Wan Hag blong Papa

Famle blong mi i rere blong livim pati, be mi wantem blong go mekem rolasket. Papa blong mi i hagem mi mo askem sapos mi wantem blong stap blong hem i save go rolasket wetem hem.

“No!” Mi talem long kros.

““Yu save trastem mi,” hem i talem.

Ol narafalawan oli wantem blong go, mekem se mifala i go insaed long trak. Ten minit afta mifala i kasem wan aksiden. I wan merikel, mi bin laef, be papa blong mi i bin ded. “No!” ia hem i las samting we mi talem long hem, mo hem i las man we bae mi save hagem bakegen afta plante yia.

Blong nekis 11 yia, laef blong mi i stap kam moa nogud. Mi bin lusum tras long miwan mo stat blong no gat tras long evriwan. Laef blong mi i no gud tumas mekem se, wan dei, taem mi gat 18 yia, mi faenem miwan i stap anda long hevi fasin blong no gat hop, mo stap wet long God blong i soemaot long mi wan wei blong wan hapi laef.

Wan wik afta, tu misinari i kamaot long mi. Tufala i soem long mi wan buk mo talem long mi blong mi mas prea blong kasem wan witnes blong trutok blong buk ia. Wanem oli bin askem i smol tumas, be ol soa we i stap afta long ded blong papa blong mi i dip tumas, mo mi luk se miting blong mi wetem ol misinari ia i wan krangke samting nomo mo i no wan ansa we i kam long wan God we i lavem mi.

Be, mi bin ridim Buk blong Momon mo mi bin prea blong kasem wan ansa—nomata we mi no bin askem wetem wan tru tingting. I oraet nomo, from hemia i minim se bae mi mas trastem God, blong hagem Hem mo ansa blong Hem. Hem i isi blong akseptem ol toktok blong agens blong Jos we i stap finis. Mo mi bin faenemaot tu se plante bigfala man blong histri we mi bin lanem long skul oli giaman nomo. Wanem sapos Josef Smit i olsem olgeta ia?

Be, long en, mi bin baptaes mo kasem konfemesen. Mi save se mi nidim sam daereksen long laef blong mi, mo mi laekem Jos mo ol memba blong hem. Be naoia mi luksave se mi bin joenem jos be mi no gat wan tru testemoni, wan we i bon insaed long hat. Bilif we mi bin gat i kam from mi luksave se ol rao agensem Jos oli no gat stamba blong olgeta. Be mi no gat tras yet, mi kasem wan poen we blong kipim bilif ia, i bin kam strong tumas. Fas taem we mi kam long Jos i bin stat from mi bin no gat tras mo from mi no stap hapi, mo mi bin kamdaon long sem stet ia bakegen.

Mekem se mi bin mekem wan impoten desisen: bae mi prea, be naoia bae mi mekem olsem Moronae i bin mekem, wetem “fet long Kraes,” “tingting we i tru blong wantem save,” mo wan “tru hat” (Moronae 10:4). Long dei ia we mi bin jusum, mi bin livim kakae mo prea from daereksen. Mi spendem ful dei blong tingting hevi long evri samting we i bin hapen.

Long naet ia mi bin nildaon long bed blong mi. Mi putum hed i go daon, mo askem Papa long Heven abaot trutok blong Buk blong Momon. Maen blong mi i stat blong tingbaot evri tu tingting we mi gat. Mi klosem ol ae blong mi, putum tufala han blong mi taed tugeta, mo askem bakegen—wetem tru hat, wetem strong tingting blong wantem save, wetem fet long Sevya blong yumi.

I luk olsem wol i bin stop. Mi filim gud mo wan laet i stat blong raonem mi. Blong 11 yia mi bin wantem tumas samting ia, mo long en wan papa i bin hagem mi bakegen—wan Papa long Heven. Naoia mi gat wan man blong mi trastem. “Yes,” mi talem, wetem ol wota blong ae long fes blong mi, “mi trastem Yu.”