Ol Hol blong Ston blong Berem Ded Man we Oli Silim

Dei afta we Papa i bin ded long hem, mi mo mama, ol brata, mo sista blong mi, i bin mekem wan visit i go long ples we oli kipim ol ded man long hem blong mekem ol plan blong berem papa blong mifala. Wok blong mifala hem i blong jusum wan kofin mo wan ples blong berem andanit long graon.

Taem mifala i stap tingting long wanem bae mifala i mekem, mi luksave wan sels pamflet we i stap advataesem wan ples blong berem man andanit long graon. Pamflet ia i talem se, long ol narafala samting, ples blong berem man long hem ia i gat wan sil blong hemwan, mo i promes blong i stap sil o lok blong 75 yia. Iven we taem ia mifala i stap harem nogud yet from ded blong papa blong mifala, promes we i stap long pamflet ia i mekem mi smael.

“Huia bae i wantem blong jekem sil o lok ia long 75 yia?” mi stap tingting. “Mo sapos wan man i bin traem blong openem sil ia mo i bin fel blong openem, huia bae i pikimap wanem oli bin promesem? Wanem nao ol tru janis,” mi stap tingting, “blong ples blong berem man ia i stap sil o lok oltaem?”

Long taem blong tingting ia, maen blong mi i bin gobak long wan narafala ples blong berem man, wan we oli bin tokbaot long Matiu 27. Ples blong berem man ia, hem i wan hol long wan taem mo wan ples blong bifo, we maot blong hem wan bigfala ston i kavremap:

Nao dei ya, hem i dei blong mekem rere evri samting i rere blong Sabat dei, ol jif pris mo ol Farasi oli stanap long fes blong Paelat,

nao oli talem se, “Masta, mifala i stap tingbaot man blong giaman ya. Taem we hem i stap laef yet, hem i stap talem se, Biaen long tri dei, bambae God i mekem mi mi laef bakegen.

Nao from samting ya, plis yu talem long ol man blong yu blong oli go lukaot gud long hol ya long ston, gogo kasem namba tri dei blong hem. I nogud ol man blong hem oli go tekemaot bodi blong hem long taem we ol man oli no luk olgeta, nao bambae oli talemaot long ol man, se hem i laef bakegen. Sipos i olsem, bambae las giaman ya i nogud moa, i winim hemia blong fastaem.”

Nao Paelat i talem long olgeta se, “yufala i save tekem sam soldia, yufala i go mekem evri samting we yufala i save mekem, blong lukaot gud long ples ya.”

Nao oli go, oli putum mak long ston we i blokem hol ya, blong bambae oli save faenemaot sipos man i muvum. Mo oli putum ol gad oli stap lukaot long ples ya (Matiu 27:62–66).

Long evri oda we oli stap givim long ol histri blong ol king mo ol jeneral mo ol rula, oda blong Paelat blong kipim hol blong ston ia i lok gud ating hem i wan long ol krangke oda bitim evriwan ia.

Wanem janis nao hol blong ston ia i gat blong stap sil o lok oltaem? Long trutok, i no gat wan wei blong ol soldia oli save karemaot oda ia semmak olsem we i no gat wan wei se hol blong ston ia i save open: “Nao semtaem nomo, graon i seksek bigwan from we wan enjel blong Hae God i aot long heven, i kam, i rolemaot ston ya we i blokem hol” (Matiu 28:2).

From we oli bin openem hol blong wan ston ia, evri ples blong berem man mo ol hol blong ston we oli bin silim bae oli stap open nomo. Hemia i tru.

Ston we bae i Sevem yumi Hem i man we i karemaot yumi long ded mo hel. Hem nao i “stamba blong laef bakegen, mo laef” (Jon 11:25). From Hem “hel i mas lego ol spirit prisena blong hem, mo gref i mas lego ol bodi prisena blong hem, mo ol bodi mo ol spirit blong man bae i joen tugeta bakegen wan i go long narawan; mo hem i tru long paoa blong laef bakegen blong Tabu Wan blong Isrel” (2 Nifae 9:12).