Ol Sot Stori Raon long Wol
Oli Bin Anaonsem Niu Yurop Is Eria Presidensi
Fas Presidensi i bin anaonsem wan jenis long Yurop Is Eria Presidensi, we i stat wok long semtaem. Elda Kevin W. Piasen, Fas Kaonsela long Eria Presidensi, i bin transfea i go long ol Jos hedkwota blong wan spesel wok long Misinari Dipatmen. Elda Wolfgang H. Pol bae i gohed olsem Presiden blong eria, wetem Elda Kregori A. Siswitsa blong olgeta Seventi olsem Fas Kaonsela mo Elda Aleksandr N. Mansos, we hem i Eria Seventi, olsem Seken Kaonsela.
Oli bin Jusum Finis Ples blong Tempol i Stanap long Hem long Filadelfia, Pensilvania
Long Novemba 2009 Fas Presidensi i bin anaonsem se Tempol blong Filadelfia Pensilvania bae i stap long 1739 Fen Strit daontaon long Filadelfia. Ples ia i stap kolosap long Fen Stret Haeway mo i kolosap long ol Bilding blong Kot mo i stap narasaed long Logan Skwea, wan impoten mak blong Filadelfia. Presiden Tomas S. Monson i bin anaonsem tempol ia long Oktoba 2008. Naoia i gat 130 tempol we oli open long wol, wetem wan nara 21we oli bin anaonsem o oli stap bildimap yet.
Oli Bin Anaonsem Ol Deit blong Openem Vankuva Tempol
Bae oli holem open haos blong Vankuva Britis Kolombia Tempol long 9 Epril kasem 24 Epril 2010, be i no ol Sandei, mo wan kalja selebresen bae i stap long 1 Mei. Dedikesen ia bae i tekem ples long tri sesen long Sandei, 2 Mei, long 9:00 long moning, 12:00 medel dei, mo long 3:00 long aftenun. Trifala sesen blong dedikesen ia bae oli brodkastem long evri Jos yunit insaed long tempol distrik ia. Tempol bae i open long nekis dei blong ol odinens.