Taem mi ridim se stat long Jenuware 2010 bae mifala i gat wan niu Liahona, mi bin homsik smol. Magasin ia i bin angka blong mi long gospel stat long taem we mi bin baptaes taem mi bin gat 17 yia. Sopsop testemoni blong mi i bin kam moa strong taem mi ridim ol eksperiens blong ol narafala memba mo mi save mi no stap miwan. Mi kipim gud ol magasin we mi bin stap pikimap, from oli gat ol tabu mesej we oli bin helpem mi long ol hadtaem mo long nid.

Naoia yu bin givim long mifala wan Liahona we i moa bigwan mo i defren, be i tru, i semmak olsem fas wan we mi bin ridim long 1992. Tangkyu insaed long hat blong mi i dip tumas.

Liahona ia hem i wan bigfala blesing mo glad long mi. Hem i helpem mi blong mitim ol memba evri ples long wol, blong lanem abaot ol kantri mo kalja blong olgeta, mo harem gud long fet blong olgeta. Magasin ia hem i wan spring long saed blong spirit mo paoa, mo i bin helpem mi blong mi kam moa gud.

Long wod blong mi, oli no stap mekem tumas visiting tijing, mo tempol atendens hem i smol nomo. Olsem wan visiting tijing lida mo wan woman we i wok long tempol, mi bin stap prea blong samting ia i jenis. Mi bin yusum toktok blong konfrens blong Elda Rijad G. Skot, “Tempol Wosip: Stamba blong Kam Strong mo Kasem Paoa long Ol Taem blong Nid” (Liahona, Mei 2009, 43) blong toktok tugeta long sakramen miting mo Rilif Sosaeti. Toktok blong mi ia i bin tajem ol hat blong ol wod memba. Visiting tijing naoia kolosap i kasem 100 pesen, mo plante oli stap go long tempol mo putum long praktis ol step we Elda Skot i bin tokbaot long mesej blong hem. Wan taosen tangkyu i go long Elda Skot from naesfala mesej blong hem mo long yu from Liahona.