekem blong karem blesing ia i kam long yu,” hem i talem. Mekem se hem mo waef blong hem, Ros, i bin disaed blong atendem tempol long Oahu wan taem long wan manis.

Blong mekem samting ia i no bin isi. Mane blong travel hem i 300 U.S dola, hem i plante mane tumas blong wan kapol we i stap laef nomo wetem smol salari we Brata Alipa i stap kasem long gavman ofis we hem i stap wok long hem. Wan wei we tufala i save mekem blong go long trip ia hem i blong karem ol mane we tufala i stap sevem. Tufala i bin mekem olsem wetem glad.

I no kasem wan yia yet, be tufala i nomo gat mane. “Be ol hat blong mitufala i stap long tempol,” Brata Alip i talem. “Mitufala i wantem blong gohed. Mekem se mitufala i bin prea blong kasem help.”

I no longtaem afta, Brata Alip i bin sek, mo hem i bin kasem wan nara wok blong sapotem salari blong hem; wok ia i blong stap dropem ol pepa blong wan lokol bisnis. Blong dropem ol pepa ia evri eli moning, oli stap pem hem kolosap 700 dola long wan manis. Wetem mane ia, tufala i gat moa bitim we tufala i nidim blong gohed blong go long tempol, Brata mo Sista Alip i bin filim blong putum ol mane we tufala i no yusum long wan spesel tempol fand blong tufala.

Long Jun 1986, risen blong filing we tufala i bin gat i stat blong kam klia: naoia we tufala i stap long Kona Hawae Stek, tufala i save tekem i go long tempol wan namba blong ol woman long stek, we oli klin inaf be oli no bin save kasem ol endaomen blong olgeta. Mekem se long wanwan manis, ol Alip oli bin tekem wan sista wetem olgeta i go long Oahu. Evriwan long ol taem ia, sista ia we i bin go, i gobak blong serem testemoni abaot paoa long saed blong spirit mo glad we hem i bin filim taem hem i stap mekem wok blong hem mo ol nara man long tempol. I no longtaem afta, spirit blong tempol wok i go truaot long stek, mo i gat moa memba i stat blong lukaotem ol wei blong atendem tempol.

Tru long ol kontak blong Brata Alip long travel indastri, hem i save mekem arenjmen blong gat diskaon long tiket blong plen, transpot long trak, mo ples blong slip blong evriwan long stek we i wantem blong go. Long 1994, i gat moa long 100 memba blong Kona stek we oli stap mekem tempol trip evri manis i go long Laie Hawae tempol. Brata Alip i laf. Hem i tingbaot, “Tempol presiden i mekem fani se ol Sent blong Kona oli stap spolem ol doa mat blong tempol from plante long olgeta nao i bin stap long tempol.”

Long 1997 Presiden Godon B. Hinkli (1910–2008) i bin anaonsem wan niu daereksen blong bildim tempol. Blong bilding ol smol tempol bae i mekem se bae oli save bildim moa tempol. Fetfulnes blong ol Sent blong Big Aelan i mekem se sikis manis afta, Presiden Hinkli i bin anaonsem wan tempol blong Kona olsem presen blong olgeta. Afta we oli bin dediketem tempol long yia 2000, oli bin singaotem Brata Alip olsem seken kaonsela blong tempol presidensi. Tedei, afta we hem i ritae fulwan long wok blong hem be hem i fultaem long wok blong Lod, hem i supavaesem ol wokman we oli lukaotem ol graon blong Kona Hawae Tempol i stap naes oltaem.

Brata mo Sista Alip, tufala i glad tumas long ol wei we Papa long Heven i bin blesem tufala blong gat wanem we tufala i nidim blong gohed blong givim seves long ol nara man. Taem tufala i jes kambak long Kona, Brata Alip i talem, “Mitufala i no gat ples blong stap be wan raf smol haos long hil we oli bin bildim blong olgeta we oli wok long garen blong kofi.” Tufala i bin stap long ples ia blong plante manis kasem we tufala i save rentem wan smol haos.

Sam yia afta, tufala i gat inaf seiving mo mane blong save pem wan haos we i naes, be tufala i no save faenem wan we i stret long tufala. Wan dei taem Brata Alip i bin stap wok long Kona tempol graon, wan olfala sista i kam. Hem i stap krae. Brata Alip i saksakem hed blong hem. “Oli bin askem hem blong aot long haos blong hem mo hem i no gat ples blong go. Blong sam risen, mi bin talem long hem blong go visitim ol apu pikinini blong hem, mo taem hem i kambak, hem i save kam stap wetem mifala.” Problem se, hom blong ol Alip hem i naf long Brata mo Sista Alip nomo. Mekem se tufala i stat blong prea—mo lukluk plante long ol wei blong save kasem blesing we tufala i lukaotem.

Smol taem afta, wan ejen blong salem graon mo haos i bin invaetem tufala blong lukluk long wan tu stori haos wetem sikis bedrum. Tufala i bin laekem tumas, be tingting se haos ia bae i sas tumas mo bae tufala i no save pem. From se tufala i no sua gud wanem blong mekem, tufala i no akseptem tingting ia.

Be wan rod i bin open long tufala. Samfala wik afta, praes blong hom ia i go daon, mo ol Alip oli faenem se oli bin gat inaf blong save lon from haos ia. Olsem wan risal, sista we i nidim ples blong stap i save stap wetem Brata mo Sista Alip taem hem i gobak long Kona, mo trifala pikinini blong ol Alip, we olgeta tu i stap long nid blong faenem ples blong stap, oli faenem wan hom blong ol famle blong olgeta long haos ia.

“Lod i bin lukaotem gud mifala,” Brata Alip i talem. “Taem yumi soem se yumi wantem blong sakrifaesem taem blong yumi, ol talen blong yumi, mo wanem we yumi gat blong Hem, Hem i blesem yumi wetem ol gudfala sore blong Hem.”