I Go long Ol Yang Man Abaot Deiting

Ol yang man, deiting hem i taem we yu askem wan yangfala woman blong tekempat mo mekem samting tugeta wetem yu long wan sosol aktiviti we oli bin plan from.

Deiting i save kam wan gudfala eksperiens blong lanem samting, blong yu mo yang woman we yu stap deitem. Yu save lanem moa abaot yuwan, mo save developem save, respek, mo tangkyu from ol spesel gel blong God.

Ating bae hem i longwe yet naoia, be mared hem i wan long ol impoten desisen long laef blong yu. Ol yia blong yu olsem wan yangfala i no taem yet blong yu mekem desisen ia, be stret deiting bae i helpem yu blong mekem desisen taem hem i kam long stret taem blong hem. Deiting bae i givim long yu ol janis blong developem ol sosol skil we bae oli helpem yu blong gat tras mo bae yu luk naes long yangfala woman ia we yu stap deitem. Bae yu kam blong save mo luk naes wetem ol kwaliti mo fasin ia we bae oli kam impoten long yu long wan kompanion we i no save finis. Stret deiting bae i helpem yu tu blong stap klin mo rere blong mared long tempol blong ol taem mo ol taem we i no save finis wetem raet woman ia long raet taem.

Evri samting ia bae oli ademap glad blong yu long wan bigfala blesing long laef: wan hapi mo gudfala mared.

Ol profet blong Lod oli bin kaonselem yu blong no deit kasem taem yu gat 16 yia. Taem yu stat blong deit, deitem nomo olgeta we oli gat hae standet mo long kampani blong olgeta we yu save kipim ol standet blong yu. Tekempat oltaem long ol gudfala aktiviti we i letem yu mo deit blong yu blong kipim respek long wanwan long yutufala mo blong stap kolosap long Spirit blong Lod. Hem i impoten bigwan blong gat ol klin tingting mo filing. Stap longwe blong gat wan rilesensip we i gat toktok o fasin blong seks long hem. Traem blong no stap yuwan wetem deit blong yu o stap let aotsaed. Yutufala i responsibol blong helpem wanwan long yutufala blong kipim tabu fasin blong prishud mo fasin blong kam wan woman mo blong protektem ona mo klin fasin blong yutufala. Traem blong stap kaen long yang woman, mo respektem yang woman taem yu askem o akseptem wan deit mo truaot long evri deiting eksperiens blong yu.

Taem yu stat blong deit, go wetem wan o moa nara kapol. No traem blong stap deitem sem gel oltaem o developem wan eli series rilesensip.

Tingbaot blong kipim balens long laef blong yu taem yu stap deit. Yu no mas stap deit tumas mekem se bae i spolem ol famle rilesensip blong yu o i kipim yu blong no stap mekem gud long skul o blong developem ol skil mo talen blong yu. Mekemsua se papa mo mama blong yu i mitim mo filim gud wetem yang woman ia we yu stap deitem.

Mifala i leftemap tingting blong yu blong yu tekempat long ol gudfala aktiviti blong deit we oli planem i simpol, gud, mo i no sas, mo we bae i helpem yu blong save yang woman ia we yu stap deitem.