Eli Sandei Moning

Hem i Satedei naet long Waila Wod long Nausori Fiji Stek. Ol responsabiliti blong dei oli bin fulfil, mo olgeta man ia we oli holem Aronik Prishud oli bin rere from Sabat mo naoia oli kam tugeta long hom blong Brata mo Sista Maiwiriwiri. Hem i wan janis blong olgeta blong gat wan smol kakae bifo oli statem livim kakae blong olgeta—folem wetem ol mat we bae oli silip long hem long naet ia long hom blong ol Maiwiriwiri.

Moning blong ol yang man blong Aronik Prishud ia i kam eli. Bifo san i kam antap, oli wekap kwik, putum ol waet sot blong olgeta mo ol nektae mo ol longfala blak traosis blong olgeta, mo taem hem i 6 klok moning nomo, oli aot tu tu, livim hom blong Brata mo Sista Maiwiriwiri—olsem ol misinari. Wanwan long ol kompanionsip ia i gat wan spesel rod blong oli tekem blong oli save kasem japel long 10 klok long moning, taem prishud miting i stat. Responsabiliti blong olgeta blong stop long wanwan hom blong ol memba long rod blong olgeta mo invaetem olgeta blong oli kontribiut long ol fast ofring.

Ol yang man ia oli wokbaot tri mael (5 km) stat long hom blong ol Maiwiriwiri long wan en blong wod i go kasem mitinghaos long narafala en blong wod. Hemia i wan janis blong fulfilim diuti blong olgeta mo invaetem ol memba blong Jos blong oli tekempat long bigfala wok blong kea long ol wido mo long ol brata mo sista blong olgeta taem oli kontribiut long fast ofring. Presiden Alipate Tagidugu blong Nausori Fiji Stek i bin talem se olsem wan risal blong hadwok ia we i kam long Aronik Prishud, ol fast ofring kontribusen i bin go antap long 20 pesen.

Olsem we hem i impoten, ol yang man ia oli gat wan janis blong fulfilim diuti blong olgeta mo helpem ol memba blong wod blong oli kipim ol kavenan blong olgeta we oli bin mekem taem oli baptaes:

“From yufala i wantem blong kam long yad blong God, mo se oli singaotem yufala ol pipol blong hem, mo yufala i glad blong karem ol hevi samting blong wanwan long yufala, blong mekem se oli nomo hevi;

“Yes, mo yufala i glad blong krae wetem olgeta we oli krae, yes, mo leftemap tingting blong olgeta we oli nidim fasin blong leftemap tingting, mo blong stanap olsem ol witnes blong God evri taem mo long evri samting, mo long evri ples we yufala i save stap long hem, go kasem ded, mekem se God i save pemaot yufala, mo bae oli save pemaot yufala, mo bae oli kaontem yufala wetem olgeta ia blong fasfala laef bakegen, mekem se yufala i save kasem laef we i no save finis” (Mosaea 18:8–9).

Long ol gudfala yang man ia, blong kolektem ol fast ofring hem i no wan hevi samting be hem i wan blesing. Oli glad blong werem ol waet sot mo nektae blong olgeta, wekap long eli moning, mo noknok long ol doa blong ol memba long ol aoa blong eli moning blong invaetem olgeta blong tekempat long ol blesing we i kam taem oli givim wan bigfala fast ofring.

Taem mi stap lukluk ol yang man ia oli stap rere blong mo fulfilim ol diuti blong olgeta olsem ol man we oli holem prishud, mi stap tingting se hem i wan gudfala blesing we bae i kam long ol laef blong olgeta blong oli andastanem se ol hadwok blong olgeta blong invaetem ol memba blong Jos blong kam kolosap long Sevya, hem i impoten taem oli givim ol fast ofring. Bae oli kam ol gudfala misinari, mo ol gudfala hasban mo papa olsem wan risal blong ol hadwok blong olgeta long prishud.

Bae oli kam blong andastanem gud skripja ia abaot ol pipol blong Lod: Lod i singaotem ol pipol blong Hem Saeon from oli gat wan hat mo wan maen; oli laef long ol stret mo gud laef, mo i no gat wan we i pua long medel blong olgeta (luk long Moses 7:18).