Help blong Mekem I Hapen
Hemia nao wanem ol yang woman ia blong India oli talem taem seves projek blong olgeta i bin mekem se ful branj blong olgeta oli glad tumas from famle haos naet.
Ol yang woman blong Jinae Seken Branj, Jinae India Distrik, oli wantem blong leftemap tingting blong ol memba blong branj blong oli holem famle haos naet. I no tekem olgeta longfala taem nating blong oli kam antap wetem wan simpol be gudfala plan we i gat yus long hem. Oli bin mekem ol famle haos naet wil: ol jat wetem wan spina blong kipim rekod long ol wok olsem blong talem ol prea, givim lesen, mo rere long wan “rifresmen.”
Ol pepa wil ia oli simpol be oli naes from ol kala blong olgeta. Oli bin putum tugeta ol wil ia long wan Yang Woman aktiviti long mitinghaos wan naet, wanwan long ol wil ia oli mekem blong wanwan famle wetem ol foto blong olgeta long hem. Tu long ol yang woman ia, Sasmita Santos Kumar, we i gat 15 yia, mo sista blong hem Sujeta, we i gat 14 yia, i bin glad tumas taem oli bin lanem se olsem ol niu memba blong Jos, tufala wetem famle blong tufala bae i kasem fas wil ia.
“Afta long Miutuol mifala i bin go olsem wan grup i go long apatmen blong olgeta mo presentem wil ia long papa blong olgeta,” Desi Daniel we i gat 16 yia, i talem. “Ful famle oli bin glad tumas.” Famle i bin tokbaot finis famle haos naet wetem ol fultaem misinari, mo wil ia i givim long olgeta wan moa risen blong oli mas foloap long wanem oli bin lanem.
Ol yang woman oli bin mekem inaf wil blong oli givim long wanwan famle blong ol pikinini long Praemeri long branj. Afta oli bin mekem sam moa wil blong ol ful-taem misinari blong oli givim long ol niu konvet.
“Plante long mifala long branj i ol niu memba, mo mifala i no yus yet blong gat ol famle haos naet,” Desi i talem. “Be mi bin gat wan testemoni se famle haos naet bae i helpem ol pikinini wetem ol papa mo mama blong olgeta blong oli wok tugeta, mo mi hop se taem ol famle ia oli luk wil blong famle haos naet ia, bae oli tingting se, ‘Okei, ol Jos memba oli lavem yumi, mo oli bin givim long yumi wil ia blong i rimaenem yumi, mekem se letem yumi gat famle haos naet blong yumi.’” Hem i stap luk finis se bae i no longtaem famle haos naet bae i kam wan samting we bae oli stap mekem evri wik blong plante pipol long branj.
Wan Gudfala Seves I Lid I Go long Wan Narawan
Ol famle haos naet wil ia oli no jes wan seves projek blong ol yang woman we oli bin komplitim. Long wan traehad blong helpem wan wido long branj we hem i bin stap hemwan, ol yang woman ia oli bin flasem gud wan basket mo fulumap ol sot hapi not we oli raetem nomo long han long basket ia. “I no gat wan i stap blong i tekem kea long wido ia,” Desi i talem. “Mekem se mifala i wantem blong rimaenem hem se ol memba blong branj oli stap tingbaot hem.” Ol yang woman ia oli tekem basket ia mo oli go givim long hem stret mo eksplenem long hem se hem i save ridim wan not evri dei blong i karem wan smael i kam long fes blong hem.
Basket blong ol not ia i bin krietem wan narafala aedia. Ol yang woman oli disaed blong oli raetem ol leta blong talem tangkyu long wanwan long olgeta.“Wanwan long mifala i stap raetem wan naesfala leta i go long ol narafalawan,” Monisa Kalai Selvam, we i gat 13 yia i eksplenem.
Long Laef Famle Haos Naet!
Tru long hemia mo ol narafala aktiviti, ol yang woman blong Jinae Seken Branj oli stap lanem se iven ol simpol aksen blong seves i save karem ol pipol oli kam kolosap long Sevya. Ating bae ol branj memba bae oli tingbaot blong longtaem ol wil blong famle haos naet from plante long olgeta oli bin kasem ol wil ia mo oli stap yusum olgeta finis. Be iven sapos ol wil ia oli wan samting blong rimaenem olgeta blong smol taem nomo, hemia i oraet tu.
“Eniwan i save mekem wil blong olgetawan o jat o blong oli jes sidaon wetem wan pensel mo pepa mo mekem ol plan,” Desi i talem. “Mifala i save se famle haos naet hem i impoten long evriwan, mo mifala i wantem blong help blong mekem samting ia i hapen.”
Ol foto i kam long Rijad M. Romni
Karthikeyan
Meganathan
Daniel
Bharath Raj